قازاق تىلىندەگى مۋلتفيلمدەر جاساۋعا بيۋدجەتتەن 350 ميلليون تەڭگە ءبولىندى
استانا. KAZINFORM - قازاق تىلىندەگى مۋلتفيلمدەر سانى كوبەيەدى. بۇل تۋرالى ءماجىلىس دەپۋتاتى اسحات ايماعامبەتوۆ تەلەگرام كانالىندا جازدى.
«قازاق تىلىندەگى مۋلتفيلمدەر وتە از، ال YouTube سياقتى قولجەتىمدى پلاتفورمالاردا مۇلدە جوقتىڭ قاسى. بۇگىنگى كۇنى بۇل ۇلكەن ماسەلە، ويتكەنى بالالار تەلەديداردان گورى ينتەرنەت پەن YouTube-تى كوبىرەك تاڭدايدى. بالالار «سينيي تراكتور» مەن «ماشا ي مەدۆەد» سياقتى مۋلتفيلمدەرمەن شەكتەلمەي، ساپالى ءارى قىزىقتى قازاقشا مۋلتفيلمدەردى كورۋى ءتيىس. وسى ماقساتتا، كەلەسى جىلدىڭ بيۋدجەت جوباسىن قاراستىرۋ بارىسىندا، قازاق تىلىندەگى مۋلتفيلمدەر جاساۋعا 350 ميلليون تەڭگە ءبولۋدى جانە ولاردىڭ تەك تەلەديدارعا ەمەس، مىندەتتى تۇردە ينتەرنەتكە، سونىڭ ىشىندە YouTube-قا جۇكتەلۋىن قامتاماسىز ەتەتىن نورمانى زاڭعا ەنگىزدىك. بۇل بالالاردىڭ قازاق تىلىندە قىزىقتى كونتەنتكە قول جەتكىزۋ مۇمكىندىگىن كەڭەيتەدى دەپ سەنەمىز»، - دەدى دەپۋتات.
ونىڭ ايتۋىنشا، الەمدىك حيت مۋلتفيلمدەردى دە مەملەكەتتىك تىلگە اۋدارىپ، YouTube-قا جۇكتەۋ ماڭىزدى. بۇل ءۇشىن اۆتورلىق قۇقىق يەلەرىمەن اۋقىمدى جۇمىس قاجەت. ازىرگە بۇل ماسەلە تولىق شەشىلگەن جوق، ءبىراق الداعى ۋاقىتتا وسى باعىتتا جۇمىستار جالعاسىن تاپپاق.
