قازاقستان كوپتەگەن شەتەل ازاماتتارى قۇرمەتپەن قارايتىن، ىقپالدى مەملەكەتكە اينالدى - پرەزيدەنت

پرەزيدەنتتىڭ ايتۋىنشا، انا تىلىمىزدە جارىق كورگەن كىتاپتاردىڭ، اندەردىڭ، فيلمدەردىڭ نارىقتاعى ۇلەسى ۇلعايا ءتۇستى.

- مىسالى، بىلتىر باسپادان شىققان 6 مىڭنان استام كىتاپتىڭ 70 پايىزى قازاق تىلىندە باسىلدى. ال بيىل قازاقستاندا تۇسىرىلگەن 71 فيلمنىڭ 63- ءى انا تىلىمىزدە جارىققا شىقتى. ايتىلعان دەرەكتەردىڭ ءبارى جۇرتىمىزدىڭ اراسىندا قازاق تىلىنە ۇلكەن سۇرانىس تۋدىردى. بۇل - وتە قۋانىشتى جايت، جاقسى ءۇردىس. وسىنداي جۇمىستى كۇشەيتە بەرۋىمىز كەرەك، - دەدى مەملەكەت باسشىسى.

سونداي-اق ءتول ءتىلىمىز ۇلتتى ۇيىستىراتىن، وركەنيەتىمىزدىڭ ءورىسىن كەڭەيتەتىن «جۇمساق كۇشكە» اينالۋدا. مىسالى، الەمگە ايگىلى تاريحي تۇلعا بەيبارىس سۇلتاننىڭ، ۇلى ويشىل ابايدىڭ، اسا كورنەكتى عالىم قانىش ساتبايەۆتىڭ ۇلت وركەنيەتىندەگى ورنى مەن ەڭبەگى بىرەگەي.

— ال، بۇگىندە جاھان جۇرتىنىڭ سۇيىكتى انشىسىنە اينالعان ديماش قۇدايبەرگەن، ايگىلى كانن فەستيۆالىندە ۇزدىك اكتريسا دەپ تانىلعان سامال ەسلياموۆا، بەلگىلى شاحماتشى، الەمنىڭ بىرنەشە دۇركىن چەمپيونى ءبيبىسارا اساۋبايەۆا، بۇكىل جاپون حالقىنا، سونىڭ ىشىندە يمپەراتورعا دا وتە تانىمال، كاسىبي سۋمودا جۇرگەن جالعىز قازاق بالۋانى، جەڭىمپاز ەرسىن بالتاعۇل (كيمبوزان حارۋكي) جانە Higgsfield AI جاھاندىق ستارتاپ جەتەكشىسى ەرزات دۋلاتوۆ سياقتى ناعىز دارىن يەلەرى قازاقتىڭ مادەنيەتىن، رۋحانياتىن، زياتكەرلىك قۋاتىن جان-جاقتى دارىپتەپ ءجۇر، — دەدى ق. توقايەۆ.

بۇل ازاماتتاردى ەلىمىزدىڭ ناعىز وتانشىل پەرزەنتتەرى ءارى رۋحاني ەلشىلەرى دەسە، ارتىق بولمايدى.

— قازىر قازاقستان كوپتەگەن شەتەل ادامدارى قۇرمەتپەن قارايتىن، ىقپالدى مەملەكەتكە اينالدى. سوندىقتان ءبىز قازاق ءتىلىنىڭ بولاشاعىنا قاتىستى تەرىس كوزقاراستان اۋلاق بولۋىمىز كەرەك. ءتىلىمىزدىڭ تاعدىرى كۇماندى، بەلگىسىز دەپ زارلاي بەرسەك، وزگە ەلدەر مەن حالىقتار بىزگە قالاي قارايدى، قالاي سەنەدى؟! ۇنەمى تۇڭىلە بەرۋ وڭ ناتيجە اكەلمەيدى، مۇنداي اڭگىمەنى دوعاراتىن كەز كەلگەنىنە كوزىمىز ابدەن جەتتى، — دەدى قاسىم-جومارت توقايەۆ.