قازاقستان، ازەربايجان جانە وزبەكستان اراسىندا تۋريستەر الماسۋ قارقىن الىپ جاتىر
استانا. KAZINFORM - ازەربايجاننىڭ تۋريزم جونىندەگى مەملەكەتتىك اگەنتتىگى قازاقستان مەن وزبەكستان جەتەكشى تۋريستىك كومپانيالارىنىڭ وكىلدەرى ءۇشىن تانىستىرۋ ساپارىن ۇيىمداستىردى، دەپ حابارلايدى Kazinform مەنشىكتى ءتىلشىسى ۆەدومستۆوعا سىلتەمە جاساپ.
باستاما ەلدىڭ تۋريستىك الەۋەتىن ىلگەرىلەتۋگە جانە ورتالىق ازيادان تۋريستەردىڭ كوبىرەك اعىنىن تارتۋعا باعىتتالعان.
ساپار اياسىندا ازەربايجان تۋريستىك كومپانيالارى مەن قوناق ءۇي بيزنەسىنىڭ 60-تان استام وكىلدەرى قاتىسقان B2B كەزدەسۋ ءوتتى. وسىنداي فورمات نارىق قاتىسۋشىلارى اراسىندا تىكەلەي بايلانىس ورناتۋعا جانە بىرلەسكەن جوبالاردى دامىتۋ پەرسپەكتيۆالارىن تالقىلاۋعا مۇمكىندىك بەردى.
ورتالىق ازيادان كەلگەن قوناقتار بىرنەشە جەرگە باردى، سونىڭ ىشىندە باكۋ، شاماحى مەن باسكالدا بولدى. ساپار بارىسىندا ولار نەگىزگى تۋريستىك ونىمدەر، قوناقۇي ينفراقۇرىلىمى جانە ۇسىنىلاتىن قىزمەت تۇرلەرىمەن، سونىڭ ىشىندە كاسپي جاعالاۋىنداعى جاعاجاي دەمالىسىمەن تانىستى.
ۆەدومستۆو مالىمەتىنشە، 2025 -جىلدىڭ ءبىرىنشى جارتىجىلدىعىندا ازەربايجانعا قازاقستان مەن وزبەكستاننان كەلگەن تۋريستەر سانى 68 مىڭ ادامنان استى، بۇل وتكەن جىلدىڭ سايكەس كەزەڭىمەن سالىستىرعاندا 15 پايىزعا ارتىق. قازىرگى ۋاقىتتا ازەربايجان مەن ەكى ەل اراسىندا تىكەلەي اۋە قاتىناسى ورناتىلدى: رەيستەر قازاقستاننىڭ ءتورت قالاسىنان جانە وزبەكستاننىڭ ەكى قالاسىنان ورىندالىپ جاتىر.
ساراپشىلاردىڭ پىكىرىنشە، قازاقستان جانە وزبەكستانمەن ىسكەرلىك جانە مادەني الماسۋدىڭ بەلسەندىرىلۋى ازەربايجاننىڭ تۋريزم سەكتورىنىڭ تۇراقتى وسۋىنە جانە ونىڭ ايماقتىق نارىقتاعى پوزيتسياسىنىڭ نىعايۋىنا ىقپال ەتەدى.
بۇعان دەيىن كولىك جانە لوگيستيكا سالاسىنداعى ازەربايجاندىق ساراپشى قازاقستاننىڭ اقتاۋ پورتى مەن ازەربايجان استاناسى باكۋ اراسىندا كاسپي تەڭىزى ارقىلى جوعارى جىلدامدىقتى جولاۋشىلار تاسىمالى قىزمەتىن ىسكە قوسۋدىڭ اۋقىمدى جوباسىن ۇسىنعان بولاتىن.
