قازاقستان 100 مىڭ تەڭگەلىك كۇن پانەلدەرىن ءوندىرۋدى باستايدى

 استانا. KAZINFORM - عىلىم جانە جوعارى ءبىلىم مينيسترلىگى Kazinform ساۋالىنا جولداعان جاۋابىندا كۇن پانەلدەرىنىڭ وتاندىق ءوندىرىسىن جولعا قويۋ جوسپارى جونىندە مالىمەت بەردى.

«HIT» (heterojunction with intrinsic thin layer) جانە «PERC» (passivated emitter rear cells) تەحنولوگياسى بويىنشا كۇن پانەلدەرىن وندىرەتىن زاۋىت سالۋ باعىتىندا جۇمىس ءجۇرىپ جاتىر»، - دەلىنگەن مينيسترلىك مالىمەتىندە.

سونداي- اق، جاۋاپتا وندىرىسكە قاجەت قوندىرعى 1-1,5 ايدىڭ ىشىندە جەتكىزىلەتىنى ايتىلعان.

«وسىلايشا كۇن پانەلى ءوندىرىسىنىڭ جەلىسى ىسكە قوسىلىپ، قىسقا ۋاقىتتىڭ ىشىندە قۋاتى 50 م ۆ ت بولاتىن تولىققاندى زاۋىت پايدا بولادى. جوبا جەتەكشىلەرى ءبىر پانەلدىڭ باعاسى 100 مىڭ تەڭگە بولادى دەپ جوسپارلاپ وتىر. 2024 -جىلى 300 دانا پانەل، 2025 -جىلى 6 مىڭ پانەل، 2026 -جىلى 6 مىڭ پانەل ءوندىرۋ جوسپاردا بار. كەلەشەكتە زاۋىت قۋاتىن جىلىنا 30 مىڭ كۇن پانەلىن وندىرەتىندەي ەتىپ كەڭەيتۋ جوسپارلانعان. الەمدە مۇنداي پانەلدەر گەرمانيادا، جاپونيادا، قىتايدا شىعارىلادى»، - دەپ جازىلعان جاۋاپتا.