قازاقستان مەملەكەت تاريحىنىڭ مەرەيلى مەجەسىنە الەم قاۋىمداستىعىنىڭ قۇرمەتىنە يە بولعان ەل رەتىندە جەتىپ وتىر

- ۇلىق مەرەكەمىز - رەسپۋبليكا كۇنى بارشاڭىزعا قۇتتى بولسىن! بۇل - بۇكىل حالقىمىز ءۇشىن ءمان- ماعىناسى ەرەكشە جانە قاستەرلى مەيرام! 25 -قازاندا اقجولتاي قۇجات - قازاقستاننىڭ ەگەمەندىگى تۋرالى دەكلاراتسيا قابىلداندى. ءدال سول كۇنى ۇلت جىلناماسىنىڭ جاڭا كەزەڭى باستالدى. كوپ ۇزاماي ءوز الدىنا دەربەس ەل اتاندىق. تاريحي ادىلدىك ورناپ، قاسيەتتى قازاق جەرىنە تاۋەلسىزدىكتىڭ التىن قازىعى قاعىلدى. سوندىقتان بۇل كۇندى ۇلى دالاداعى مەملەكەتتىلىك ءداستۇرى قايتا جاڭعىرعان كۇن دەپ ايتساق، ارتىق ەمەس، دەدى - پرەزيدەنت.

بيىل ءبىز ۇلتتىق مەرەكەنى ەل تاۋەلسىزدىگىنىڭ 35 جىلدىعى قارساڭىندا اتاپ ءوتىپ جاتىرمىز. قازاقستان وسى مەملەكەت تاريحىنىڭ مەرەيلى مەجەسىنە قارقىندى دامىپ كەلە جاتقان، الەم قاۋىمداستىعىنىڭ قۇرمەتىنە يە بولعان ەل رەتىندە جەتىپ وتىر.

حالقىمىز ەگەمەندىك جىلدارىندا كوپتەگەن بەلەستى ابىرويمەن ەڭسەردى. ۇلتتىق بولمىسىمىزدىڭ مىزعىماس نىشاندارى - مەملەكەتتىك رامىزدەرىمىز بەكىتىلدى. كوك تۋىمىز بىرىككەن ۇلتتار ۇيىمىنىڭ تورىندە جەلبىرەدى.

ۇلتتىق قارجى جۇيەسى قۇرىلدى. مەملەكەتتىك شەكارامىز شەگەندەلدى.

- قاسيەتتى سارى ارقانىڭ تورىندە، بۇرىنعى ەسكى قالانىڭ ورنىندا بۇكىل دۇنيە ءجۇزىن تاڭعالدىرعان، الەم مويىنداعان جاڭا ەلوردامىز - استانانىڭ ىرگەسى قالاندى. ءبىز بىرلىگىمىزدى بەكەمدەپ، جەر جۇزىنە بەيبىتشىلىك بەسىگى رەتىندە تانىلدىق، - دەدى مەملەكەت باسشىسى.

 مەملەكەت باسشىسى قاسىم-جومارت توقايەۆ رەسپۋبليكا كۇنىنە ارنالعان سالتاناتتى جيىندا سويلەگەن سوزىندە تاعى ءبىر ماڭىزدى مىندەت - ءبىلىم بەرۋ سالاسىن جان-جاقتى دامىتۋ ەكەنىن اتاپ ءوتتى.

- بۇل، ەڭ الدىمەن، جاس ۇرپاقتىڭ جارقىن بولاشاعى ءۇشىن قاجەت. وسى ۋاقىت ارالىعىندا ەلىمىز بويىنشا 1483 بالاباقشا اشىلدى. 1342 زاماناۋي مەكتەپ بوي كوتەردى. كەيىنگى جەتى جىل ىشىندە جاستاردىڭ جوعارى ءبىلىم الۋى ءۇشىن جالپى قۇنى 1,5 تريلليون تەڭگە بولاتىن 655 مىڭنان استام وقۋ گرانتى ءبولىندى. بۇل شارالار جاس بۋىننىڭ قالاعان كاسىپتى مەڭگەرۋىنە، قابىلەتىن ۇشتاۋىنا مۇمكىندىك بەرەدى، - دەدى پرەزيدەنت.

