قازاقستان-بريتان تەحنيكالىق ۋنيۆەرسيتەتى مەملەكەتكە قالاي قايتارىلدى

الماتى. KAZINFORM - قازاقستان-بريتان تەحنيكالىق ۋنيۆەرسيتەتى مەملەكەت مەنشىگىنە وتكەن بولاتىن.

قارجى مينيسترلىگىنىڭ قارجىلىق ەسەپتىلىك دەپوزيتاريى سايتىندا جاريالانعان مالىمەتكە سايكەس، 2025 -جىلعى 27- اقپاننان باستاپ قازاقستان-بريتان تەحنيكالىق ۋنيۆەرسيتەتىنىڭ جاڭا اكسيونەرى رەتىندە «قايتارىلعان اكتيۆتەردى باسقارۋ كومپانياسى» ج ش س كورسەتىلگەن.

وسى ورايدا Kazinform اگەنتتىگى «قايتارىلعان اكتيۆتەردى باسقارۋ كومپانياسى» ج ش س- ىنا ساۋال جولداپ، قازاق-بريتان تەحنيكالىق ۋنيۆەرسيتەتى مەملەكەتكە قالاي قايتارىلعانىن سۇرادى.

- ق ب ت ۋ اكسيونەرىنىڭ وزگەرۋى زاڭدى كۇشىنە ەنگەن سوت اكتىلەرىنىڭ نەگىزىندە جۇزەگە اسىرىلدى. باسقارۋشى كومپانيانىڭ وكىلدەرى بۇل قۇجاتتارمەن تانىسىپ جاتىر. قازىرگى ۋاقىتتا ۋنيۆەرسيتەتتىڭ بولاشاق تاعدىرى بويىنشا شەشىم قابىلداۋ ماسەلەسى اشىق كۇيىندە قالىپ وتىر، - دەلىنگەن كومپانيا جاۋابىندا.

ەسكە سالايىق، عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا مەملەكەتكە قايتارىلىپ جاتقان قازاقستان-بريتان تەحنيكالىق ۋنيۆەرسيتەتىنىڭ كەلەشەگى تۋرالى پىكىر بىلدىرگەن بولاتىن.

ساياسات نۇربەك سوت شەشىمى شىققانشا قانداي دا ءبىر تولىققاندى مالىمەت بەرۋ قيىن ەكەنىن ەسكەرتتى.

- قازىر ول ۋنيۆەرسيتەت جابىلادى ەكەن، باسقالاي بولادى ەكەن دەپ ايتۋعا بولمايدى. ق ب ت ۋ يەسى اۋىسسا، تولىققاندى وزگەرەدى دەگەن اڭگىمە جوق. ۋنيۆەرسيتەتتىڭ باسشىلىعىمەن تىكەلەي بايلانىستامىز. جۇمىس جالعاسىپ جاتىر، دارىستەر ءجۇرىپ جاتىر. ەشقانداي بوگەت جوق. ەندى سوتتىڭ شەشىمىن كۇتۋىمىز كەرەك. قازىرگى تاڭدا تولىققاندى كوممەنتاري بەرە المايمىن. سوتتىڭ ناقتى شەشىمى شىقسىن. سىزگە ناقتى ايتايىن، بۇل ۋنيۆەرسيتەت بىزگە بەرىلە مە، الدە باسقا شەشىم بولا، ءالى شەشىلگەن جوق. سوت شەشىمى شىققاننان كەيىن تولىققاندى كوممەنتاري بەرۋگە دايىنبىز، - دەدى مينيستر.

اۆتور

دوسبول اتاجان