قازاقستان ازيانى بىرىكتىرەتىن مۋزىكالىق الاڭعا اينالادى
استانا. KAZINFORM - الداعى قاراشا ايىندا قازاقستاننىڭ ەلورداسى استانادا ازيا مەملەكەتتەرى اراسىندا العاش رەت «Silk Way Star» اتتى حالىقارالىق مۋزىكالىق بايقاۋ وتەدى.
اۋقىمدى جوبانىڭ اياسىندا ازيانىڭ 12 ەلىنەن تالانتتى ورىنداۋشىلار باق سىنايدى. بۇل تۋرالى «Jibek Joly» تەلەارناسىندا جوبانىڭ اتقارۋشى پروديۋسەرى مۇقاعالي قۋات ۇلى مەن شەف-رەداكتورى قاسىمحان الداشيەۆ مالىمدەدى.
بايقاۋ قازاقستان پرەزيدەنتىنىڭ تەلەراديوكەشەنى مەن قىتايدىڭ CMG مەدياكورپوراتسياسى اراسىنداعى ىنتىماقتاستىق اياسىندا ۇيىمداستىرىلادى. جوبا قىتايدىڭ ورتالىق تەلەارنالارىندا 105 مينۋتتان تۇراتىن 10 ەپيزود تۇرىندە كورسەتىلمەك.
- جوبانى استانادا وتكىزۋىمىزدىڭ باستى سەبەبى - ەلوردانى شەتەلدىك قاتىسۋشىلارعا كورسەتۋ. قاتىسۋشىلار 12 ەلدەن ىرىكتەلدى. ىرىكتەۋ پروتسەسى سول مەملەكەتتەردەگى قازاقستان ەلشىلىكتەرى جانە سول ەلدەردىڭ مادەنيەت باسقارمالارى ارقىلى جۇرگىزىلدى. جالپى سانى 80-گە جۋىق ءوتىنىم كەلىپ ءتۇستى. سونىڭ ىشىنەن ءوز وڭىرلەرىندە بەلگىلى بەلەسكە جەتكەن انشىلەر تاڭداپ الىندى. ءىس-شارا تەك ۆوكالدىق شەبەرلىكتى عانا ەمەس، ساحنالىق ونەر مەن ءارتيستيزمدى قاجەت ەتەتىن بايقاۋ. وسىنى ەسكەرە وتىرىپ، قازاقستان اتىنان Alem لاقاپ اتىمەن تانىلعان باتىرحان مالىكتى تاڭدادىق. ول - سوڭعى جىلدارى ەل ىشىندە جارقىراي تانىلعان دارىندى ورىنداۋشى، - دەدى مۇقاعالي قۋات ۇلى.
جوبانىڭ باستى ەرەكشەلىگى - بۇل قاراپايىم ءان بايقاۋى ەمەس، مادەني الماسۋ الاڭى. مۇندا ءتۇرلى ەكسپەريمەنتتەر جۇزەگە اسىرىلادى. ماسەلەن، شەتەلدەن كەلگەن ورىنداۋشىلار قازاقتىڭ تانىمال اندەرىن ءوز تىلدەرىندە شىرقايدى. سونىمەن قاتار، قازاقتىڭ حالىق اندەرى مەن حالىق كومپوزيتورلارىنىڭ شىعارمالارىن ورىندايدى. جوبانىڭ تاعى ءبىر ماڭىزدى تۇسى - شەتەلدىك انشىلەر مەن قازاقستاندىق جۇلدىزداردىڭ دۋەتتەرى، بۇل ءوز كەزەگىندە حالىقتار اراسىنداعى مادەني كوپىرگە اينالماق دەپ اتاپ ءوتتى جوبانىڭ شەف-رەداكتورى قاسىمحان الداشيەۆ.
- ءار ەلدەن ءبىر-بىردەن، جالپى 12 قازىلار القاسى جۇمىس ىستەيدى. ولار ءوز مەملەكەتتەرىندە تانىمال انشىلەر، پروديۋسەرلەر جانە مادەنيەت سالاسىنا ەڭبەگى سىڭگەن ماماندار، - قاسىمحان الداشيەۆ.
بۇعان دەيىن، استانادا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويعانىن جازعانبىز.
اۆتور
تاستان تويانوۆ
