قازاق سپورتشىلارى بيىل قانداي جەتىستىكتەرگە قول جەتكىزدى

استانا. KAZINFORM — ءىرى سپورتتىق دودالارعا تولى بولعان 2024 -جىلى دا تاريح قويناۋىنا كەتكەلى تۇر. بيىلعى جىلدىڭ باسى وڭتۇستىك كورەياداعى IV قىسقى جاسوسپىرىمدەر وليمپياداسىمەن باستالعان بولاتىن.

ەندى، بيىلعى 2024 -جىلداعى ەستە قالعان بايراقتى باسەكەلەر تۋرالى قىسقاشا توقتالىپ وتسەك.

كانۆون-2024: (وڭتۇستىك كورەيا) وليمپياداسى

بۇل وليمپيادا ويىندارى قازاق جانكۇيەرلەرى ءۇشىن تاريحي التىن مەدال جەڭىپ العان جارقىن ساتتەرىمەن ماڭگى ەستە قالدى. ولاي دەيتىنىمىز 2012 -جىلى ينسبرۋكتە (اۋستريا) وتكەن ويىنداردا، 2012 -جىلعى ينسبرۋك (اۋستريا) وليمپياداسىندا جانە 2020 -جىلى لوزاننا (شۆەيتساريا) وليمپياداسىندا قازاق ەلىنىڭ سپورتشىلارى جەڭىس تۇعىرىنىڭ ەڭ بيىك ساتىسىنا كوتەرىلىپ، ءانۇرانىمىزدى اۋەلەتە الماعان ەدى. ءتىپتى، لوزاننادا بىردە-ءبىر جۇلدەگە قول جەتكىزە المادىق.

ال بيىلعى جىلدىڭ باسىندا باستاۋ العان كانۆون-2024 جاسوسپىرىمدەر اراسىنداعى IV قىسقى وليمپيادا ويىندارى بىزگە تاريحي جەتىستىگىمەن ماڭگى ەسىمىزدە قالىپ وتىر. اتالعان دودادا قازاقستان جاسوسپىرىمدەر قۇراماسى ساپىندا 41 سپورتشى 5 سپورت تۇرىنەن باق سىناپ، 55 جۇلدە جيىنتىعىن ساراپقا سالدى.

ناتيجەسىندە 1 التىن، 2 قولا مەدالمەن جالپى كوماندالىق ەسەپتە 20-ورىنعا قول جەتكىزدى.

تۇڭعىش التىن مەدالدى شاڭعىمەن تۇعىردان سەكىرۋدەن قازاقستان كومانداسىنىڭ مۇشەسى يليا ميزەرنىح جەڭىپ السا، قولا مەدالدىڭ ءبىرىن شورت- ترەكتەن 1000 مەتر قاشىقتىقتا سىنعا تۇسكەن سپورتشىلارىمىز پولينا ومەلچۋك قانجىعاسىنا بايلادى. ال ەكىنشى قولا جۇلدەنى قازاقستان قورجىنىنا حوككەيشىلەرىمىز سالدى.

پاريج-2024: (فرانسيا) وليمپياداسى

جاز ورتاسىنان اۋا بۇكىل الەم نازارى پاريجدەگى 4 جىلدىقتىڭ باستى دوداسىنا اۋدى. اتالعان باستى دودانى قازاقستان قۇراماسى جالپى ەسەپتە 43-ورىنمەن اياقتادى.

ناقتىراق ايتساق، پاريج وليمپياداسىندا قازاقستان قۇراماسى 1 التىن، 3 كۇمىس، 3 قولا مەدالعا قول جەتكىزدى.

التىن جۇلدەنى وليمپيادانىڭ العاشقى كۇنى ەل قورجىنىنا دزيۋدودان 60 كەلى سالماقتا ەلدوس سمەتوۆ سىيلادى. وكىنىشكە قاراي، وزگە سپورتشىلارىمىز جەڭىس تۇعىرىنىڭ ەڭ بيىك ساتىسىنا كوتەرىلە العان جوق. دەسە دە، ءار جۇلدەنىڭ ورنى ءوز ەرەكشەلىكتەرىمەن ەستە قالدى.

ال كۇمىس جۇلدەنى سپورتتىق گيمناستيكادان ناريمان قۇربانوۆ، گرەك-ريم كۇرەسىنەن 77 كەلى سالماقتا دەمەۋ جادىرايەۆ جانە بوكستان 80 كەلى سالماقتا ەل نامىسىن قورعاعان نۇربەك ورالداي جەڭىپ الدى.

