قازاقستان اۋماعىندا جەرگىلىكتى ۋاقىت 1 ساعاتقا ارتقا اۋىستىرىلادى
2024-جىلدىڭ 29-اقپانىنان 1-ناۋرىزعا قاراعان ءتۇنى رەسپۋبليكالىق 3 قالا مەن 12 وبلىس اۋماعىندا جەرگىلىكتى ۋاقىت 1 ساعاتقا ارتقا اۋىستىرىلادى. بۇل جايىندا اشىق ن ق ا- دا جاريالانعان ۇكىمەت قاۋلىسىنىڭ جوباسىندا ايتىلعان، دەپ حابارلايدى Kazinform.
قۇجاتتا قازاقستان رەسپۋبليكاسى اۋماعىندا ۋاقىت ەسەپتەۋ قازاقستان رەسپۋبليكاسىنىڭ ۋاقىت پەن جيىلىك مەملەكەتتىك العاشقى ەتالونى ۇدايى جۇرگىزەتىن، ساقتايتىن ءارى بەرەتىن ساعاتتىق بەلدەۋلەردىڭ حالىقارالىق جۇيەسى بويىنشا جۇرگىزىلەتىندىگى، ەلىمىزدىڭ بۇكىل اۋماعىندا 5-ساعاتتىق بەلدەۋ قولدانىلاتىندىعى ايتىلعان.
«استانا، الماتى، شىمكەنت قالالارىنىڭ، اباي، اقمولا، الماتى، جامبىل، جەتىسۋ، قاراعاندى، قوستاناي، پاۆلودار، سولتۇستىك قازاقستان، تۇركىستان، ۇلىتاۋ، شىعىس قازاقستان وبلىستارىنىڭ اكىمدىكتەرى 2024 -جىلعى 29-اقپاننان 2024 -جىلعى 01-ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعاتقا ارتقا اۋىستىرسىن»، - دەلىنگەن قاۋلى جوباسىندا.
ايتا كەتەيىك، قازاقستان رەسپۋبليكاسىندا ەكى ۋاقىت بەلدەۋى (UTC+5 ،UTC+6) قولدانىلادى. اتىراۋ، باتىس قازاقستان، ماڭعىستاۋ، اقتوبە جانە قىزىلوردا وبلىستارى - 4-ساعاتتىق بەلدەۋىندە (UTC+4+1). استانا، الماتى، شىمكەنت قالالارى جانە قالعان وبلىستار (قوستاناي، سولتۇستىك قازاقستان، اقمولا، قاراعاندى، ۇلىتاۋ، تۇركىستان، جامبىل، پاۆلودار، شىعىس قازاقستان، اباي، جەتىسۋ، الماتى) 5-ساعاتتىق بەلدەۋىنە (UTC+5+1) جاتادى.
بۇل رەتتە، بۇگىنگى كۇنى قازاقستان رەسپۋبليكاسى ازاماتتارىنىڭ ەداۋىر بولىگى (قوستاناي، اقمولا، سولتۇستىك قازاقستان، قاراعاندى، پاۆلودار، الماتى، تۇركىستان، جامبىل، ۇلىتاۋ، جەتىسۋ جانە اباي وبلىستارىنىڭ، استانا جانە الماتى، شىمكەنت قالالارىنىڭ تۇرعىندارى) ءوزىنىڭ گەوگرافيالىق ۋاقىتىنان وزىپ - UTC+6 اكىمشىلىك ۋاقىت بەلدەۋى بويىنشا ءومىر سۇرەدى. اۋماقتىق كورسەتىلگەن ايماقتار UTC + 5 ۋاقىت بەلدەۋىندە ورنالاسقان.
ادامنىڭ دەنساۋلىعى، ەكونوميكاسى جانە قاۋىپسىزدىگى ءۇشىن كۇن (تابيعي) ۋاقىتىنا مۇمكىندىگىنشە جاقىن تۇراقتى ۋاقىت بەلدەۋلەرىن پايدالانۋ قاجەت. وسىعان بايلانىستى، جەكەلەگەن ازاماتتار، قوعام بەلسەندىلەرى، قازاقستان رەسپۋبليكاسى پارلامەنتىنىڭ دەپۋتاتتارى قازاقستان رەسپۋبليكاسىندا، ونىڭ ىشىندە قىزىلوردا، قوستاناي، باتىس قازاقستان وبلىستارى ءۇشىن ۋاقىتتى ەسەپتەۋ ماسەلەلەرىن كوتەرىپ وتىردى. وزىق ۋاقىتتى قولدانۋ ءبىرقاتار اۋرۋدىڭ ورشۋىنە ىقپال ەتەدى جانە فاكتورلاردىڭ ءبىرى بولىپ تابىلادى. ەڭ الدىمەن، شارشاۋدىڭ جيناقتالۋىندا، اقىل- وي جانە فيزيكالىق جۇمىسقا قابىلەتتىلىكتىڭ تومەندەۋىندە، ۇيقىنىڭ بۇزىلۋىندا، اس قورىتۋدىڭ بۇزىلۋىندا جانە ت. ب. كورسەتىلگەن دەسينحرونوزدى اتاپ وتكەن ءجون.
اۆتور
ايدار وسپاناليەۆ
