قازاقستان، ازەربايجان جانە وزبەكستان پرەزيدەنتتەرى ءۇش ەلدىڭ ەنەرگەتيكالىق جۇيەسىن ينتەگراتسيالاۋ جونىندەگى كەلىسىمگە قول قويدى
استانا. قازاقپارات - Cop29 دۇنيەجۇزىلىك كليمات سامميتىنىڭ اياسىندا مەملەكەتتەر باسشىلارى قاسىم-جومارت توقايەۆ، يلحام اليەۆ پەن شاۆكات ميرزيەيەۆ قازاقستان رەسپۋبليكاسى، ازەربايجان رەسپۋبليكاسى جانە وزبەكستان رەسپۋبليكاسى اراسىنداعى جاسىل ەنەرگيانى ءوندىرۋ جانە بەرۋ سالاسىنداعى ستراتەگيالىق سەرىكتەستىك تۋرالى كەلىسىمگە قول قويدى.
مەملەكەت باسشىسى بۇگىنگى ايتۋلى وقيعا ورنىقتى دامۋعا ورتاق ۇمتىلىس تاريحىنىڭ جاڭا پاراعىن اشقانىن اتاپ ءوتتى.
- ستراتەگيالىق سەرىكتەستىك تۋرالى كەلىسىمگە قول قويۋ - ورتالىق ازيا مەن وڭتۇستىك كاۆكاز وڭىرلەرىنىڭ ءۇشجاقتى ىنتىماقتاستىعىن دامىتۋداعى ماڭىزدى كەزەڭ. قۇجات ەلدەرىمىزدىڭ ەنەرگەتيكالىق جۇيەلەرىن ينتەگراتسيالاۋ، سونداي-اق ەۋروپا ەلدەرى مەن باسقا دا نارىقتارعا ەكولوگيالىق تازا ەنەرگيانى جەتكىزەتىن سەنىمدى دالىزدەردى قالىپتاستىرۋ ءۇشىن جاڭا مۇمكىندىكتەرگە جول اشادى. مۇندا قازاقستان ءىرى ترانزيت اۋماعى رەتىندە ۇلكەن ءرول اتقارادى. اتالعان كەلىسىمنىڭ ناقتى ناتيجەلەرى ءۇش ەلدىڭ ەكونوميكالارىن بىرىكتىرىپ، ورتا ءدالىزدى «جاسىل كوپىر» رەتىندە دامىتۋعا ىقپال ەتەدى. بۇل ماڭىزدى سالاداعى تىعىز ىنتىماقتاستىق مەملەكەتتەر اراسىنداعى تاجىريبە مەن وزىق تەحنولوگيالاردى الماسۋعا سەرپىن بەرەدى، سونداي-اق ەنەرگەتيكالىق قاۋىپسىزدىگىمىزدى نىعايتۋعا سەپتىگىن تيگىزەدى، - دەدى پرەزيدەنت.
قاسىم-جومارت توقايەۆتىڭ ايتۋىنشا، كومىرتەگى بەيتاراپتىعىنا جەتۋدى كوزدەيتىن قازاقستان ءۇشىن جاسىل ەنەرگەتيكا ماڭىزدى باعىت سانالادى.
- ءبىز قازبا بايلىقتارعا تاۋەلدىلىكتى ازايتۋعا بەلسەندى تۇردە كىرىستىك. تەحنولوگيالىق يننوۆاتسيالاردى دامىتىپ، ەكولوگيالىق ورنىقتى وركەندەۋگە دەمەۋ بولاتىن ينفراقۇرىلىم قۇرۋعا بەت بۇردىق. قازاقستان شەتەلدىك سەرىكتەستەرمەن جالپى قۋاتى 43 گ ۆت بولاتىن «جاسىل» جوبالاردى جۇزەگە اسىرۋ جونىندە ۋاعدالاستىققا قول جەتكىزدى، - دەدى مەملەكەت باسشىسى.
ازەربايجان پرەزيدەنتى يلحام اليەۆ بۇگىنگى كەلىسىمدەر ءۇش مەملەكەت اراسىنداعى باۋىرلاستىق قاتىناستار مەن ستراتەگيالىق سەرىكتەستىكتى جاڭا دەڭگەيگە شىعاراتىنىن اتاپ ءوتتى.
- ورتالىق ازيا مەن كاۆكاز ءوڭىرى كوپتەگەن ماسەلە بويىنشا، سونىڭ ىشىندە «جاسىل» ەنەرگيانى دامىتۋ سالاسىندا بىرلەسىپ ارەكەت ەتەدى. ءبىز قايتا جاڭعىرتىلاتىن ەنەرگيا كوزدەرى باعىتىندا قازاقستان مەن وزبەكستاننىڭ اۋقىمدى جوسپارلارى مەن قول جەتكىزگەن جەتىستىكتەرى جايىندا جاقسى بىلەمىز، - دەدى ازەربايجان پرەزيدەنتى.
وزبەكستان پرەزيدەنتىنىڭ پىكىرىنشە، بۇگىنگى كەلىسىم ەكونوميكالىق ماقساتتى عانا كوزدەمەيدى، بۇل - بولاشاققا قوسىلعان ورتاق ۇلەس.
- اتالعان جوبانىڭ ەكولوگيالىق ماڭىزىن ەرەكشە اتاپ وتكىم كەلەدى. جەلدەن، كۇننەن الىناتىن قۋات كليماتتىڭ جۇمسارۋىنا اسەر ەتەدى. وسى ارقىلى ءبىز پاريج كەلىسىمى اياسىندا كليماتتى قورعاۋ جونىندە بىرلەسكەن كۇش-جىگەرگە قولداۋ ءبىلدىرىپ، ورنىقتى دامۋ ماقساتتارىنا قول جەتكىزۋگە اتسالىسامىز، - دەدى شاۆكات ميرزيەيەۆ.
ءىس-شارادا مەملەكەتتەر باسشىلارىنىڭ قاتىسۋىمەن قازاقستاننىڭ ەنەرگەتيكا ءمينيسترى الماسادام ساتقاليەۆ، ازەربايجاننىڭ ەنەرگەتيكا ءمينيسترى پارۆيز شاحبازوۆ، وزبەكستاننىڭ ەنەرگەتيكا ءمينيسترى جۋرابەك ميرزاماحمۋدوۆ جانە ساۋد ارابياسىنىڭ ەنەرگەتيكا ءمينيسترى ابدەل ازيز بەن سالمان ءال ساۋد جاسىل ەنەرگيانى دامىتۋ جانە بەرۋ سالاسىنداعى ىنتىماقتاستىق تۋرالى اتقارۋشى باعدارلاماعا قول قويدى.
