قازاقستان پاريجدە ورتالىق ازيا ەلدەرى ۇ و ك- تەرى مەن ا و ك اراسىندا كەزدەسۋ ۇيىمداستىردى
پاريج. KAZINFORM - 2024 -جىلعى وليمپيادا قارساڭىندا قازاقستان ۇ و ك پاريج تورىندە ورتالىق ازيا ەلدەرىندەگى ۇ و ك وكىلدەرىنىڭ كەزدەسۋىن وتكىزدى.
بۇل گەننادي گولوۆكيننىڭ «وليمپيادالىق» كەستەسىندەگى العاشقى رەسمي كەزدەسۋى ەكەنىن اتاپ ءوتۋ كەرەك.
ءىس-شاراعا تانىمال تۇلعالار قاتىستى. ح و ك سەسسياسىنا بايلانىستى تىعىز جۇمىس كەستەسىنە قاراماستان، اتالعان جيىنعا ازيا وليمپيادا وداعىنىڭ قازىرگى پرەزيدەنتى ءارى ح و ك مۇشەسى رادجا راندحير سينگح، ۇ و ك- تەرمەن قارىم-قاتىناس، وليمپيادالىق ىنتىماقتاستىق جانە وليمپيزم 365 جونىندەگى ح و ك ديرەكتورى دجەيمس ماكلود، حوك ديرەكتورىنىڭ ورىنباسارى وليۆە نيامكي مەن ازياداعى ىنتىماقتاستىق جايلى ح و ك وليمپيادالىق باعدارلاماسىنىڭ ۇيلەستىرۋشى ەدۆارد كەنسينگتون قاتىستى.
«شاقىرعاندارىڭىزعا كوپ راقمەت. ءسىزدىڭ ايماقتىڭ بىرىككەنى ءۇشىن وتە قۋانىشتىمىن. سىزدەرمەن ءدال وسى جەردە، پاريج تورىندە كەزدەسۋ مەن ءۇشىن مارتەبە. ءبىز ورتاق مۇددەلەر ءۇشىن جۇمىس ىستەيتىن ءبىر وتباسىمىز. سوندىقتان سىزدەردىڭ باستاماشىل ۇسىنىستارىڭىز ءبارىمىزدى ماقساتقا جەتۋ جولىندا بىرىكتىرەدى. 1995 -جىلى وزبەكستاندا العاش رەت ورتالىق ازيا ويىندارى وتكەنى ەسىمدە. ۇيىمداستىرۋ ىسىنە ح و ك اتسالىستى جانە سول كەزدە بۇل ۇلكەن جەتىستىك ەدى. سىزدەردىڭ اتالعان جارىستى قايتا جاڭعىرتۋ جونىندە باستاما كوتەرگەندەرىڭىز مەنى قاتتى قۋانتادى. ايماقتىق ويىنداردى وتكىزۋدىڭ ماڭىزى زور. بۇل بۇكىل ءوڭىردى دامىتۋ جولىنداعى وتە ماڭىزدى قادام. ورتالىق ازياداعى سپورتتى دامىتۋعا باعىتتالعان بارلىق باستامالارىڭىزدى ح و ك قولدايتىنىنا سەنىمدىمىن»، - دەدى سينگح.
كەزدەسۋگە ازيا وليمپيادا كەڭەسىنىڭ باس ديرەكتورى ءارى حالىقارالىق سۋ سپورتى تۇرلەرى فەدەراتسياسىنىڭ باسشىسى حۋساين ءال مۋساللام مەن ونىڭ ورىنباسارى ۆينج تيۆاري قاتىستى. سونداي-اق، قوناقتار قاتارىندا ح و ك مۇشەسى ءارى بۋتان ۇ و ك پرەزيدەنتى ەكۆ پرينتس داشو دجيگەل ۋگەن ۆانگچۋك تە بار.
«ۇزاق جىلدار بويى ءبىز ورتاق ماقساتىمىز ءۇشىن تەر توگىپ، ەڭبەك ەتۋدەن جالىقپادىق. ەندى مىنە، ەڭ ماڭىزدى ساتكە - وليمپيادا ويىندارىنىڭ باستالار كۇنىنە دە جەتتىك. ح و ك اتىنان بارشاڭىزعا قولداۋلارىڭىز ءۇشىن العىس ايتامىن. بۇل ويىن سىزدەردىڭ قۇرامالارىڭىز ءۇشىن ءساتتى وتەدى دەپ ۇمىتتەنەمىن. ارينە، ءبىز قيىن كەزەڭدەردى باستان كەشتىك، ەندى ازيانىڭ بىرىگەتىن ۋاقىتى جەتتى. پاريج وليمپياداسى وسى باستاماعا جول اشادى دەپ ويلايمىن. پاريج تورىندە ءبارىنىڭ باسىن قوسۋ - كەرەمەت باستاما. كەزدەسۋ ناتيجەسىندە ورتالىق ازيا ويىندارىن وتكىزۋ سىندى باستامالار كوتەرىلە مە، ول ءوز ەرىكتەرىڭىز. حوك سىزدەردى جانە ءسىزدىڭ سپورتشىلاردى ۇنەمى قولدايتىنىن ەستەن شىعارماۋ كەرەك. ايتپاقشى، وليمپيادالىق ىنتىماقتاستىق اياسىندا قارجىلاندىرۋ دەڭگەيىن ارتتىرا العانىمىز قۋانتادى. وزدەرىڭىز بىلەتىندەي، بۇل قاراجاتتىڭ ءبىر بولىگىن وسىنداي باستامالاردى قولداۋعا قولدانۋعا بولادى»، - دەدى پاريج ويىندارىندا ۇ و ك باسشىلارىنا ساتتىلىك تىلەگەن ح و ك ديرەكتورى دجەيمس ماكلود.
