قازاقستان بەلارۋسكە 105 تاۋار پوزيتسياسى بويىنشا ەكسپورتتى ۇلعايتۋعا دايىن
استانا. KAZINFORM - قازاقستان رەسپۋبليكاسىنىڭ پرەمەر- ءمينيسترى ولجاس بەكتەنوۆ ەۋرازيالىق ۇكىمەتارالىق كەڭەس وتىرىسىنا قاتىسۋ ماقساتىندا مينسكىگە باردى، دەپ حابارلايدى ۇكىمەتتىڭ باسپا ءسوز قىزمەتى.
ساپار بارىسىندا بەلارۋس رەسپۋبليكاسىنىڭ پرەمەر- ءمينيسترى رومان گولوۆچەنكومەن ەكى مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى ىسكە اسىرۋ ماسەلەلەرى بويىنشا كەزدەسۋ ءوتتى.
ساۋدا-ەكونوميكالىق، ونەركاسىپ، اوك، تسيفرلاندىرۋ سالالارىنداعى ىنتىماقتاستىقتى نىعايتۋ، سونداي-اق مادەني-گۋمانيتارلىق ءوزارا ءىس-قيمىل ماسەلەلەرى تالقىلاندى.
ەكىجاقتى تاۋار اينالىمى بىلتىر $912 ميلليوندى قۇرادى. ساۋدا اعىندارىن ءارتاراپتاندىرۋ جانە جەتكىزىلەتىن تاۋارلار نومەنكلاتۋراسىن كەڭەيتۋ شارالارى قارالدى. قازاقستان شامامەن $265 ميلليون سوماسىنا 105 تاۋار پوزيتسياسى بويىنشا ەكسپورتتى ۇلعايتۋعا دايىن.
اۋىل شارۋاشىلىعى ماشينالارىن جاساۋ سالاسىنداعى بىرلەسكەن جوبالار - ەكىجاقتى ىنتىماقتاستىقتىڭ ماڭىزدى باعىتى. بۇگىنگى تاڭدا جالپى قۇنى $200 ميلليوننان اساتىن تراكتورلار مەن كومباينداردى جانە وزگە دە تەحنيكانى قۇراستىرۋ بويىنشا 11 جوبا ىسكە اسىرىلدى، 1,6 مىڭ جۇمىس ورنى اشىلعان. تاراپتار قازاق-بەلارۋس ارىپتەستىگىنىڭ قارقىندى دامۋىن قامتاماسىز ەتۋ ءۇشىن كوپ جوسپارلى جۇمىستى جالعاستىرۋ نيەتىن راستادى.
