قازاقستان التىن قورى بويىنشا توپ-20 ەلدىڭ قاتارىندا
استانا. KAZINFORM - سوڭعى 10 جىلدا ەلىمىزدە التىن قۇرامدى كەن ءوندىرۋ 2,2 ەسە ارتتى. بۇل تۋرالى ونەركاسىپ جانە قۇرىلىس ۆيتسە- ءمينيسترى يران شارحان ءمالىم ەتتى.
- مەتالدار - جاي عانا تاۋار ەمەس، ولار ەكونوميكالىق جانە ساياسي كۇشتىڭ قۇرالى. عالامدىق باسەكەلەستىك كۇشەيىپ جاتقان جاعدايدا قازاقستان تۇراقتىلىقتى، بەيتاراپتىقتى جانە بولجامدىلىقتى ساقتاپ كەلەدى، - دەدى يران شارحان ەلوردادا ءوتىپ جاتقان 15-حالىقارالىق تاۋ- كەن مەتاللۋرگيا كونگرەسىندە.
ۆيتسە-مينيستر كەلتىرگەن مالىمەتكە سۇيەنسەك، ەلىمىز بىرنەشە مەتالل ءتۇرى بويىنشا الەمدەگى ءىرى وندىرۋشىلەردىڭ قاتارىندا.
- بۇگىندە قازاقستان كوپتەگەن جىل بويى تيتان، مىس، اليۋميني، مىرىش پەن قورعاسىن، فەرروقورىتپالار، سونداي- اق بەريللي، تانتال جانە نيوبي سياقتى مەتالداردى ءوندىرۋ جانە جەتكىزۋ بويىنشا الەمدىك نارىقتاعى نەگىزگى ويىنشىلاردىڭ ءبىرى. سوڭعى 10 جىلدا التىن قۇرامدى كەن ءوندىرۋ 2,2 ەسە ارتتى، سوعان سايكەس اففينيرلەنگەن التىن ءوندىرىسى 2 ەسە ۇلعايدى. بۇل قازاقستاننىڭ الەمدەگى التىن قورىنا يە توپ-20 ەلدىڭ قاتارىنا كىرۋىنە مۇمكىندىك بەردى، - دەيدى ول.
ايتا كەتەيىك، ەلوردادا حالىقارالىق تاۋ-كەن مەتاللۋرگيا كونگرەسى ءوتىپ جاتىر. وعان الەمنىڭ 20 ەلىنەن 1300 دەلەگات قاتىسىپ جاتىر.
