قازاق توبەتىنە ءتان ستاندارتتار بيىل بەكىتىلەدى
استانا. KAZINFORM - پرەمەر-مينيستر ولجاس بەكتەنوۆ سەنات دەپۋتاتىنىڭ ساۋالىنا جولداعان جاۋابىندا قازاق توبەتىن ساقتاپ، كوبەيتۋ جۇمىستارى قالاي ءجۇرىپ جاتقانىن ايتتى.
- 2025-2035 -جىلدارعا ارنالعان قازاقى يت تۇقىمدارىن ساقتاۋ جانە ءوسىمىن مولايتۋ جونىندەگى جول كارتاسى بەكىتىلدى، ول اتالعان يت تۇقىمدارىن قورعاۋعا، دامىتۋعا جانە تانىمال ەتۋگە باعىتتالعان. سونداي-اق قازاقى يت تۇقىمىنىڭ ءتيىستى ستاندارتتارى قابىلداندى، «قازاق تازىسى» تاقىرىبىنا عىلىمي زەرتتەۋلەر جۇرگىزىلدى. «قازاق توبەتى» تۇقىمى بويىنشا وسىنداي جۇمىس 2025 -جىلى اياقتالادى، - دەپ جازىلعان ۇكىمەت جاۋابىندا.
پرەمەر-مينيستر جاپونيا مەن تۇركيادا كانگال، اكيتا، شيبا يت تۇقىمدارىن ەكسپورتتاۋعا رەسمي تىيىم سالىنعانى تۋرالى مالىمەتتەردىڭ راس- وتىرىگى بەلگىسىز ەكەنىن ايتقان.
- تۇرىكمەنستاندا تۇرىكمەن الابايىنىڭ مەملەكەتتىك دەڭگەيدە قورعالۋىنا جانە ونى اكەتۋگە تىيىم سالىنعانىنا قاراماستان، الاباي FCI- دە باسقا اتاۋمەن جانە ول ەلدەن تىس باسقا جەردە تىركەلدى. مۇنداي جاعدايدا تۇقىمنىڭ حالىقارالىق دەڭگەيدە سول ۇلتتىڭ اتىمەن تانىلۋى جوققا شىعارىلادى. وسىعان بايلانىستى قازاقى يتتەردىڭ تۇقىمىن حالىقارالىق دەڭگەيدە تانۋ كەزەڭىندە ولاردى ەكسپورتتاۋعا تىيىم سالۋ ورىنسىز دەپ ەسەپتەيمىز، - دەلىنگەن جاۋاپتا.
ەسكە سالساق، عالىمدار توبەت تۇقىمىنىڭ تيبەت ماستيفتەرىمەن تۋىستىعى تۋرالى كەڭ تارالعان گيپوتەزانى تەرىسكە شىعارعان بولاتىن.
