«قازاقستان» شوكولادىندا تۋدى بەينەلەۋ قانشالىقتى زاڭدى

استانا. KAZINFORM - استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ «قازاقستان» شوكولادىندا مەملەكەتتىك تۋدى بەينەلەۋ قانشالىقتى زاڭدى ەكەنىن ايتىپ بەردى.

− «قازاقستان» شوكولادىنىڭ بولعانى دۇرىس دەپ ويلايمىن. ويتكەنى بۇل دا قازاقستاننىڭ ءبىر سيمۆولى عوي. بۇل جەردە مىنانى ءتۇسىنۋىمىز كەرەك، مەملەكەتتىك تۋدىڭ ءوز ستاندارتتارى بار، ونىڭ ورنامەنتى بار، ويۋدان كەيىن قانشا سانتيمەتردەن كەيىن كۇن ورنالاسۋى كەرەك، كۇننىڭ اينالاسىنداعى ءاربىر شۋاقتىڭ سانى بار، ءتۇسى بار. ال ەگەر ونىڭ قانداي دا ءبىر ەلەمەنتى، ورنامەنتى بولماسا، ول تۋ بولىپ ەسەپتەلمەيدى. شوكولادتا دا «قازاقستان» دەپ جازىلعان، سوسىن كۇن سالىنعان، كوك تۇستە بولعان سوڭ، تۋ سياقتى كورىنەدى. بۇل پاتريوتتىق سەزىمدى تۋدىراتىن ادەمى دۇنيە، ءبىراق تولىققاندى تۋ بولىپ ەسەپتەلمەيدى، − دەدى ساكەن ەسىركەپ تىلشىلەرگە بەرگەن سۇحباتىندا.

ايتا كەتەيىك، ەلوردادا ەرىكتىلەر تۇرعىندارعا مەملەكەتتىك رامىزدەر تۋرالى ۆيكتورينالىق سۇراقتار قويىپ، ەستەلىك سىيلىقتار تابىستادى. كوپقاباتتى ۇيلەر تەرەزەسىنە 300-گە جۋىق تۋ ءىلىندى. سونداي-اق، ءۇش مىڭ رۋبيك تەكشەلەرىنەن الىپ تۋ بەينەسى جاسالدى. ال بۇگىن كەشكە بايتەرەك مونۋمەنتى ماڭىندا «دومبىرا party» وتەدى.

− وزدەرىڭىز بىلەسىزدەر، بۇعان دەيىن رامىزدەرىمىزگە قاتىستى تالاپتار قاتاڭداۋ بولاتىن. كەز كەلگەن ازامات تۋدى ءوز بالكونىنا ىلگەندە ماسەلەلەر تۋىندايتىن. ءبىراق سوڭعى ەكى جىلدا مەملەكەت باسشىسى مەملەكەتتىك تۋدى، رامىزدەردى كەڭىنەن پايدالانۋ كەرەك، ەل ازاماتتارىنىڭ پاتريوتتىق سەزىمىن ەركىن بىلدىرۋىنە مۇمكىندىك سىيلاۋ كەرەك دەگەن بولاتىن. بۇگىن قالامىزدىڭ ءىرى داڭعىلدارى مەن كوشەلەرىندە ءۇي قاسبەتتەرى مەن بالكوندارىنا مەملەكەتتىك تۋ ءىلىنىپ جاتىر. قالا كوشەلەرىنە 1,5 مىڭ كوك جالاۋشا ءىلىندى. سوندىقتان، ءارقاشان تۋىمىز تورىمىزدە بولسىن، ۇيىمىزدە، جۇرگەن جەرىمىزدە تۋىمىزدى ناسيحاتتاپ، كوتەرىپ جۇرەيىك، − دەدى س. ەسىركەپ.

بۇعان دەيىن قازاقستان رامىزدەرىن قورلاعاندارعا قانداي جازا قولدانىلاتىنىن حابارلاعان ەدىك. مەملەكەتتىك رامىزدەردى ورىنسىز پايدالانعاندار اكىمشىلىك قۇقىق بۇزۋ تۋرالى كودەكس بويىنشا، ال قورلاعاندار - قىلمىستىق كودەكس بويىنشا جاۋاپكەرشىلىككە تارتىلادى.

مەملەكەتتىك رامىزدەرى كۇنى استانادا 500-گە جۋىق ءىس- شارا وتەدى.

اۆتور

ايجان سەرىكجان قىزى