قولا مەدالداردى نىسانا كوزدەۋدەن كوماندالىق جارىستا يسلام ساتپايەۆ پەن الەكساندرا لە (تاپانشامەن 10 مەتردەن اتۋ)، دزيۋدودان 66 كەلى سالماقتا عۇسمان قىرعىزبايەۆ جانە ايەلدەر بوكسىنان 51 كەلى سالماقتا ەل نامىسىن قورعاعان نازىم قىزايباي جەڭىپ الدى.

ەلدوس سمەتوۆ پاريجگە دەيىن ەكى وليمپياداعا قاتىسىپ، ەكەۋىندە دە جۇلدەگە قول جەتكىزگەن. الايدا، ونىڭ قورجىنىندا التىن عانا جوق-تۇعىن. مىنە، بيىل ءۇشىنشى باستى دودادا دزيۋدودان ەل تاريحىنداعى العاشقى التىن مەدالدى جەڭىپ الدى. وسىلايشا، ەلدوس وليمپيادادا ەڭ كوپ جۇلدە العان توپ-3 وتاندىق سپورتشىنىڭ قاتارىنا كىردى.

ال سپورتتىق گيمناستيكادان ناريمان قۇربانوۆ جەڭىپ العان كۇمىستىڭ دە سالماعى قازاق جانكۇيەرلەرى ءۇشىن اسا سالماقتى بولدى. ولاي دەيتىنىمىز - قۇربانوۆ سپورتتىق گيمناستيكادان جازعى ويىنداردا جۇلدە العان تۇڭعىش قازاقستاندىق سپورتشى اتاندى.

يسلام ساتپايەۆ پەن الەكساندرا لەنىڭ دە جۇلدەسى ءبىز ءۇشىن اسا باعالى. ولاي دەيتىنىمىز - بۇل جۇلدە ەل قورجىنىنا تابانى كۇرەكتەي 28  جىلدان كەيىن بۇيىرىپ وتىر. وسىعان دەيىن جەرلەستەرىمىز نىسانا كوزدەۋدەن سوناۋ 1996 -جىلى اتلانتا وليمپياداسىندا 2 كۇمىس، 1 قولا جۇلدە العان ەدى. مىنە، سودان كەيىن بيىل العاش رەت جازعى وليمپيادا ويىندارىندا 10 مەتردەن پنيەۆماتيكالىق ۆينتوۆكامەن نىسانا كوزدەۋدەن ارالاس جۇپتىق سىندا يسلام ساتپايەۆ پەن الەكساندرا لە 3-ورىنعا يە بولدى.

الەم چەمپيوناتىنداعى العاشقى التىن

سۋ سپورتى تۇرلەرىنەن قاتار استاناسى دوحادا وتكەن الەم چەمپيوناتىندا ەدۋارد كيم مەن نارگيزا بولاتوۆا كوركەم جۇزۋدەن تەحنيكالىق ارالاس باعدارلامادا التىننان القا تاعىپ، تاريحي ناتيجەگە قول جەتكىزدى. بۇل - قازاقستان اتلەتتەرىنىڭ سۋ سپورتى تۇرلەرىنەن الەم چەمپيوناتىندا قول جەتكىزگەن تاريحي التىن مەدال رەتىندە ەستە قالدى.

فۋتزالدان الەم چەمپيونىن توقتاتقان ۇلتتىق قۇراما

قازاقستان قۇراماسى الەم چەمپيوناتىنداعى ەڭ ءىرى جەڭىسىن قايتالادى. سونداي-اق، جەرلەستەرىمىز ءىرى تۋرنيرلەردىڭ فينالدىق كەزەڭىندە 8 جىلدان بەرى جەڭىلمەگەن پورتۋگالياعا توسقاۋىل بولدى. ال ءبىرجان ورازوۆ يسپانيا قاقپاسىنا 6-سەكۋندتا گول سوعىپ، تاريحتاعى ەڭ جىلدام گولدىڭ اۆتورى اتاندى.

شاحمات وليمپياداسىنداعى تاريحي جەتىستىك

شاحماتتان بۋداپەشتتە (ماجارستان) رەكوردتىق 169 ەلدىڭ قاتىسۋىمەن وتكەن وليمپيادادا ەلىمىزدىڭ ايەلدەر قۇراماسى ءوز تاريحىندا العاش رەت 2-ورىنعا تۇراقتادى.

ءۇندىستان - 19 ۇپاي

قازاقستان - 18 ۇپاي

ا ق ش - 17 ۇپاي

بۇل دودادا ءبيبىسارا اساۋبايەۆا، كسەنيا بالابايەۆا، ءامينا قايىربەكوۆا بىردە-ءبىر ويىندا جەڭىلمەدى.

