قازاقستان ازاماتتىعىن الۋعا ۇمىتكەرلەر ءۇشىن ماڭىزدى اقپارات

استانا. KAZINFORM - قازاقستان رەسپۋبليكاسىنىڭ ازاماتتىعىن الۋعا ۇمىتكەرلەر ءۇشىن تەستىلەۋگە وتىنىشتەردى قابىلداۋ 3-13-ناۋرىز ارالىعىندا وتەدى. بۇل تۋرالى ۇلتتىق تەستىلەۋ ورتالىعى حابارلادى.

تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا نەمەسە UTO قوسىمشاسى ارقىلى جۇرگىزىلەدى.

تەستىلەۋدىڭ ءوزى 15-ناۋرىزدا وتەدى.

- تەستىلەۋ 3 بولىمنەن تۇرادى: تىلدىك ءبىلىمدى باعالاۋ جۇيەسىنىڭ قاراپايىم دەڭگەيى بويىنشا قازاق ءتىلىن ءبىلۋىن انىقتاۋعا ارنالعان تەست (قازاق تىلىندە) - 60 تاپسىرما، شەكتى بال - 36؛ قازاقستان رەسپۋبليكاسى كونستيتۋتسياسىنىڭ نەگىزدەرى بويىنشا تەست (قازاق نەمەسە ورىس تىلىندە) - 15 تاپسىرما، شەكتى بال - 9؛ قازاقستان تاريحى بويىنشا تەست (قازاق نەمەسە ورىس تىلىندە) - 25 تاپسىرما، شەكتى بال - 15. ەڭ جوعارى بال – 100، شەكتى بال - 60. تەستىلەۋ ۋاقىتى - 2 ساعات 10 مينۋت. مۇمكىندىگى شەكتەۋلى (مۇگەدەكتىگى بار) تۇلعالارعا تەستىلەۋ تاپسىرۋ ءۇشىن قوسىمشا 30 مينۋت بەرىلەدى، - دەلىنگەن ۇلتتىق تەستىلەۋ ورتالىعى حابارلاماسىندا.

تولىق اقپارات testcenter.kz سايتىندا «ازاماتتىق الۋعا ۇمىتكەرلەرگە» بولىمىندە قولجەتىمدى. سونداي-اق، سايتتا تەگىن بايقاۋ سىناعى ۇسىنىلعان.