وتىرىسقا ورتالىق ازياداعى ا و ك قاتارىنا ەنەتىن قازاقستان، قىرعىزستان، اۋعانستان، يران، تاجىكستان، تۇركمەنستان جانە وزبەكستاننىڭ ۇ و ك پرەزيدەنتتەرى مەن باس حاتشىلارى قاتىستى.
جيىن بارىسىندا ايماقتا بىرلەسىپ جۇمىس ىستەۋگە قاتىستى سۇراقتار تالقىلاندى. كەزدەسۋدەگى باستى تاقىرىپتاردىڭ ءبىرى 2005 -جىلدان بەرى وتكىزىلمەگەن ورتالىق ازيا ويىندارىن قايتا جاڭعىرتۋ ماسەلەسى بولاتىن. قازاقستان ويىن باعدارلاماسىن 10-12 وليمپيادالىق سپورت تۇرلەرىنە دەيىن قىسقارتىپ، قاتىسۋشىلاردىڭ جاس ساناتىن 14-18 جاس ارالىعىنا جەتكىزۋدى ۇسىندى. سەبەبى، بۇل ۇلتتىق قۇرامالاردىڭ رەزەرۆىن جەتىلدىرۋگە مۇمكىندىك بەرەدى.
جارىس رەگلامەنتىنە بايلانىستى ح و ك مەن ا و ك وكىلدەرى ءوز ۇسىنىستارىن ايتىپ، ورتالىق ازيا ەلدەرىنىڭ باستامالارىن، ونىڭ ىشىندە، وليمپيادالىق ىنتىماقتاستىق اياسىندا جۇزەگە اساتىن ءىس-شارالاردى قولداۋعا دايىن ەكەندەرىن جەتكىزدى.
تاراپتار قۇرلىقتاعى ايماق ءرولىن نىعايتۋ، سونداي-اق، مەملەكەتتەر اراسىنداعى ءوزارا قارىم-قاتىناستى تۇراقتى جولعا سالۋ قاجەتتىگىن تالقىعا سالدى. ودان بولەك، الدا وتەتىن ازيا وليمپيادا كەڭەسىنىڭ باس اسسامبلەياسى تالقىلانىپ، وتىرىس بارىسىندا وتەتىن سايلاۋ تۋرالى ءسوز قوزعالدى.
«حالىقارالىق وليمپيادا كوميتەتى، ازيا وليمپيادالىق كەڭەسى مەن ورتالىق ازياداعى ارىپتەستەرىمىزگە وليمپيادا قارساڭىنداعى قاربالاسقا قاراماستان ۋاقىت ءبولىپ، ءبىزدىڭ باستامامىزدى قولداعانى ءۇشىن العىس ايتامىن. ءبىزدىڭ ماقساتىمىز ايقىن - بۇل ايماقتاعى عانا ەمەس، ح و ك پەن ا و ك- تەگى ارىپتەستەرىمىزبەن سەرىكتەستىكتى نىعايتۋ. كۇشىمىزدى بىرىكتىرۋ ارقىلى ءبىز اتلەتتەرىمىزگە، ۇ و ك- تەرىمىزگە جانە عالامدىق وليمپيادالىق قوزعالىستىڭ دامۋىنا مۇمكىندىك جاساپ، بيىك بەلەستەردى باعىندىراتىنىمىزعا سەنەمىن»، - دەپ اتاپ ءوتتى گەننادي گولوۆكين.
ورتالىق ازيا ەلدەرىندەگى ۇ و ك وكىلدەرى مۇنداي كەزدەسۋلەردى تۇراقتى تۇردە وتكىزىپ، ايماقتىڭ سپورتتىق ىقپالىن كۇشەيتۋ جولىندا جۇمىس ىستەۋگە كەلىستى جانە الداعى وليمپيادا ويىندارىندا ءبىر-بىرىنە ساتتىلىك تىلەدى.
كەلەسى جولى ورتالىق ازياداعى سپورتتىق ۇيىم باسشىلارى قىركۇيەكتىڭ سوڭىندا قىرعىزستاندا (ىستىقكول) كەزدەسۋدى جوسپارلاپ وتىر.
اۆتور
كۇنسۇلتان وتارباي
