قازاقستان بيداي ەكسپورتى بويىنشا العاشقى 10 ەلدىڭ قاتارىنا كىرەدى

استانا. KAZINFORM - قازاقستان - استىق ەكسپورتى بويىنشا الەمدەگى كوشباسشىلاردىڭ ءبىرى. سوڭعى ءبىر جىلدا 7,6 ميلليون تونناعا جۋىق استىق ساتىلدى. ەلىمىزدىڭ اۋىل شارۋاشىلىعى مينيسترلىگىنىڭ مالىمەتى بويىنشا بۇل وتكەن جىلدىڭ سايكەس كەزەڭىمەن سالىستىرعاندا %58 ارتىق.

جالپى تۇراقتى نارىق تىزىمىندە 20 دان اسا ەل بار. وتاندىق ديقاندار بىلتىر وراق ناۋقانى اياقتالىسىمەن قامباعا تۇسكەن استىقتى ەكسپورتتادى. ماسەلەن، وتكەن جىلدىڭ قىركۇيەك ايىنان ءساۋىردىڭ سوڭىنا دەيىن 7 ميلليون 600 مىڭ توننا ءداندى داقىل ساتىلدى. ياعني ەكسپورت كولەمى %58 ءوستى. ونىڭ ىشىندە يرانعا ەكسپورت 16,5 ەسە ارتىپ، 889 مىڭ تونناعا جەتتى. ال ازەربايجانعا 113 ەسە ءوسىپ، 570 مىڭعا جۋىق توننا استىق ساتىپ الدى. تاجىكستانعا %51 ارتىپ، 1 ميلليون توننادان اسا بيداي ەكسپورتالعان. قازىر ەلىمىزدى بيدايمەن قاتار مايلى جانە بۇرشاق داقىلدارى نارىقتارىن كەڭەيتۋگە دەن قويىلدى. بۇل باعىتتا ءتيىستى كەلىسىمدەر جاسالدى.

قازاقستان بيداي ەكسپورتى بويىنشا العاشقى 10 ەلدىڭ قاتارىنا كىرەدى. بىلتىر سىرتقى نارىققا 10 ميلليون توننا بيداي شىعارىلدى. سونىڭ 3,3 ميلليون تونناسى وزبەكستانعا تيەسىلى. ياعني وڭتۇستىكتەگى كورشىمىز 600 ميلليون دوللار كولەمىندە ءداندى داقىل ساتىپ العان. جالپى سوڭعى جىلدارى قازاقستاندىق بيدايعا سۇرانىس جىلدان جىلعا ارتىپ كەلەدى. ساراپشىلار مۇنى ءداندى داقىل ساپاسىنىڭ جوعارى بولۋىمەن جانە لوگيستيكالىق باعىتتاردىڭ ءتيىمدى جەتىلدىرۋىمەن بايلانىستىرادى.

قازاقستاندىق استىقتى الدىراتىن ەلدەر قاتارى جىلدان جىلعا ارتىپ كەلەدى. وزبەكستاننان بولەك، تاجىكستان، قىتاي، يران، اۋعانستان جانە قىرعىزستان تۇراقتى تۇتىنۋشى سانالادى.