«ەگەمەن ەلدىڭ ەڭسەسى - بيىك» دەگەن ءسوز بار. ءبىز قاسيەتتى تاۋەلسىزدىگىمىزدىڭ ارقاسىندا ءتۇرلى سالادا تولايىم تابىسقا جەتىپ كەلەمىز. سوندىقتان بەيبىت كۇننىڭ قادىرىن ءبىلىپ، مەملەكەتتىگىمىزدى كۇشەيتە ءتۇسۋ ءۇشىن تاباندى ەڭبەك ەتۋىمىز كەرەك.

- مەن بۇگىن ەلىمىزدىڭ ءبىرقاتار جەتىستىگىنە توقتالىپ ءوتتىم. ءبىراق قازىرگىدەي قۇبىلمالى ءارى باسەكەگە تولى زاماندا بەي-جاي، بەيقام وتىرۋعا مۇلدەم بولمايدى. ءالى كوپ جۇمىس ىستەۋىمىز قاجەت، كەمشىلىكتەر مەن ولقىلىقتار بار ەكەنىن مويىندايمىز، ولاردى جويۋ جانە تۇزەتۋ ءۇشىن ۇكىمەت پەن دەپۋتاتتار جانە بارلىق مەملەكەتتىك قىزمەتشىلەر كۇش سالۋى كەرەك. مەملەكەتىمىزدىڭ الدىندا تۇرعان ناقتى مىندەتتەر مەن جوسپارلار جونىندە كەلەسى اپتادا قازاقستان حالقىنا جولداۋىمدا تولىعىراق ايتامىن، - دەدى مەملەكەت باسشىسى.

مەملەكەت باسشىسى كونستيتۋتسيادا قانداي قۇندىلىقتار بەكىتىلگەنىن ايتتى.

— قازاقتا «ىنتىماق — مىزعىماس قورعان» دەگەن ءسوز بار. ءبىز — بولاشاققا ۇلكەن ۇمىتپەن، زور سەنىممەن قارايتىن ۇلتپىز. شىن مانىندە، ءبىز تاتۋلىق پەن تۇراقتىلىقتىڭ ارقاسىندا سان ءتۇرلى سىناقتان سۇرىنبەي وتتىك. ەل يگىلىگىن ەسەلەپ، وركەنيەتىمىزدىڭ ءورىسىن كەڭەيتتىك. ءبىرتۇتاس ۇلت رەتىندە تۇبەگەيلى وزگەرىستەردى تابىستى جۇزەگە اسىردىق. ەڭ باستىسى، حالقىمىزعا اينىماس باعدار بولاتىن قاستەرلى قۇجات — كونستيتۋتسيامىزدى ءبىرتۇتاس ەل بولىپ قابىلدادىق. تۇعىرعا قونعان كونستيتۋتسيا كوپ ۇلتتى جۇرتىمىزدىڭ جاڭا جارعىسىنا اينالدى. كونستيتۋتسيانىڭ ءار قاعيداتى، ءار تارماعى ەل مۇددەسىنە قىزمەت ەتۋگە باعىتتالعان. ەلىمىزدىڭ ەگەمەندىگى، جەرىمىزدىڭ تۇتاستىعى، ازاماتتاردىڭ زاڭدى قۇقىقتارى مەن بوستاندىقتارى كونستيتۋتسيامىزعا سايكەس باستى قۇندىلىقتار دەپ تانىلدى. زاڭ مەن ءتارتىپتى قامتاماسىز ەتۋ، جالپىۇلتتىق بىرلىكتى بەكەمدەۋ مىزعىماس قاعيدات رەتىندە بەكىتىلدى. ءبىلىم مەن عىلىمدى، يننوۆاتسيانى، جوعارى تەحنولوگيالاردى دامىتۋ مەملەكەتتىڭ ستراتەگيالىق مىندەتى دەپ كورسەتىلدى. كونستيتۋتسيادا قازاقستاننىڭ وتكەنى مەن بۇگىنى، سونداي- اق بولاشاقتاعى بەينەسى ايقىندالدى، — دەدى توقايەۆ.