قازاقستان بيدايى ۆەتنامعا ەكسپورتتالدى

استانا. KAZINFORM - جوعارى ساپالى قازاقستاندىق بيداي تيەلگەن ترانزيتتىك كونتەينەرلىك پويىز قىتايدىڭ ليانيۋنگان پورتىنا جەتتى. بۇل - ۆەتنامعا ارنالعان جانە «ازىق-تۇلىك كەلىسىمشارت كورپوراتسياسى» جىبەرگەن سەگىز قۇرامنىڭ العاشقىسى. جەتكىزۋ مۋلتيمودالدى باعىت بويىنشا جۇزەگە اسىرىلىپ وتىر.

تەمىرجول قۇرامى جالپى سالماعى 1,7 مىڭ توننا بولاتىن 62 كونتەينەردەن قۇرالعان. كونتەينەرلەر تەڭىز كەمەلەرىنە قايتا تيەلگەننەن كەيىن، بيداي ۆەتنامنىڭ حايفون پورتىنا جەتكىزىلەدى.

قازاقستاندىق استىقتىڭ ۆەتنامعا ءساتتى جونەلتىلگەنى تۋرالى قىتايدىڭ ورتالىق تەلەارناسىندا جانە قىتاي حالىقارالىق تەلەجەلىسىندە ارنايى سيۋجەتتەر كورسەتىلدى.

قىتايلىق ب ا ق اتاپ وتكەندەي، ليانيۋنگان پورتىنداعى لوگيستيكالىق بازا «ءبىر كونتەينەر - ءبىر سەرۆيس» قاعيداسىمەن جۇمىس ىستەيدى. بۇل مودەل بويىنشا جۇكتىڭ باستاپقى نۇكتەدەن سوڭعى مەجەگە دەيىن قايتا تيەۋسىز ءبىر كونتەينەردە جەتكىزىلۋى قامتاماسىز ەتىلەدى. وسى تەحنولوگيانىڭ ارقاسىندا تەمىرجولدان تەڭىز پورتىنا ءوتۋ ۋاقىتى نەبارى ءبىر ساعاتقا سوزىلدى. سونىمەن قاتار، قازاقستاندىق بيداي بارلىق راسىمدەر جەدەل تۇردە جۇرگىزىلەتىن «جاسىل ءدالىز» ارقىلى جەتكىزىلدى.

- «باستاپقى نۇكتەدەن سوڭعى مەجەگە دەيىن ءبىر كونتەينەردە جەتكىزۋ» فورماتى وڭتۇستىك-شىعىس ازياعا باعىتتالعان قازاقستاندىق ەكسپورتقا ساپالى ءارى ءتيىمدى قۇرلىقتىق-تەڭىزدىك ينتەرمودالدى قىزمەت كورسەتۋدى قامتاماسىز ەتتى. بۇدان بولەك، ءبىزدىڭ لوگيستيكالىق بازامىز كەدەن، پورت، تەمىرجول جانە باسقا دا ۆەدومستۆولاردىڭ قولداۋىنا يە بولدى. سونىڭ ناتيجەسىندە پورتتاعى جۇكتىڭ راسىمدەلۋ تيىمدىلىگى %70 عا ارتتى، - دەپ كەلتىرەدى ب ا ق ليانيۋنگان قالاسىنداعى قىتاي-قازاقستان لوگيستيكالىق ىنتىماقتاستىق بازاسىنىڭ باس ديرەكتورى گە حەنسيۋەنىڭ ءسوزىن.

ايتا كەتەيىك، العاشقى بيداي پارتياسى اقمولا وبلىسىنداعى استىق قابىلداۋ كاسىپورىندارىندا دايىندالعان. جالپى، ۆەتنامعا شامامەن 15 مىڭ توننا ازىقتىق بيداي جونەلتىلەدى دەپ جوسپارلانىپ وتىر.

«ازىق-تۇلىك كەلىسىمشارت كورپوراتسياسى» ۇ ك» ا ق باسقارما ءتوراعاسى اسىلحان جۇنىشيەۆتىڭ ايتۋىنشا، جاڭا لوگيستيكالىق باعىتتار قازاقستاندىق اگرارشىلار ءۇشىن الىس شەتەل نارىقتارىنا شىعۋعا جول اشىپ وتىر.

- قىتايلىق ارىپتەستەرمەن بىرلەسىپ قۇرىلعان ينفراقۇرىلىم بۇگىندە ناقتى ناتيجەسىن كورسەتىپ وتىر، بۇل تۇراقتى جانە جەدەل جەتكىزىلىم. بۇل ەلىمىزدىڭ ەكسپورتتىق الەۋەتىن دامىتۋداعى ماڭىزدى قادام، - دەدى كورپوراتسيا باسشىسى.

جىل باسىنان بەرى «ازىق-تۇلىك كەلىسىمشارت كورپوراتسياسى» ەكسپورتقا 196 مىڭ توننا استىق جونەلتتى. ەڭ ءىرى پارتيالار سولتۇستىك افريكا، وڭتۇستىك-شىعىس ازيا جانە يران نارىقتارىنا جىبەرىلدى.

ايتا كەتەلىك 36 قازاقستاندىق كاسىپورىن ەۋروپاعا ورگانيكالىق ءونىم ەكسپورتتاپ وتىرعانى تۋرالى جازعان ەدىك.