قازاقستان اۋىلدارىنداعى ينتەرنەت ماسەلەسى ەكى جىلدا تولىق شەشىلەدى - پرەزيدەنت كەڭەسشىسى
استانا. KAZINFORM - الداعى 2-3 جىلدا قازاقستان اۋىلدارىنداعى ينتەرنەت ساپاسى ماسەلەسى تولىعىمەن شەشىلەدى.

بۇل تۋرالى ق ر پرەزيدەنتىنىڭ كەڭەسشىسى قۋانىشبەك ەسەكەيەۆ «Jibek Joly» تەلەارناسىنداعى «ۋادە» باعدارلاماسىندا ايتتى جانە سپۋتنيك تەحنولوگيالارىن دامىتۋ مەن بايلانىس نارىعىنداعى باسەكەلەستىك احۋالىنا پىكىرىن ءبىلدىردى.
كەي اۋىلداردا نەگە ينتەرنەت جوق
ق. ەسەكەيەۆتىڭ ايتۋىنشا، ۇيالى بايلانىس سيگنالى بازالىق ستانتسيالار ارقىلى جۇمىس ىستەيدى، بۇل ستانتسيالار ەنەرگەتيكالىق ينفراقۇرىلىمعا تاۋەلدى.
− ابونەنت الاتىن كەز كەلگەن سيگنال بازالىق ستانتسيالاردىڭ ورناتىلۋىنا بايلانىستى. ءبىز قازىر وتىرعان عيماراتتا ءسىزدىڭ ۇيالى تەلەفونىڭىزعا شامامەن 3-4 بازالىق ستانتسيا سيگنال بەرەدى. اۋىلدارداعى بايلانىس ماسەلەسى بازالىق ستانتسيا سالۋ ءۇشىن ەنەرگەتيكانىڭ قاجەتتىگىمەن بايلانىستى. تەلەكوممۋنيكاتسيا يندۋسترياسى، اسىرەسە ۇيالى بايلانىس تىكەلەي ەنەرگەتيكاعا تاۋەلدى، سەبەبى سيگنال بەرەتىن راديو بولىگى ەلەكتر قۋاتىنسىز جۇمىس ىستەمەيدى، - دەپ ءتۇسىندىردى كەڭەسشى.
سونىمەن بىرگە، باعدارلاما قوناعى بازالىق ستانتسيالاردى پايدالانۋ جەرگىلىكتى جەر بەدەرىنە دە بايلانىستى ەكەنىن ايتتى.
− مىسالى، تاۋلى جەر بەدەرىندە بازالىق ستانتسيالاردى پايدالانۋ قيىن. سوندىقتان بايلانىستىڭ اۋقىمى - ۇنەمى نازاردا بولاتىن ماسەلە. قازىر ەل اۋماعىنىڭ نەگىزگى بولىگىندە 3G سيگنالى بار. ءبىراق تۇتىنۋشىلار قالىپتاسقان داعدىسىمەن 4G سيگنالىن تالاپ ەتەدى. سول سەبەپتى 4G سيگنالىمەن قامتۋدى ءاردايىم ۇلعايتىپ وتىرۋعا تۋرا كەلەدى. ءدال وسىنداي ماسەلە قالالارداعى «سۇر ايماقتاردا» دا بار. مىسالى، كولىك كەپتەلىسىندە ءتورت ادام وتىرسا، ولاردىڭ ۇشەۋى %90 جاعدايدا تەلەفون قاراپ وتىرادى. كولىكتەر سانى كوپ بولسا، بازالىق ستانتسيانىڭ جۇكتەمەسى دە ارتادى. سول سەبەپتى جوعارى جۇكتەمە بولعان ايماقتاردا باسقا ابونەنتتەردىڭ سيگنال دەڭگەيى تومەندەي باستايدى، - دەدى ق. ەسەكەيەۆ.
