قازاقستان ا ە س قۇرىلىسى ءۇشىن حالىقارالىق كونسورتسيۋم قۇرۋ ماسەلەسىن پىسىقتاپ جاتىر - توقايەۆ
استانا. KAZINFORM - قازاقستان ا ە س قۇرىلىسى ءۇشىن حالىقارالىق كونسورتسيۋم قۇرۋ ماسەلەسىن پىسىقتاپ جاتىر. بۇل تۋرالى ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 36-پلەنارلىق وتىرىسىندا مەملەكەت باسشىسى قاسىم-جومارت توقايەۆ ايتتى.
«ۇكىمەت جاڭارتىلاتىن ەنەرگەتيكا سەكتورىنىڭ ينۆەستيتسيالىق تارتىمدىلىعىن ارتتىرۋعا ۇمتىلادى. ءبىز Total ،Swabint ،Aqua Power جانە Masdar سياقتى الەمدىك ويىنشىلارمەن قۋاتى 43 گيگاۆاتت بولاتىن جاسىل ەنەرگەتيكا سالاسىنداعى جوبالاردى جۇزەگە اسىرۋ تۋرالى كەلىسىم جاسادىق»، - دەدى مەملەكەت باسشىسى.
پرەزيدەنت قازاقستاننىڭ اتوم ەنەرگەتيكاسىن دامىتۋ ءۇشىن زور الەۋەتكە يە ەكەندىگىنە دە توقتالدى.
«ءبىزدىڭ ەلىمىز يادرولىق وتىن تسيكلى اياقتالعان دەرلىك الەمدەگى ەڭ ءىرى ۋران ءوندىرۋشى سانالادى. وزدەرىڭىز دە بىلەتىندەي، جاقىندا وتكەن جالپىۇلتتىق رەفەرەندۋمدا قازاقستاندا العاشقى اتوم ەلەكتر ستانتسياسىنىڭ قۇرىلىسى ماقۇلداندى. بۇل ءبىزدىڭ ەنەرگەتيكالىق قاۋىپسىزدىگىمىزگە ۇزاق مەرزىمدى ينۆەستيتسيا سانالادى. قازىرگى ۋاقىتتا ءبىز وسى جوبا ءۇشىن حالىقارالىق كونسورتسيۋم قۇرۋ ماسەلەسىن پىسىقتاپ جاتىرمىز»، - دەدى قاسىم-جومارت توقايەۆ.
بۇعان دەيىن قازاقستان تەحنيكالىق جانە كاسىپتىك ءبىلىم بەرۋ ساپاسىن ارتتىرۋعا دايىن ينۆەستورلاردى ىزدەيتىندىگىن جازعان ەدىك.
