قازاقستان استىعى مەن كوكونىسكە رەسەيدىڭ ۋاقىتشا تىيىمىنىڭ اسەرى قانداي
استانا. KAZINFORM - ق ر پرەمەر-ءمينيستردىڭ ورىنباسارى سەرىك جۇمانعارين روسسەلحوزنادزوردىڭ قازاقستاننان رەسەيگە استىق، قىزاناق، كۇنباعىستى ەكسپورتتاۋدى توقتاتا تۇرۋ تۋرالى شەشىمىنە قاتىستى پىكىر ءبىلدىردى.
«ەلىمىزدە كارانتيندىك وبەكتىلەر بار، سونىڭ نەگىزىندە رەسەي قازاقستاننان جەتكىزىلەتىن كوكونىس، باسقا دا اۋىل شارۋاشىلىعى ونىمدەرىنە ۋاقىتشا تىيىم سالدى. ءبىراق، ولاردىڭ كوبىسى قازاقستاندىق ونىمدەر ەمەس. مەن فيتوسانيتارلىق سەرتيفيكاتتاردى قارادىم، شىعارىلعان جەرى «وزبەكستان» دەپ جازىلعان. جاقىندا ءبىز ماسكەۋدە بولىپ، ەكىجاقتى كەزدەسۋلەر وتكىزدىك. وندا قازاقستاندىق بۇرىش، قىزاناق جانە قاۋىن بارىن كوردىك. ولار قازاقستانعا اكەلىندى، تازارتىلدى جانە ودان ءارى قايتا ەكسپورتتالدى. ارينە، بۇل جەردە شەشىلۋى ءتيىس سۇراقتار بار»، - دەدى سەرىك جۇمانعارين ۇكىمەت وتىرىسىنان كەيىن وتكەن باسپا ءسوز ءماسليحاتىندا.
سونىمەن قاتار ۆيتسە-پرەمەر اتالعان ۋاقىتشا تىيىمدار قازاقستاننىڭ اۋىل شارۋاشىلىعىنا سونشالىقتى اسەر ەتپەيتىنىن ايتتى.
«ءيا، تىيىمنىڭ بەلگىلى دەڭگەيدە بيزنەس سالاسىنا، زاڭدى جۇمىس ىستەپ وتىرعان كاسىپكەرلەرگە جانە تاۋارلاردى قايتا ەكسپورتتاۋعا اسەرى بار. ونىڭ سەبەبىن ءبىز قاراۋىمىز كەرەك. ەگەر فيتوسانيتارلىق باقىلاۋدا قانداي دا ءبىر پروبلەما بولسا، اۋىل شارۋاشىلىعى مينيسترلىگىنە ءتيىستى تاپسىرما بەرىلدى»، - دەپ تولىقتىردى س. جۇمانعارين.
بۇعان دەيىن روسسەلحوزنادزوردىڭ قازاقستاننان رەسەيگە استىق، قىزاناق، كۇنباعىستى ەكسپورتتاۋدى توقتاتا تۇرۋ تۋرالى وتىنىشىنە قاتىستى اۋىل شارۋاشىلىعى مينيسترلىگى تۇسىنىك بەردى.
اۆتور
داۋلەت ىزتىلەۋ
