قازاقستان ۇشقىشسىز باسقارىلاتىن اپپاراتتار بويىنشا قاي ەلدەرمەن كەلىسسوز جۇرگىزدى

ونەركاسىپ جانە قۇرىلىس مينيسترلىگى ۇشقىشسىز باسقارىلاتىن اپپاراتتار ءوندىرىسىن قۇرۋ جوسپارى تۋرالى تۇسىنىك بەردى، دەپ حابارلايدى Kazinform.

«ۇشقىشسىز باسقارىلاتىن اپپاراتتاردى شىعارۋ باعىتانا توقتالساق، اسكەري-تەحنيكالىق ىنتىماقتاستىق اياسىندا قورعانىس ونەركاسىبى كەشەنىنىڭ وتاندىق كاسىپورىندارى تۇركيا، قىتاي، يزرايل، وڭتۇستىك كورەيا جانە باسقا دا ەلدەردىڭ جەتەكشى كومپانيالارىمەن بىرلەسە ءبىرقاتار جوبانى جۇزەگە اسىرىپ جاتىر. بۇل تۇرعىدا ءتۇرلى ۇلگىدەگى ۇشقىشسىز باسقارىلاتىن اپپاراتتارىن ءوندىرۋ جانە ولارعا قىزمەت كورسەتۋ جونىندەگى تەحنولوگيالاردى يگەرۋ جوبالارى قامتىلعان»، - دەلىنگەن ونەركاسىپ مينيسترلىگىنىڭ Kazinform اگەنتتىگىنە بەرگەن جاۋابىندا.

سونىمەن قاتار، قورعانىس ونەركاسىبى كەشەننىڭ جۇمىس ىستەپ تۇرعان كاسىپورىندارىندا مىقتى مامانداردىڭ جانە وندىرىستىك قۋاتتاردىڭ قامتاماسىز ەتىلۋىنە بايلانىستى جاقىن ارادا ۇشقىشسىز اپپاراتتاردى شىعاراتىن جاڭا زاۋىتتار سالۋ قاراستىرىلماعان.

«قازاقستان رەسپۋبليكاسىنىڭ اۋماعىندا («قازاقستان ينجينيرينگ» ج ش س، «Kaz Tech Innovations» ج ش س، «Bet Sky» ج ش س، «SC Tech» ج ش س، «Smartplane» ج ش س جانە باسقالارى) ءبىرقاتار كاسىپورىن بار ەكەنىن اتاپ وتكەن ءجون. ولار ءوز كۇشىمەن ىشكى نارىققا دا، ەكسپورتقا دا اسكەري جانە قوسارلى ماقساتتاعى ۇشقىشسىز باسقارىلاتىن اپپاراتتارىن دايارلاۋ جانە ءوندىرۋ بويىنشا جۇمىستاردى اتقارىپ جاتىر»، - دەلىنگەن اتالعان ۆەدومستۆونىڭ اقپاراتىندا.