ونىڭ ايتۋىنشا، قازىر ءبىر ادامعا شاققانداعى تۇتىنۋ كولەمى ورتا ەسەپپەن %30 عا ارتقان. سوندىقتان بۇل جۇمىس ۇزدىكسىز جۇرگىزىلۋدە، وعان مەملەكەت ءتۇرلى جولدارمەن قارجى ءبولىپ وتىر.
StarLink ماسەلەسىن شەشە الا ما
كەڭەسشىنىڭ پىكىرىنشە، Starlink سياقتى تومەن وربيتالىق سپۋتنيكتەردى دامىتۋ اۋىلدىق جەرلەردەگى ينتەرنەت ماسەلەسىن شەشۋگە ايتارلىقتاي ىقپال ەتۋى مۇمكىن.
− StarLink - قانداي دا ءبىر تەرمينالعا سيگنال جىبەرەتىن تومەن وربيتالىق سپۋتنيكتەر توبى. مۇنداي تەرمينالدار قازىر شامامەن 2000 مەكتەپكە ورناتىلۋدا، ولار سەكۋندىنا 200 مەگابيت جىلدامدىقتى قامتاماسىز ەتەدى. ورتا ەسەپپەن ءبىر سىنىپ ابونەنتى شامامەن 10 مەگابيت جىلدامدىق تۇتىنا الادى. ەگەر 5G ستاندارتى ەنگىزىلسە، ول قالالىق ينتەرنەت ماسەلەسىنىڭ ءبىر بولىگىن شەشەدى. ال اۋىلدىق جەرلەرگە كەلسەك، مەنىڭ ويىمشا، 2-3 جىلدا تومەن وربيتالىق سپۋتنيكتەر بۇل ماسەلەنى وتە تەز شەشەدى. ەستەرىڭىزدە بولسا، تەلەديدار ماسەلەسىن دە سپۋتنيكتىك تەلەديدار تەز ارادا شەشكەن ەدى. جالپى العاندا، اۋىلعا سيگنال جەتكىزۋگە بولادى، ءبىراق وزىندىك قۇن ماسەلەسى تۋىندادى جانە StarLink بۇل وزىندىك قۇندى بىرنەشە ەسە تومەندەتتى، - دەپ اتاپ ءوتتى كەڭەسشى.
سونداي-اق، سپيكەر Amazon مەن OneWeb كومپانيالارى دا وسىنداي سپۋتنيكتەردى ازىرلەپ جاتقانىن، بۇل نارىقتىڭ بەلسەندى دامۋىنا ىقپال ەتەتىنىن ايتتى.
«قازاق تەلەكوم» مونوپوليست پە
- قازاقتەلەكومنىڭ مونوپوليست ەكەنى جونىندە وتە كەڭ تاراعان پىكىر بار. بالكىم، بۇل ەسكى بايلانىس مينيسترلىگىنەن مۇرا بولىپ قالعان ينفراقۇرىلىمنىڭ مونوپوليسى شىعار. بارلىعى «قازاق تەلەكومدى» كابەلدىك كاناليزاتسيالارى ارقىلى مونوپوليست بولدى دەپ ەسەپتەيدى. ءبىراق «قازاق تەلەكوم» قۇرىلعاندا بۇل كاناليزاتسيالار تولىعىمەن جارامسىز كۇيدە بولدى. ءىس جۇزىندە كومپانيا كومانداسى ولاردى رەتكە كەلتىردى، - دەپ پىكىر ءبىلدىردى ەسەكەيەۆ.
ونىڭ ايتۋىنشا، قىزمەتتەر سەگمەنتىندە قازىرگى نارىق ايتارلىقتاي باسەكەگە قابىلەتتى.