UFC- دەگى شاۆكات ءراحمونوۆتىڭ جارقىن ءساتى

بيىل 30 جاستاعى شاۆكات راحمونوۆ جەلتوقساندا بيىلعى ءبىرىنشى جەكپە-جەگىن جەڭىلىستىڭ ءدامىن تاتپاعان يەن گەرريگە قارسى وتكىزىپ، تورەشىلەر شەشىمىمەن باسىم ءتۇستى. ەندى كەلەسى جىلى چەمپيون اتاعى ءۇشىن بەلال مۇحاممادپەن كەزدەسەدى.

ەركىن كۇرەستەن ەرلەگەن جىل

كۇرەس تۇرلەرىنەن تيرانادا (البانيا) وتكەن وليمپيادا باعدارلاماسىنا كىرمەيتىن سالماقتار بويىنشا الەم چەمپيوناتىندا 70 كەلىدە نۇرقوجا قايپانوۆ توپ جاردى. بۇل - ەركىن كۇرەستەن ەل تاريحىنداعى ەكىنشى التىن.

شورت-ترەكتەن قول جەتكىزگەن تاريحي مەدال

شورت-ترەكتەن روتتەردام (نيدەرلاند) قالاسىندا وتكەن الەم چەمپيوناتىندا 500 مەتر قاشىقتىقتا دەنيس نيكيشا كۇمىس جۇلدە الدى.

ەسكەكشىلەر دە ەرلەدى

كانوەدە ەسكەك ەسۋدەن سامارقان قالاسىندا (وزبەكستان) وتكەن الەم چەمپيوناتىندا ماريا بروۆكوۆا 500 مەترگە جارىستا 3-ورىنعا تۇراقتادى. وسىلايشا، ول الەم چەمپيوناتىندا ەل تاريحىندا جۇلدە ەنشىلەگەن ءبىرىنشى ارۋ اتاندى.

كوشپەندىلەر ويىنىندا دا كوش باستادىق

تۇڭعىش رەت ەلوردامىزدا وتكەن 5- دۇنيەجۇزىلىك كوشپەندىلەر ويىندارى دا جارقىن ساتتەرىمەن ەستە قالدى. 90 عا جۋىق ەل قاتىسقان باسەكەدە ەل سپورتشىلارى 43 التىن، 32 كۇمىس، 37 قولا (112) مەدالمەن جالپىكوماندالىق ەسەپتە ءبىرىنشى ورىندى جەڭىپ الدى.

ال قىرعىزستان قۇراماسى 18 التىن، 21 كۇمىس، 25 (64) قولا مەدال جەڭىپ الىپ، جالپى ەسەپتە ەكىنشى ورىنعا يە بولدى.

ال ۇزدىك ءۇشىنشى ورىندى وزبەكستان قۇراماسى قانجىعاسىنا بايلادى. ولاردىڭ ەنشىسىندە 11 التىن، 12 كۇمىس، 11 (34) قولا مەدال بار.

ءتورتىنشى ورىنعا 11 التىن، 10 كۇمىس، 25 قولا مەدال جەڭىپ العان رەسەي قۇراماسى يەلىك ەتسە، بەستىكتى 2 التىن، 2 كۇمىس، 2 قولا مەدالمەن تۇركيا قۇراماسى تۇيىندەدى.

8-قىركۇيەك كۇنى الاۋى تۇتانعان دوداعا 89 ەلدەن 2430 عا جۋىق سپورتشى قاتىسىپ، 21 سپورت تۇرىنەن 97 مەدال جيىنتىعىن ساراپقا سالدى.

89 ەلدىڭ 33 ى 5 - دۇنيەجۇزىلىك كوشپەندىلەر ويىندارىنىڭ مەدالىنە قول جەتكىزدى. ونىڭ ىشىندە 18 مەملەكەت التىن جۇلدە جەڭىپ السا، 16 مەملەكەتتىڭ قورجىنىندا كۇمىس، 28 مەملەكەتتىڭ قورجىنى قولا مەدال بار.

جالپى، قازاق سپورتشىلارى بيىلعى 9 ايدا وتاندىق سپورتشىلار 621 مەدال (213 التىن، 191 كۇمىس جانە 217 قولا) جەڭىپ الدى.

وسىعان دەيىن 2024 -جىلى قازاقستان سپورتى قانداي جەڭىستەرگە جەتتى دەگەن تاقىرىپپەن ساراپتامالىق ماتەريال جاريالاعان ەدىك.

اۆتور

كۇنسۇلتان وتارباي