قازاقستان بيۋدجەتىنەن 2,8 مىڭ شەتەل ازاماتى اتاۋلى الەۋمەتتىك كومەك الىپ وتىر

استانا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى Kazinform ساۋالىنا جولداعان جاۋابىندا قانشا ادامنىڭ، ونىڭ ىشىندە شەتەل ازاماتتارىنىڭ اتاۋلى الەۋمەتتىك كومەك العانى تۋرالى ءمالىم ەتتى.

«2023-جىلدىڭ قورىتىندىسى بويىنشا 114,1 مىڭ وتباسى (598,4 مىڭ ادام) اتاۋلى الەۋمەتتىك كومەك الۋشى بولدى. ونىڭ ىشىندە 223 قانداس وتباسى (725 ادام)، 1,7 مىڭ شەتەلدىك وتباسى (2,8 مىڭ ادام) جانە ازاماتتىعى جوق 278 وتباسى (406 ادام) بار»، - دەپ جازىلعان مينيسترلىك جاۋابىندا.

رەداكسيا ساۋالىندا 2022 -جىلدىڭ 24-اقپانىنان بەرى قازاقستانعا بوي تاسالاعان رەسەيلىكتەردىڭ قانشاسىنا بيۋدجەتتەن الەۋمەتتىك كومەك كورسەتىلەتىنى سۇرالعان بولاتىن. مينيسترلىك الەۋمەتتىك تولەم الۋشىلاردىڭ ستاتيستيكاسىن جۇرگىزۋ ءتارتىبىن العا تارتىپ، ناقتى جاۋاپ بەرمەدى.

«اقپاراتتىق جۇيە شەتەلدىكتەردى ۇلتتار بويىنشا كورسەتپەيدى. وسىعان بايلانىستى، ا ءا ك العان رەسەيلىكتەردىڭ سانىن، سونداي-اق ولاردىڭ تولەمدەرىن ناقتىلاۋ مۇمكىن ەمەس»، - دەپ جازىلعان جاۋاپتا.

اۆتور

ەسىمجان ناقتىباي