داۋرەن نۇرالينوۆ Qazaqstan Barysy اتاندى
جارتىلاي فينالدا تۋرنيردىڭ 2017-جىلعى جەڭىمپازىن جارىستان شىعارعان جامبىلدىق عالىمجان قىرىقباي شىعىس قازاقستاندىق داۋرەن نۇرالينوۆقا ەسە جىبەردى. وسىلايشا وسىمەن ونىنشى رەت وتكەن تۋرنيردىڭ تاريحىنا جاڭا چەمپيوننىڭ اتى جازىلدى.
نەگىزگى ۋاقىتتى قارسىلاستار ءبىر-ءبىر بۇك ۇپايمەن اياقتاعان بولاتىن. «بەلدەسۋ» ساتىندە داۋرەن نۇرالينوۆ جامبىلدىق بالۋاندى «تازا جەڭىسپەن» ۇتىپ كەتتى. داۋرەن نۇرالينوۆ جارتىلاي فينالدا ماڭعىستاۋلىق نۇرداۋلەت جارىلعاپوۆتى جىققان بولاتىن.
ايتا كەتەيىك، تۋرنير قازاقستان رەسپۋبليكاسىندا ۇلتتىق سپورت تۇرلەرىن دامىتۋ ارقىلى سالاۋاتتى ءومىر سالتىن قالىپتاستىرۋ قاعيداتتارىن ناسيحاتتاۋ، جاستاردى ۇلتتىق سپورت تۇرلەرىمەن شۇعىلدانۋعا تارتۋ ارقىلى ولاردىڭ بويىندا وتانسۇيگىشتىك سەزىمدى قالىپتاستىرۋ، قازاق كۇرەسىن وركەندەتۋ ارقىلى ونى ۇلتتىق يدەيا دەڭگەيىنە جانە حالىقارالىق ارەناداعى بەدەلىن كوتەرۋ ماقساتىندا وتكىزىلدى.
ون جىل بويى ۇزدىكسىز ءوتىپ، ميلليونداعان كورەرمەندەردىڭ سۇيىكتى جوباسىنا اينالعان «قازاقستان بارىسى» تۋرنيرى - ۇلتتىق قۇندىلىقتاردىڭ توعىسقان ارناسى. تۋرنيردىڭ قۇرمەتتى قوناقتارى قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ، ق ر مادەنيەت جانە سپورت ءمينيسترى اقتوتى رايىمقۇلوۆا جانە نۇر-سۇلتان قالاسىنىڭ اكىمى التاي كولگىنوۆ قاتىسىپ، بالۋاندارعا ساتتىلىك تىلەدى.
ونىنشى رەت وتكەن باسەكەگە ەلىمىزدىڭ 14 وبلىسىنان، الماتى، شىمكەنت، نۇر-سۇلتان قالالارىندا ىرىكتەۋدەن وتكەن 36 ۇزدىك بالۋان قاتىستى، ونىڭ ىشىندە كۇش قۇرىلىمدارى اراسىندا وتكەن «اسكەر بارىسى» تۋرنيرىنىڭ جەڭىمپازدارى دا بار.
قاتىسۋشى بالۋانداردىڭ 11 ءى جوبادا تۇعىش رەت باق سىنادى. بالۋاندار Qazaq kuresi اسسوتسياتسياسى بەكىتكەن ەرەجەگە ساي كۇرەستى. تۋرنيردىڭ ەڭ اۋىر سالماقتى بالۋانى ە. قاجىبايەۆ 155 كەلى بولسا، ەڭ جەڭىل سالماقتا ەرسۇلتان مۇزاپپاروۆ 90 كەلى بولدى.
اقتىق بەلدەسۋدە شىعىس قازاقستان وبلىسى مەن جامبىل وبلىسىنىڭ بالۋانى كەزدەسىپ، بابى مەن باعى تەڭ تۇسكەن داۋرەن نۇرالينوۆ (ش ق و) - «قازاقستان بارىسى» اتاندى.
ال كۇمىس بەلبەۋدى عالىمجان قىرىقباي يەلەنسە، قولا بەلبەۋدى ماڭعىستاۋلىق نۇرداۋلەت جارىلعاپوۆ جەڭىپ الدى.
شارا اياسىندا سپورتتىق سايىستارمەن قاتار رامازان ستامعازيەۆ، قۋاندىق راحىم، «الاتاۋ سەرىلەرى» ەتنو-توبى ءان شىرقاپ، تىكەلەي ەفيردە ۇلتتىق كۇرەس جانكۇيەرلەرىنىڭ كوڭىلىن كوتەردى.
تۋرنيردى ق ر مادەنيەت جانە سپورت مينيسترلىگى، «نۇر-وتان» پارتياسى، نۇر-سۇلتان قالاسى اكىمدىگىنىڭ قولداۋىمەن Qazaq kuresi اسسوتسياتسياسى جانە «Qazaqstan Barysy» قازاق كۇرەسىن قولداۋ جانە دامىتۋ قورى ۇيىمداستىردى. سونداي-اق، «قازاق تەلەكوم» ا ق مەن «Magnum» قازاقستانداعى 1№ ساۋدا-بولشەك جەلىسى دەمەۋشىلىك جاسادى.
ونىنشى بارىسقا 25000000 تەڭگە جانە التىن بەلبەۋ مەن التىننان قۇيىلعان اۋىسپالى «تايتۇياقتى» Qazaq kuresi اسسوتسياتسياسى ءبىرىنشى ۆيتسە-پرەزيدەنتى سامات ءابىش تابىستادى.
ەكىنشى ورىن يەگەرى جامبىل وبلىسىنىڭ بالۋانىنا 5500000 تەڭگە جانە كۇمىس بەلبەۋ بەرىلدى.
ءۇشىنشى ورىن العان ماڭعىستاۋ وبلىسىنىڭ بالۋانى نۇرداۋلەت جارىلعاپوۆ 1800000 تەڭگە، سايكەسىنشە قولا بەلبەۋمەن ماراپاتتالدى.
بالۋانداردى ماراپاتتاۋ راسىمىنە قازاقستاننىڭ جاۋىنگەرلىك ونەر اسسوتسياتسياسىنىڭ پرەزيدەنتى ءانۋار سادىقۇلوۆ، قازاقستاننىڭ جاۋىنگەرلىك ونەر اسسوتسياتسياسىنىڭ ءبىرىنشى ۆيتسە- پرەزيدەنتى مالىك مۋرزالين، Qazaq kuresi اسسوتسياتسياسى باس حاتشىسى، «Qazaqstan Barysy» قازاق كۇرەسىن قولداۋ جانە دامىتۋ قوعامدىق قورى قامقورشىلىق كەڭەسىنىڭ ءتوراعاسى قۋانىشبەك ەسەكەيەۆ، نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ جانە «قازاقستان بارىسى» جوباسىنىڭ باس دەمەۋشىسى، ماگنۋم ساۋدا جەلىسىنىڭ باسقارما ءتوراعاسى ازامات وسمانوۆ قاتىسىپ، جارىس جەڭىمپازدارى مەن جۇلدەگەرلەرىن ارنايى ماراپاتتادى.
ەسكە سالساق، تاعى ءبىر Qazaqstan Barysy مۇحيت تۇرسىنوۆ تۋرنيردەن ءبىرىنشى اينالىمدا شىعىپ قالدى. تاعى ءبىر Qazaqstan Barysy ايبەك نۇعىماروۆ شيرەك فينالدا اقتوبەلىك ەلامان ەرعاليەۆتەن ۇتىلىپ قالعان بولاتىن.