- مىسالى، ۇيدەگى ينتەرنەت باعىتىندا Beeline بار. وندا كاسىبي كوماندا جۇمىس ىستەيدى، بەلسەندى ەمەس دەپ ايتۋعا بولمايدى. بۇل رەتتە «قازاقتەلەكوم» ينفراقۇرىلىمىن بۇرىننان قالىپتاستىرعان. مىسالى، مەگالاين دامىعان ساتتە «مەگالاين» مەن «ينتەرنەت» سينونيمگە اينالدى. ادامدار «قازاق تەلەكوم» بار دەپ ۇيرەنىپ قالعان جانە ۇيرەنگەن كومپانياسىنا سىن ايتادى. ارينە، «قازاق تەلەكوم» ءاردايىم ساپا مەن قىزمەت كورسەتۋ تۇرعىسىنان كوشباسشى بولدى. ءبىراق موبيلدى سەگمەنتتە دە ۇلكەن باسەكە بار. Beeline جاقسى قىزمەت ۇسىنادى، ولاردىڭ Izi اتتى قوسىمشا برەندى دە بەلسەندى جۇمىس ىستەپ جاتىر. بۇل جەردە باسەكەلەستىك ايقىن، - دەپ ەسەپتەيدى كەڭەسشى.
ول سونداي-اق Kcell جانە Tele2 موبيلدى وپەراتورلارىن ساتىپ الۋ پروتسەسىن ءتۇسىندىردى.
- 2012-جىلى «قازاق تەلەكوم» Altel-دەن باسقا بارلىق ۇيالى اكتيۆتەردەن شىقتى. Altel-4G تاريحى باستالعان 2015-2016-جىلدارى Altel مەن Tele2 بىرىكتى. سول كەزدە نارىقتا 4 ۇيالى بايلانىس وپەراتورى بولدى. Altel نارىقتىڭ %2 ىن عانا قامتىدى، «قازاق تەلەكوم» ونى نارىقتا ورنىققان وپەراتورعا اينالدىرۋ ءۇشىن ۇلكەن قادامدار جاسادى. Tele2-مەن بىرىگىپ، %12 نارىقتىق ۇلەسكە قول جەتكىزدى. كەيىنىرەك بۇل ۇلەستى شامامەن %30 عا جەتكىزدىك. ودان كەيىن Kcell ءدى ساتۋ ماسەلەسى تۋىندادى. فين كومپانياسى نارىقتان شىعۋدى قالادى جانە 75 پايىزىن ساتتى. ونى ەشقانداي ويىنشى ساتىپ المادى جانە 3 جىل بويى اكتيۆتەر بوس تۇردى، سودان كەيىن ءبىزدىڭ كومپانيا وسى ساۋداعا قاتىستى جانە ماركانى ساتىپ الدى. وسىلايشا نارىقتا دۋوپوليا پايدا بولدى. رەتتەۋشى ءبىزدىڭ باسقارۋدا تاۋەلسىز جاعداي بولۋى كەرەك دەگەن شارت قويدى، ءبىز ونى ورىندادىق. سونداي- اق تاريفتەردىڭ تاۋەلسىزدىگى ساقتالۋى ءتيىس ەدى، بۇل تالاپتى دا ورىندادىق. سوڭعى جىلدارى ءبىز 5G ەنگىزگەندە Altel ،Tele2 ،Kcell بىرگە جۇمىس ىستەي باستادى. رەتتەۋشى وپەراتورلاردىڭ ءبىرىن ساتۋدى تالاپ ەتتى. قازىر قاتار حولدينگى Altel مەن Tele2 ءنى ساتىپ الماق، - دەپ ءتۇسىندىردى ق. ەسەكەيەۆ.
ءسوز سوڭىندا ول «قازاق تەلەكوم» دۋوپوليا قۇرماعانىن جانە قازىرگى جاعدايىندا بۇل سەگمەنتتە باسەكەلەستىك تۋعىزىپ وتىرعانىن اتاپ ءوتتى.
بۇعان دەيىن قۋانىشبەك ەسەكەيەۆ شەتەلدىك ءىرى سپۋتنيك وپەراتورلارىن قازاقستاندا لوكاليزاتسيالاۋدىڭ ماڭىزدىلىعىن جانە تەلەكوممۋنيكاتسيالار تۋرالى زاڭدى قابىلداۋدا كەشىكپەۋ كەرەگىن ايتتى.