قازاقستان اۋىلدارىندا حالىقتىڭ 37 پايىزى قالدى
استانا. KAZINFORM - «اۋىل» پارتياسىنىڭ باستى ماقساتى - ەلدى اگرارلىق دەرجاۆاعا اينالدىرۋ. بۇل تۋرالى پارتيا ءتوراعاسى، ماجىلىستەگى اگرارلىق ماسەلەلەر كوميتەتىنىڭ ءتوراعاسى سەرىك ەگىزبايەۆ «اۋىل» پارتياسىنىڭ 25 جىلدىعىنا ارنالعان عىلىمي-پراكتيكالىق كونفەرەنسيادا ايتتى.
- اۋىل مەن اگرارلىق سەكتوردى دامىتۋ - ءبىزدىڭ قىزمەتىمىزدىڭ باستى باعىتى بولىپ قالا بەرەدى. تاۋەلسىزدىكتىڭ العاشقى جىلدارى ويلاستىرىلماعان جاپپاي جەكەشەلەندىرۋ الەۋمەتتىك جانە ەكونوميكالىق كۇيزەلىستەرگە الىپ كەلدى جانە اگرارلىق سالانى دا قامتىدى. ءتيىمسىز رەفورمالار سالدارىنان قازاقستان كارتاسىنان 1,5 مىڭنان استام اۋىل جويىلىپ كەتتى. اۋىل تۇرعىندارىنىڭ، اسىرەسە جاستاردىڭ قالالارعا جاپپاي كوشۋى كۇشەيىپ وتىر. قازىر اۋىلدا حالىقتىڭ 37 پايىزدان از بولىگى تۇرادى، وكىنىشكە قاراي، بۇل ءۇردىس ارتىپ كەلەدى. ال 90-جىلداردىڭ باسىندا اۋىل تۇرعىندارىنىڭ ۇلەسى %60 دان اساتىن، - دەدى سەرىك ەگىزبايەۆ.
پارتيا ءتوراعاسى قازاقستاننىڭ بۇرىنعىداي اگرارلىق ەلگە اينالۋى كەرەكتىگىن باسا ايتتى. بۇل ۇستانىم ەل پرەزيدەنتىنىڭ ستراتەگيالىق باعىتىمەن تولىق سايكەسەدى.
- قازاقستان اۋماعى بويىنشا الەمدە 9-ورىندا، ال اۋىل شارۋاشىلىعى جەرىنىڭ كولەمى بويىنشا 6-ورىندا ەكەنىن ءجيى ايتامىز. الايدا وسىنداي مول رەسۋرسقا يە بولا وتىرىپ، اۋىل شارۋاشىلىعىنىڭ جالپى ىشكى ونىمدەگى ۇلەسى جونىنەن الەمدىك رەيتينگتە تەك 43-ورىندامىز. بۇل كورسەتكىش بويىنشا جەرى مەن رەسۋرستىق مۇمكىندىكتەرى بىزدەن الدەقايدا از كورشى ەلدەر الدىمىزدا تۇر، - دەدى سپيكەر.
ەسكە سالساق، بيىل ەلىمىزدە اراعا 18 جىل سالىپ اۋىل شارۋاشىلىعى ساناعى وتەدى. ساناقتىڭ نەگىزگى كەزەڭى 1-تامىز بەن 20-قازان ارالىعىن قامتيدى. ول ونلاين جانە وفلاين كەزەڭدەرگە بولىنەدى. ەڭ الدىمەن 1-31-تامىز ارالىعىندا sanaq.gov.kz. سايتىندا ونلاين-ساۋالناما جۇرگىزىلەدى.
