قازاقستان اسكەرى ازەربايجاندا جاتتىعۋ باستادى
استانا. KAZINFORM - ازەربايجاندا قازاقستانمەن بىرلەسكەن «تارلان-2025» وقۋ-جاتتىعۋ جيىنى باستالدى. بۇل تۋرالى Kazinform ازەربايجان قورعانىس مينيسترلىگىنىڭ رەسمي سايتىنا سىلتەمە جاساپ حابارلايدى.
وقۋ-جاتتىعۋ جيىنى ارقىلى ەكى ەلدىڭ قارۋلى كۇشتەرى ۇشقىشسىز ۇشاتىن اپپاراتتاردى (اسكەري ماقساتتاعى درون - رەد.) قولدانۋ باعىتىندا تاجىريبە الماسپاق.
ءىس-شارانىڭ اشىلۋ ءراسىمى وتان قورعاۋ جولىندا قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الۋدان باستالدى. بۇدان كەيىن قازاقستان مەن ازەربايجاننىڭ مەملەكەتتىك ءانۇراندارى شىرقالدى.
ءىس-شارادا ءسوز العان قوس تاراپتىڭ اسكەري باسشىلارى بىرلەسكەن وپەراتسيالاردىڭ ايماقتىق قاۋىپسىزدىك پەن اسكەري ارىپتەستىكتى نىعايتۋدا ماڭىزى زور اتاپ ءوتتى.
سالتاناتتى بولىمنەن كەيىن جەكە قۇرام بەكىتىلگەن سەناري بويىنشا كەزەڭ-كەزەڭىمەن تاپسىرمالاردى ورىنداۋعا كىرىستى.
وقۋ-جاتتىعۋ جيىنى 10-شىلدەگە دەيىن بولادى. ءىس-شارانى ەكى تاراپ تا قورعانىس سالاسىنداعى ءوزارا ىنتىماقتاستىقتى دامىتۋدىڭ ماڭىزدى قادامى رەتىندە باعالاپ وتىر.
بۇل جيىن قازاقستان مەن ازەربايجان قورعانىس مينيسترلىكتەرى اراسىنداعى 2025-جىلعا ارنالعان ىنتىماقتاستىق جوسپارىنا سايكەس ءوتىپ جاتقانىن ايتا كەتۋ كەرەك.
ەسكە سالساق، قازاقستاندا FPV- درون وپەراتورلارىن دايارلايتىن يننوۆاتسيالىق وقۋ-جاتتىعۋ كەشەنى جۇمىس ىستەپ تۇر.
