قازاقستان ازەربايجانعا استىق ەكسپورتىن ارتتىرادى
استانا. KAZINFORM - قازاقستاندىق «اق بيداي- تەرمينال» ا ق مەن ازەربايجاننىڭ ءىرى حولدينگى NB Holding بىرلەسكەن باقىلاۋداعى «باكۋ استىق تەرمينالى» ج ش س كاسىپورنىن ودان ءارى دامىتۋ ماسەلەلەرىن تالقىلادى.
«اق بيداي- تەرمينال» ا ق باسقارما ءتوراعاسى نۇرلان ەرقوجا ۇلى باكۋ قالاسىنا جۇمىس ساپارى اياسىندا NB Holding باسشىلىعىمەن كەزدەسۋ وتكىزدى. سونىڭ بارىسىندا تەڭىز ارقىلى ازەربايجانعا استىقتى جەتكىزۋدى قامتاماسىز ەتۋ جايى، ۇن ونىمدەرىن وتكىزۋدىڭ ەكسپورتتىق باعىتىندا كاسىپورىننىڭ الەۋەتىن دامىتۋ ماسەلەلەرى تالقىلاندى.
كەزدەسۋدەن كەيىن تاراپتار بىرلەسە باقىلاناتىن كاسىپورىن - «باكۋ استىق تەرمينالى» ج ش س-عا باردى. وندا NB Holding باسشىلىعىمەن قول جەتكىزىلگەن كەلىسىمدەردى ءىس جۇزىندە جۇزەگە اسىرۋ جوسپارلارى ءسوز ەتىلدى. بىرلەسكەن ءىس-شارالار جوسپارىنا كاسىپورىندى استىقپەن ۇزدىكسىز قامتاماسىز ەتۋ، جوعارى ساپالى ۇن ونىمدەرىن شىعارۋ جانە ۇندى كورشىلەس نارىقتارعا ساتۋ كىرەدى.
«قاراشا ايىنىڭ سوڭىنا دەيىن قازاقستاندىق تاراپ باكۋ استىق تەرمينالىنىڭ ديىرمەن كەشەنىنە وڭدەۋگە جوعارى ساناتتى بيدايدىڭ 6 مىڭ توننا باستاپقى پارتياسىن جىبەرۋدى كوزدەپ وتىر. الداعى ۋاقىتتا تاياۋ شىعىس ەلدەرىنە اي سايىن 3 مىڭ تونناعا جۋىق ۇن جونەلتۋ جوسپارلانعان»، - دەدى نۇرلان ەرقوجا ۇلى.
ايتا كەتەيىك، «باكۋ استىق تەرمينالى» كاسىپورنى ءوزىنىڭ ديىرمەن كەشەنىندە ۇن وندىرەتىن امبەباپ استىق تەرمينالى.
وسىعان دەيىن ەلىمىزدە كوكتەمگى تاسقىنعا قاراماستان 26 ميلليون توننادان استام استىق جينالعانىن حابارلاعان ەدىك.
اۆتور
تالعاتجان مۇحامەتبەك ۇلى
