قازاقستان عارىش اپپاراتتارىن ەكسپورتتايدى
استانا. KAZINFORM - قازاقستان موڭعوليا مەن كونگو ءۇشىن KazSTSat تيپى بويىنشا سپۋتنيكتەر ازىرلەۋ جونىندە ۋاعدالاستى. الداعى ۋاقىتتا وسى ەلدەردىڭ جانە وتاندىق جەر سەرىكتەرىنىڭ اراسىندا اقپارات الماسۋ قامتاماسىز ەتىلەدى.
بۇل حالىقارالىق جەر سەرىكتەرى توپتاماسىن قۇرۋعا جانە عارىشتىق مونيتورينگتىڭ تيىمدىلىگىن ارتتىرۋعا مۇمكىندىك بەرەدى. بۇل جايىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ تۇركى مەملەكەتتەرى پارلامەنتتىك اسسامبلەياسى دەلەگاتسيالارىمەن كەزدەسۋدە ايتتى.
قازاقستان، ازەربايجان، قىرعىزستان جانە وزبەكستان مەن سولتۇستىك كيپر پارلامەنتتەرىنىڭ سپيكەرلەرى ۇلتتىق عارىش ورتالىعىنا بارىپ، اپاراتتاردى قۇراستىرۋ-سىناۋ كەشەنىنىڭ جۇمىسىمەن تانىستى. ورتالىق ازيادا بالاماسى جوق بۇل كەشەن 100 كەلىدەن 6 تونناعا دەيىنگى سالماقتاعى عارىش اپپاراتتارىن قۇراستىرۋعا، ۇشۋ الدىنداعى دايىندىققا جانە تولىق سىناق سيكلىنان وتكىزۋگە ارنالعان. وتاندىق ماماندار جوعارى دالدىكتى جابدىقتاردى پايدالانا وتىرىپ، عارىش اپپاراتتارىنىڭ كومپونەنتتەرى مەن باسقا سالالارعا ارنالعان قوسالقى بولشەكتەردى دايىندايدى. سونىڭ ىشىندە ەكسپورتقا دا ازىرلەيدى.
سونىمەن قاتار OTS- Sat نانو- ساناتتى عىلىمي عارىش اپپاراتىنىڭ جاسالۋىنا قاتىستى ازىرلەمەلەر تانىستىرىلدى. بۇل تۇركى مەملەكەتتەرى ۇيىمىنا مۇشە ەلدەردىڭ بىرلەسكەن جوباسى. قازىرگى ۋاقىتتا اپپارات پەن ونىڭ قوسالقى جۇيەلەرىنىڭ جوباسى اياقتالىپ، كومپونەنتتەردى ساتىپ الۋ جانە قوسالقى جۇيەلەردى جيناۋ جۇمىستارى ءجۇرىپ جاتىر. وپتيكالىق پايدالى جۇكتەمەنى جاساۋ جانە ونى سىناقتان وتكىزۋ اياقتالدى.
24.kz
