قازاقستان اۋماعىنداعى ەلەكتروموبيل سانى قانشا مىڭعا جەتتى
استانا. KAZINFORM - دالىرەك ايتقاندا، قازاقستان اۋماعىندا 10970 ەلەكتروموبيل تىركەلگەن. اگەنتتىك تىلشىسىنە بەرگەن جاۋابىندا ق ر ىشكى ىستەر مينيسترلىگىنىڭ باسپا ءسوز قىزمەتى وسىنداي دەرەك كەلتىردى.
«قازاقستان اۋماعىندا 10970 ەلەكتروموبيل تىركەلگەن. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك جانە ەلەكترموبيلدەرگە ارنالعان ينفراقۇرىلىمدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا سايكەس، ەلەكتروموبيلدەرگە ارنالعان ورىنداردا توقتاۋ نەمەسە تۇرۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىك ەنگىزىلدى. سوندىقتان باسقا كولىك جۇرگىزۋشىلەرىنە كورسەتىلگەن ورىندارعا قويماۋ ەسكەرتىلەدى. ودان بولەك، ەلەكتروموبيل جۇرگىزۋشىلەرىنە كوممۋنالدىق اقىلى اۆتوتۇراقتاردا تەگىن تۇرۋ ءۇشىن جەڭىلدىك كوزدەلگەن (اۆتوتۇراقتار، پاركينگتەر)»، - دەلىنگەن ق ر ىشكى ىستەر مينيسترلىگى باسپا ءسوز قىزمەتىنىڭ Kazinform اگەنتتىگىنە بەرگەن جاۋابىندا.
ەسكە سالساق، بيىل ماۋسىم ايىندا سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك جانە ەلەكترموبيلدەرگە ارنالعان ينفراقۇرىلىمدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىن ماقۇلدادى. بۇل زاڭ ەلىمىزدە ەلەكتروموبيلدەر سانىنىڭ ارتۋىنا جانە ارنايى ينفراقۇرىلىمدى دامىتۋعا ىقپال ەتەدى.
اتاپ ايتقاندا، الەمدە جىل سايىن ەلەكتروكارعا سۇرانىس ارتىپ جاتىر. 2023 -جىلى ەلەكتروموبيل الەمدەگى ەڭ كوپ ساتىلعان كولىك بولدى. قازاقستاندا دا بۇل كولىكتى تاڭدايتىندار كوبەيىپ كەلەدى. وعان ستاتيستيكا دالەل، ياعني بىلتىر ەلەكتروموبيلدەر سانى 10 ەسەدەن استام ارتتى. 2022 -جىلى ەلىمىزدە نەبارى 570 ەلەكتروموبيل بولعان.
ساراپشىلاردىڭ پىكىرىنشە، ەلەكتروموبيلدەردىڭ كۇرت ارتۋىنا قازاقستاندىقتارعا كولىكتىڭ ەكولوگيالىق تازا تۇرىنە كوشۋى ءۇشىن مەملەكەت بەرەتىن كۆوتا سەبەپ بولدى. ويتكەنى ەلەكتروموبيلدىڭ اتموسفەراعا زيانى جوق. سوندىقتان مەملەكەت ونى ساتىپ العاندا كەدەن جانە سالىق تولەمدەرىنەن بوساتاتىن كۆوتا بەردى. مىنە، وسىدان كەيىن ساتىپ الۋشىلار كوبەيدى.
اۆتور
رۋسلان عابباسوۆ
