قازاقستان بۇدان بىلاي شەتەلدە ەل مۇددەسىن قورعاۋعا وتاندىق زاڭگەرلەردى تارتادى
استانا. KAZINFORM - ق ر ادىلەت مينيسترلىگى شەتەلدەردە قازاقستاننىڭ مۇددەسىن قورعاۋعا وتاندىق زاڭگەرلىك كومپانيالاردى تارتۋدى جوسپارلاپ وتىر.
ادىلەت مينيسترلىگىندە ازامات ەسقارايەۆتىڭ توراعالىعىمەن قازاقستان ۇكىمەتىنىڭ مۇددەلەرىن شەتەلدە ءبىلدىرۋ جانە قورعاۋ ماسەلەلەرىنە ارنالعان تۇڭعىش حالىقارالىق پراكتيكالىق كونفەرەنتسيا ءوتتى.
ۆەدمستۆو باسشىسى ازامات ەسقارايەۆ ادىلەت مينيسترلىگى شەتەلدىك تورەلىكتەردە، مەملەكەتتىك جانە سوت ورگاندارىندا مەملەكەتتىڭ مۇددەلەرىن قورعاۋدى جانە ءبىلدىرۋدى قامتاماسىز ەتۋگە جاۋاپتى ورگان بولعاندىقتان، بيۋدجەت قاراجاتىن ءتيىمدى پايدالانۋ تۋرالى پرەزيدەنت بەلگىلەگەن باعىتتى ناتيجەلى تۇردە جۇزەگە اسىراتىنىن اتاپ ءوتتى.
ايتا كەتەيىك، بۇل ماسەلە قازاقستان تاۋەلسىزدىك العالى بەرى تۇڭعىش رەت كوتەرىلىپ وتىر.
ادىلەت مينيسترلىگىنىڭ باستاماسىمەن وتكىزىلگەن كونفەرەنتسياعا قازاقستاندىق زاڭ قوعامداستىعىنىڭ، ءبىرقاتار مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ نازارىن وزىنە اۋدارىپ، تۇيتكىلدى ماسەلەلەردى تالقىلاۋعا تۇرتكى بولدى.
كونفەرەنتسيادا سپيكەر رەتىندە Latham جانە Watkins؛ Sayat Zholshy جانە Partners؛ Tukulov ،Kassilgov ،Shaikenov Disputes؛ Curtis ،Mallet-Prevost ،Colt جانە Mosle ،White جانە Case سىندى جەتەكشى حالىقارالىق جانە قازاقستاندىق زاڭ فيرمالارىنىڭ وكىلدەرى ءسوز سويلەدى.
كونفەرەنتسيادا كوتەرىلگەن ماسەلەلەردىڭ نەگىزگى بولىگى اتالعان تاقىرىپ بويىنشا قازاقستاندىق زاڭ فيرمالارىنىڭ الەۋەتىن پايدالانۋ مۇمكىندىكتەرىن تالقىلاۋعا باعىتتالدى.
جيىندا بارلىق قاتىسۋشىلارعا ءوز باستامالارىن تانىستىرۋعا مۇمكىندىك بەرىلدى.
سونداي-اق سپيكەرلەر ادىلەت مينيسترلىگىنىڭ وكىلدەرىنە وزدەرىن قىزىقتىرعان سۇراقتارىن قويىپ، مازمۇندى جاۋاپتار الۋعا مۇمكىندىك تۋدى.
كونفەرەنتسياعا قاتىسۋشىلار ءىس-شارا ۇيىمداستىرۋشىلارىنا العىستارىن ءبىلدىرىپ، كوتەرىلگەن ماسەلەلەردىڭ وزەكتىلىگى مەن دەر كەزىندە كوتەرىلىپ وتىرعاندىعىن ايتىپ، وسى ماسەلەگە ءوز ۇلەستەرىن قوسۋعا دايىن ەكەندىگىن جەتكىزدى.
ايتا كەتۋ كەرەك كونفەرەنتسيادا ايتىلعان ماقسات-مىندەتتەردى ىسكە اسىرۋ، مەملەكەت مۇددەلەرىن قورعاۋعا قابىلەتتى ۇلتتىق كادرلار كورپۋسىن قالىپتاستىرۋعا نەگىز بولماق.
وعان قوسا، وسى ىسكە وتاندىق زاڭ فيرمالارىن تارتۋ سالىق تولەۋشىلەردىڭ قاراجاتىنىڭ قازاقستان ەكونوميكاسىندا قىزمەت ەتۋىنە سەپتىگىن تيگىزبەك.
اتالعان كونفەرەنسيانى جىل سايىن وتكىزۋ جوسپارلانىپ وتىر.
