قازاقستان استىعىن رەسەيگە ەكسپورتتاۋ توقتاي ما

استانا. KAZINFORM – ق ر اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى روس سەلحوزنادزوردىڭ قازاقستاننان رەسەيگە استىق، قىزاناق، كۇنباعىستى ەكسپورتتاۋدى توقتاتا تۇرۋ تۋرالى وتىنىشىنە قاتىستى پىكىر ءبىلدىردى.

بۇل تۇرعىدا كورشى مەملەكەت قازاقستان ونىمدەرىندە زيانكەستەر مەن باكتەريالاردى انىقتاۋ جاعدايلارى كوبەيگەنىن العا تارتىپ وتىر.

ءوز كەزەگىندە ە. كەنجەحان ۇلى بيىل قىركۇيەك ايىنىڭ ورتاسىندا روس سەلحوزنادزوردان ءوتىنىش تۇسكەنىن راستادى.

«اتاپ ايتقاندا، ءبىزدىڭ مينيسترلىك روس سەلحوزنادزوردان انىقتالعان كەمشىلىكتەردى راستايتىن دەرەكتەردى ۇسىنۋدى سۇرادى. ياعني وسىنداي جاعدايدىڭ (وتاندىق ونىمدە زيانكەستەردىڭ انىقتالۋى) شىنىمەن ورىن العانىنا كوز جەتكىزۋىمىز قاجەت. انىقتالعان زەرتتەۋلەر مەن وسى جۇمىستاردىڭ ناتيجەلەرى بويىنشا ءتيىستى اكتىلەردى سۇرادىق. دەگەنمەن، رەسەيلىك جاقتان ءتيىستى جاۋاپ ءالى بولمادى»، - دەدى ۆيتسە-مينيستر سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

وسى ورايدا ول كورشى ەلدىڭ جاۋاپتى ۇيىمىنان ناقتى جاۋاپ كەلگەننەن كەيىن، بۇل باعىتتا ءتيىستى جۇمىستار اتقارىلاتىنىن ايتتى.

«ءبىزدىڭ زەرتحانالار حالىقارالىق ستاندارتتارعا سايكەس كەلەدى جانە زيانكەستەردى تولىقتاي انىقتاپ جاتادى. ەكسپورتتاۋ كەزىندە ءبىزدىڭ جاقتان تالاپتاردى بۇزۋ دەرەكتەرى انىقتالمادى. سوندىقتان ءبىز روس سەلحوزنادزوردان قوسىمشا اقپارات سۇرادىق»، - دەدى ەرمەك كەنجەحان ۇلى.

ەسكە سالا كەتەيىك، بيىل تامىز ايىندا 2024 -جىلعى 31 -جەلتوقسانعا دەيىن بيدايدى قازاقستان رەسپۋبليكاسىنىڭ اۋماعىنا كولىكتىڭ بارلىق تۇرىمەن اكەلۋگە تىيىم سالۋ تۋرالى شەشىم قابىلداندى.

اۆتور

رۋسلان عابباسوۆ