قازاقستان ايەلدەر قۇراماسى شورت-ترەكتەن ءتورت قۇرلىق چەمپيوناتىندا ۇزدىك ۇشتىككە ەندى

كانادانىڭ لاۆال قالاسىندا شورت-ترەكتەن وتكەن ءتورت قۇرلىق چەمپيوناتىندا قازاقستان ايەلدەر قۇراماسى ۇزدىك ۇشتىككە ىلىكتى، دەپ حابارلايدى Kazinform.

قازاقستاندىق قىزدار 3 مىڭ مەترلىك ەستافەتا جارىسىندا 4:16.200 ناتيجەمەن مارە سىزىعىن ءۇشىنشى بولىپ قيدى. ەل نامىسىن يانا حان، ماليكا ەرمەك، الينا اجىعاليەۆا، ءمادينا جانبوسىنوۆا جانە ولگا تيحونوۆا قورعادى.

كانادالىقتار (4:14.513) جەڭىمپاز اتانسا، وڭتۇستىك كورەيالىقتار (4:14.567) كۇمىس جۇلدەگە قول جەتكىزدى. ءتورت قۇرلىق چەمپيوناتىنا ەۋروپا قۇرامالارى قاتىسپايدى.

شورت-ترەكتەن ب ق و قۇراماسىنىڭ اعا باپكەرى، قازاقستاننىڭ ەڭبەك سىڭىرگەن جاتتىقتىرۋشىسى ماكسيم لوزوۆويدىڭ ناقتىلاۋىنشا، ايتۋلى دودادا ارگەنتينا، اۋستراليا، كانادا، قىتاي، جاپونيا، وڭتۇستىك كورەيا، جاڭا زەلانديا، ا ق ش جانە قازاقستان شورتترەكشىلەرى باق سىنادى.

قازاقستان تورتتىگىنىڭ قۇرامىندا باتىس قازاقستاندىق الينا اجىعاليەۆا دا ونەر كورسەتتى. الينا اجىعاليەۆا 2005-جىلى 8- قازاندا ورال قالاسىندا دۇنيەگە كەلدى. شورت-ترەكتەن حالىقارالىق دارەجەدەگى سپورت شەبەرى. 2020-2023-جىلدار ارالىعىندا ق ر سپارتاكياداسىنىڭ جەڭىمپازى، ەل بىرىنشىلىگىنىڭ جۇلدەگەرى اتانىپ ۇلگەردى. سونداي-اق 2023-جىلى قىسقى ۋنيۆەرسيادانىڭ قولا جۇلدەگەرى بولدى.

«الينا ەندى نيدەرلاندتا لەۋۆاردەن قالاسىندا جاستار اراسىندا وتەتىن الەم كۋبوگى كەزەڭىنە قاتىسادى»، - دەدى م. لوزوۆوي.

ەسكە سالا كەتەيىك، بۇدان بۇرىن شورت-ترەكتەن قازاقستان قۇراماسىنىڭ الەم كۋبوگى كەزەڭىندە قولا جەڭىپ العانىن جازعان بولاتىنبىز.