قازاقستان اۋاسى ەڭ لاستانعان 40 ەلدىڭ قاتارىندا تۇر - ماۋلەن اشىمبايەۆ
سەنات ءتوراعاسى ماۋلەن اشىمبايەۆ قازاقستان اۋاسى ەڭ لاستانعان 40 ەلدىڭ قاتارىندا تۇرعانىن ءمالىم ەتتى، دەپ حابارلايدى Kazinform.
بۇل تۋرالى ول قازاقستان رەسپۋبليكاسىنىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىنىڭ ىسكە اسىرىلۋىنا مونيتورينگ جۇرگىزۋ كەزىندەگى پارلامەنتتىك كوميسسيانىڭ "اۋانىڭ لاستانۋى - ەكولوگيالىق قاۋىپسىزدىككە تونگەن قاتەر" تاقىرىبىنا ارنالعان وسكەمەندەگى كوشپەلى وتىرىسىندا ايتتى.
- وسكەمەن ەلىمىزدەگى اۋاسى ەڭ لاستانعان قالالاردىڭ ءبىرى. سول ءۇشىن كوميسسيا وتىرىسىن وسىندا باستاپ وتىرمىز. حالىقتىڭ ءومىر ءسۇرۋ ساپاسىنا كۇندەلىكتى تىنىستايتىن اۋا ساپاسى تىكەلەي اسەر ەتەدى. جىل سايىن كاسىپورىندار زياندى شىعارىندىلاردى ازايتىپ كەلەدى، ءبىراق ەكولوگيا ماسەلەسى ءالى دە وزەكتىلىگىن جويمادى. بۇگىندە قازاقستان اۋاسى ەڭ لاستانعان 40 ەلدىڭ قاتارىندا تۇر، - دەدى ماۋلەن اشىمبايەۆ.
وتىرىس بارىسىندا شىعىس قازاقستان وبلىسىندا ەكولوگيالىق جاعدايدى جاقسارتۋ ماقساتىندا قانداي شارالاردى قولعا الۋ كوزدەلىپ وتىرعانى ايتىلدى.
- ءوڭىر بويىنشا اۋانى لاستاۋشى كاسىپورىندار قاتارىندا - "كازسينك" ج ش س ەڭ الدىڭعى قاتاردا. شىعارىندىلار 24,3 مىڭ توننانى قۇرايدى. بۇل جالپى شىعارىندىلاردىڭ 47 پايىزى. سول ءۇشىن كاسىپورىنعا كۇكىرت قىشقىلى زاۋىتىنىڭ قالدىق گازدارىن تولىق تازارتاتىن قوندىرعى ورناتۋ جوسپارلانعان. سونىڭ ناتيجەسىندە كۇكىرت ديوكسيدى شىعارىندىلارى 1600 تونناعا ازايتىلادى. ال ەكىنشى ورىندا تۇرعان "وسكەمەن ج ە و" ج ش س- نىڭ زياندى شىعارىندىلارى - 15,3 مىڭ توننا. وندا قازاندىق قوندىرعىسىنان شىعاتىن ازوت وكسيدىن ازايتۋ جوباسى جۇزەگە اسىرىلدى. وسىلايشا ازوت وكسيدىنىڭ كونتسەنتراتسياسى ەكى ەسەگە تومەندەدى، - دەدى وبلىس اكىمى ەرمەك كوشەربايەۆ.
ونىڭ ايتۋىنشا، اتموسفەرالىق اۋانىڭ ساپاسىنا مونيتورينگ جۇرگىزۋ ماقساتىندا "قازگيدرومەدتىڭ" 15 بەكەتى جۇمىس ىستەپ تۇر. قولايسىز مەتەوجاعداي كەزىندە اۋا سىنامالارى موبيلدى جىلجىمالى زەرتحانامەن الىنادى.
بىرنەشە ءىرى كاسىپورىنعا شىعارىندىلار مونيتورينگىنىڭ اۆتوماتتاندىرىلعان جۇيەلەرىن ورناتۋ اياقتالۋدا. ەكولوگيالىق اقپارات AirKZ موبيلدى قوسىمشاسى مەن ينتەراكتيۆتى كارتا ارقىلى قامتاماسىز ەتىلەدى.
اۆتور
تالعاتجان مۇحامەتبەك ۇلى
