قازاق راديوسى بەيجىڭنەن حابار تاراتقانىنا 54 جىل بولدى - شەتەلدەگى قازاق باسپا ءسوزى
Kazinform حاا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
بەيجىڭدەگى قازاق راديوسى حابار تاراتقانىنا 54 جىل بولدى - CNR
بيىل قىتايدىڭ ورتالىق راديو- تەلەۆيزيا باس ستانسياسىنىڭ ۇلتتىق تىلدەگى باعدارلاماسى اۋە تولقىنىنا كوتەرىلگەندىگىنىڭ 75 جىلدىعى. ال ورتالىق راديو-تەلەۆيزيا باس ستانسياسىنىڭ قازاق تىلدەگى راديوسىنىڭ بەيجىڭنەن سويلەگەنىنە تۇپ-تۋرا 54 جىل بولدى. وسى جىلداردا ۇجىم جۇمىسىندا ماڭىزدى تاريح، ەرەكشە ەستەلىكتەر جاتىر، دەپ جازادى قىتايدىڭ ورتالىق حالىق راديوسىنىڭ رەسمي سايتى.
بۇل مەرەكەلىك ءىس-شاراعا وراي بىرنەشە اپتادان بەرى ورتالىق حالىق راديوسى سايتى «مەن جانە قازاق راديوسى» دەگەن تاقىرىپتا تىڭدارمانداردىڭ جەلىلەس ەستەلىكتەرىن جاريالاپ كەلە جاتقان بولاتىن.
وسى اپتادا ورتالىق راديو-تەلەۆيزيا باس ستانسياسىنىڭ ۇلتتىق تىلدەگى باعدارلامالارى تاراتىلعاندىعىنىڭ جانە جاڭا قىتاي ۇلتتىق راديو ىستەرى دۇنيەگە كەلگەندىگىنىڭ 75 جىلدىعىنا وراي ارنايى كونفەرەنسيا ءوتتى.
اتاپ ايتقاندا، 22-مامىر كۇنى ورتالىق راديوستانسياسىنىڭ ۇلتتىق تىلدەگى باعدارلامالارى اۋە تولقىنىنا كوتەرىلگەندىگىنىڭ جانە جاڭا قىتاي ۇلتتىق راديو ىستەرى دۇنيەگە كەلگەنىنىڭ 75 جىلدىعى جونىندەگى كونفەرەنسيا بەيجىڭدە اشىلدى. وسى ارنايى ءىس-شاراعا ورتالىق ۇگىت ءبولىمى باستىعىنىڭ ورىنباسارى، ورتالىق راديو-تەليەۆيزيا باس ستانسياسىنىڭ باستىعى شىن حايشيۋن قاتىسىپ، ءسوز سويلەدى.
مەملەكەتتىك ۇلت ىستەرى كوميتەتىنىڭ ارناۋلى مۇشەسى چين يجى، ق ح ر ۇگىت ءبولىمىنىڭ باستىعى ۋان حايجوۋ ارنايى قاتىسقان.
ورتالىق ۇلتتار ۋنيۆەرسيتەتى، تاريح-مادەنيەت كوللەدجىنىڭ پروفەسسورى مىن مان، قازاق تىلىندەگى باعدارلامانىڭ تىڭدارماندار وكىلى، تانىمال جازۋشى ەركەش قۇرمانبەك قىزى، ۇلتتىق تىلدەگى باعدارلامالار ورتالىعىنان زەينەتكە شىققان ارداگەر جۋرناليستەر جانە جاس قىزمەتكەرلەر جينالىسقا قاتىستى.
