قازاقستان 12 جىلعا 46 ميلليارد تەڭگە قارىز الادى
استانا. KAZINFORM - قازاقستان حالىقارالىق قايتا قۇرۋ جانە دامۋ بانكىنەن (ح ق د ب) شامامەن 46 ميلليارد تەڭگە كولەمىندە قارىز الادى. بۇل تۋرالى ءماجىلىستىڭ جالپى وتىرىسىندا بەلگىلى بولدى.
ءماجىلىس دەپۋتاتى نۇرتاي سابيليانوۆتىڭ ايتۋىنشا، بىلتىرعى جەلتوقساندا قازاقستان مەن ح ق د ب اراسىندا رەسپۋبليكانىڭ ينكليۋزيۆتى ەكونوميكاسىن جەدەل سيفرلاندىرۋ جوباسى اياسىندا قارىز الۋ تۋرالى كەلىسىمگە قول قويىلعان.
«كەلىسىمنىڭ ماقساتى - قازاقستاننىڭ شالعاي جانە جەتكىلىكسىز قامتىلعان اۋداندارىندا تۇراتىن اۋىل تۇرعىندارىن ساپالى جانە تۇراقتى كەڭجولاقتى بايلانىس ينفراقۇرىلىمىمەن قامتاماسىز ەتۋگە باعىتتالعان جوبانى ىسكە اسىرۋ ءۇشىن قارىز الۋ»، - دەپ ءتۇسىندىردى سابيليانوۆ.
ءماجىلىس كۋلۋارىندا Tengrinews.kz ءتىلشىسى دەپۋتاتتان ناقتى قانداي سوما تۋرالى ءسوز بولىپ وتىرعانىن سۇرادى.
«قازاقستان مەن حالىقارالىق قايتا قۇرۋ جانە دامۋ بانكى اراسىندا 13 ميلليارد جاپون يەنى مولشەرىندە قارىز بەرۋ تۋرالى كەلىسىمگە قول قويىلدى. بۇل شامامەن 46 ميلليارد تەڭگە»، - دەپ جاۋاپ بەردى نۇرتاي سابيليانوۆ.
قارىز مەرزىمى - 12 جىل. بۇعان دەيىن ايتىلعانداي، بۇل قاراجات شالعايداعى اۋىلدارعا ينتەرنەت تارتۋعا باعىتتالماق.
«ينفراقۇرىلىمدى قالپىنا كەلتىرۋ ءۇشىن، حالىقتىڭ اقپارات الۋىنا، جاقسى بايلانىس پەن جىلدام ينتەرنەت بولۋىنا جاعداي جاساۋ ءۇشىن قاجەت»، - دەپ قوستى ماجىلىسمەن.
21-مامىرداعى مالىمەت بويىنشا، جاپون يەنىنىڭ باعامى - 3,54 تەڭگە. حالىقارالىق قايتا قۇرۋ جانە دامۋ بانكى (ح ق د ب) - دۇنيەجۇزىلىك بانكتىڭ نەگىزگى نەسيەلىك ۇيىمى، ب ۇ ۇ- نىڭ مامانداندىرىلعان مەكەمەسى، 1944-جىلى حالىقارالىق ۆاليۋتا قورىمەن بىرگە قۇرىلعان مەملەكەتارالىق ينۆەستيتسيالىق ينستيتۋت.
