«قازاقستان ارۋى - 2023» بايقاۋىنىڭ جەڭىمپازى انىقتالدى
الماتىدا «قازاقستان ارۋى - 2023» ۇلتتىق سۇلۋلىق بايقاۋى اياقتالدى. بايقاۋدا باس جۇلدەنى 21 جاستاعى سابينا ىدىرىسوۆا جەڭىپ الىپ، وسى جىلدىڭ «قازاقستان ارۋى» اتاندى، دەپ حابارلايدى Kazinform.
بيىلعى بايقاۋ ەكولوگيانى قورعاۋ اياسىندا «بولاشاقتى ايالا» - «زاشيتي بۋدۋشەە» ۇرانىمەن ءوتتى. بايقاۋدىڭ فينالدىق كەزەڭىنە كاستينگتەردەن جانە جارتىلاي فينالدىڭ ناتيجەسىندە ىرىكتەلىپ شىققان 25 قىز قاتىستى. ولاردىڭ اراسىندا وڭىرلىك ىرىكتەۋ كەزەڭدەرىنىڭ جەڭىمپازدارى دا بولدى.
بايقاۋعا قاتىسۋشى ارۋلارعا كەلەسىدەي نەگىزگى تالاپتار قويىلدى: جاستارى 18-25 اراسىندا بولۋى، بويلارى 165 س م- دەن كەم بولماۋى، ق ر ازاماتى، تۇرمىس قۇرماعان ءارى بالالى بولماۋى ءتيىس.
بايقاۋعا باعا بەرەتىن ءادىلقازىلار قۇرامىندا: «قازاقستان ارۋى» ۇلتتىق سۇلۋلىق بايقاۋىنىڭ پرەزيدەنتى ايداي يسايەۆا، «قازاقستان ارۋى - 2022» بايقاۋىنىڭ جەڭىمپازى توميريس كاكيموۆا، سپورتشى ءارى اكتەر ەركەبۇلان توقتار، بلوگەر، اكتريسا جانيا دجۋرينسكايا، قىرعىز ديزاينەرى ارزۋبەك ۆوناما، كاسىبي مودەل انجەلا پەرەسىپكينا بولدى.
فينالدىق كەزەڭ بىرنەشە بايقاۋدان تۇردى. قاتىسۋشىلار ءتۇرلى كيىمدەر مەن بەينەلەردە جەكە جانە توپتىق دەفيلە كورسەتتى، كەيىن سۇراقتارعا جاۋاپ بەردى. ءادىلقازىلار الدىمەن 25 قاتىسۋشىنىڭ ىشىنەن توپ-12 قىزدى انىقتادى، وسىدان كەيىن ەڭ ۇزدىك 5 قىزدى انىقتادى.
«قازاقستان ارۋى» اتاعى مەن «الەم ارۋى» بايقاۋىنا جولدامانى 21 جاستاعى سابينا ىدىرىسوۆا جەڭىپ الدى. وعان سونداي- اق 5 ميلليون تەڭگەنىڭ سەرتيفيكاتى تابىستالدى.
«قازاقستان عالام ارۋى» ءتاجى مەن «الەم ارۋى» بايقاۋىنا جولداما 23 جاستاعى مادينا ءالمۇحانوۆاعا بەرىلدى.
«قازاقستان جەر ارۋى» اتاعى مەن «جەر ارۋى» بايقاۋىنا جولداما 20 جاستاعى اياۋلىم اليمحاليەۆاعا بەرىلدى.
بوتاگوز نۇرجىگىتوۆا «قازاقستان ۆيتسە- ارۋى - 2023» اتاندى.
سايتتا داۋىس بەرۋ ارقىلى كورەرمەن كوزايىمى سىيلىعىنىڭ يەگەرى ادەلينا باگۋمبايەۆا بولدى.
ەسكە سالساق، وتكەن جىلى 24 جاستاعى استانالىق توميريس كاكىموۆا «قازاقستان ارۋى» اتانعان ەدى.
اۆتور
دۋمان ارعىنگەلدى
