قازاقستان ارمياسىنداعى باسىم باعىتتار ايقىندالدى
استانا. KAZINFORM - قاراعاندىدا قورعانىس مينيسترلىگىنىڭ كوشپەلى القا وتىرىسى ءوتتى. وتىرىس بارىسىندا 2024-2025-جىلعى قىسقى وقۋ كەزەڭىنىڭ قورىتىندىلارى شىعارىلىپ، جازعى وقۋ كەزەڭىنە ارنالعان باسىم باعىتتار ايقىندالدى، - دەپ حابارلايدى قورعانىس مينيسترلىگىنىڭ باسپا ءسوز قىزمەتى.
مينيسترلىكتىڭ حابارلاۋىنشا، قورعانىس ءمينيسترى رۋسلان جاقسىلىقوۆ گەوساياسي جاعدايداعى وزگەرىستەرگە نازار اۋدارىپ، «زاماناۋي اسكەري ءىس-قيمىلدار جۇرگىزۋ بويىنشا شەتەلدىك تاجىريبەنى ەسكەرە وتىرىپ»، قازاقستان ارمياسىن دايارلاۋ بويىنشا باسىم باعىتتاردى بەلگىلەدى.
باسپا ءسوز قىزمەتىنىڭ مالىمەتىنشە، «اسكەردىڭ دايارلىق دەڭگەيىن، كادرلىق الەۋەتىن، تىلدىق جانە تەحنيكالىق قامتاماسىز ەتۋ ماسەلەلەرىن ارتتىرۋ» ماسەلەلەرى تالقىلاندى. قورىتىندىلاي كەلە، قورعانىس ءمينيسترى قولباسشىلىق قۇرامعا ءبىرقاتار باسىم مىندەتتەردى جۇكتەدى.
«ولاردىڭ قاتارىندا - تاكتيكالىق بارلاۋ جۇرگىزۋ مىندەتتەرىن پىسىقتاۋ ءۇشىن ۇشقىشسىز ۇشۋ اپپاراتتارى (بپلا) وپەراتورلارىن دايارلاۋ، جاۋىنگەرلىك جانە ارنايى دايارلىق بويىنشا پراكتيكالىق ساباقتار وتكىزۋ، ينجەنەرلىك-ساپەرلىك بولىمشەلەردى دايىنداۋ، قاۋىپسىزدىك شارالارىن كۇشەيتۋ، قارۋمەن جۇمىس ىستەۋ تالاپتارىن ساقتاۋ جانە باسقا دا مىندەتتەر بار»، - دەلىنگەن مينيسترلىك تاراتقان اقپاراتتا.
بۇعان دەيىن قورعانىس مينيسترلىگى اسكەري-كولىك اۆياتسياسىن ازاماتتىق جانە كوممەرتسيالىق ماقساتتاردا پايدالانۋدى ۇسىنعان بولاتىن. مۇنداي تاجىريبە قازىرگى تاڭدا ۇلى بريتانيا، گەرمانيا، تۇركيا، ەگيپەت، رەسەي، بەلارۋس جانە وڭتۇستىك كورەيا سياقتى ەلدەردە قولدانىلىپ كەلەدى. بۇل حالىقارالىق ازاماتتىق اۆياتسيا ۇيىمى (ي ك ا و) ستاندارتتارىنا سايكەس كەلەدى.
سونىمەن قاتار، شەتەلدىك ب ا ق- تىڭ حابارلاۋىنشا، ماۋسىم ايىنىڭ سوڭىندا قىتاي 7000 شاقىرىم ۇشۋ قاشىقتىعى بار جانە 100 شاعىن دروندى تاستاي الاتىن Jiu Tian ۇشقىشسىز اپپاراتىن سىناقتان وتكىزۋدى جوسپارلاپ وتىر.