ايتا كەتەيىك، ورتالىق حالىق راديوسىنىڭ قازاق تىلىندەگى ءبولىمى 1971 -جىلى 1-مامىردان باستاپ اۋە تولقىنىنا كوتەرىلگەن. العاشىندا «جۇڭياڭ (ورتالىق) حالىق راديو ستانسياسى، بەيجىڭنەن سويلەپ تۇرمىز» دەپ باستالاتىن قابىكەش ءساليىق ۇلى مەن نۇرقايشانىڭ ءۇنى كۇنى بۇگىنگە دەيىن تىڭدارمانداردىڭ ساناسىندا ساقتالىپ قالدى. ودان كەيىن، قىزىربەك جاناسىل ۇلى، ساۋلە داعاي قىزى، بالاپان ءارىپجان ۇلى، گۇلنار سولتانشارىپ قىزى، ارداق ابيدەن قىزى قاتارلى ديكتورلاردىڭ ايشىقتى ءۇنى، ەل ەسىندە ەرەكشە قالعان.
سونداي-اق ءرادىل جاۋدات ۇلى، سەرىك راقىم ۇلى، قاينار تاسقىن ۇلى، ەركەبۇلان ءمۇتان ۇلى قاتارلى جاستاردىڭ قوڭىر داۋىسى، نۇرزيا جۇماقان قىزى، شىنار عالىم قىزى، گۇلجان زارقىنبەك قىزى سياقتى ەفير تىزگىندەۋشىلەردىڭ اتىن ايتپاي كەتۋ مۇمكىن ەمەس، دەيدى ورتالىق حالىق راديوسى.
اتالعان ب ا ق-تىڭ دەرەگىنشە، جۋ باۋچۋان، ساعات جايپاق ۇلى، نىعمەتقالي نۇعىمان ۇلى، بادىمجاپ ولجە، قابىكەش ءساليىق ۇلى قاتارلى اعا بۋىن اۋدارماشى-ديكتورلاردىڭ قاجىرلى ەڭبەگىمەن جۇمىس باستاعان ورتالىق حالىق راديو ستانسياسىنىڭ قازاق راديو ۇجىمى ءبىر جاعادان باس، ءبىر جەڭنەن قول شىعارىپ، قىزمەتتى تىڭعىلىقتى ىستەۋىنىڭ ارقاسىندا، قازاق راديوسى بىرتىندەپ دامۋ جولىنا قادام باسادى.
- راديوداعى ۋاقىت العاشقى جارتى ساعاتتان ءبىر ساعاتقا، كەيىن ەكى ساعاتتان ءتورت ساعاتقا، ءتورت ساعاتتان جەتى ساعاتقا ۇلعايادى. 2015-جىلى 1-قاڭتاردان باستاپ، تاۋلىگىنە 18 ساعات ءارتۇرلى مازمۇنداعى راديو باعدارلامالارىن تاراتىپ، زامانعا ساي ۇجىم بارعان سايىن كەمەلدەنگەن. ۇرىمجىدەن رەداكتسيا بولىمشەسىن اشىپ، جالىندى جاستارمەن قاتارىن تولىقتاپ، حالىقتىڭ قۇلاق قۇرىشىن قاندىرىپ كەلەدى، - دەپ جازادى قىتايلىق ب ا ق.
ايتا كەتۋ كەرەك، ورتالىق حالىق راديوستانسياسى مەنشىگىندەگى قىتاي ۇلتتار راديو سايتى قىتاي، موڭعول، تيبەت، ۇيعىر، قازاق، كورەي تىلدەرىندە اقپارات تاراتادى.
وزبەكستان مەن قازاقستان IT سالاسىنداعى ىنتىماقتاستىقتى نىعايتادى – ءوز ا
اقپاراتتىق تەحنولوگيالار زاماناۋي ەكونوميكانىڭ قوزعاۋشى كۇشىنە اينالىپ وتىرعان تۇستا، بۇل سالاداعى حالىقارالىق ارىپتەستىك ەرەكشە ماڭىزعا يە. وسىعان وراي قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ باستاعان دەلەگاتسيا وزبەكستاننىڭ سيفرلىق تەحنولوگيالار مينيسترلىگىنە جانە IT Park تەحنوپاركىنە رەسمي ساپارمەن كەلدى.
بۇل تۋرالى اپتا سوڭىندا وزبەكستاندىق «ءوز ا» اقپارات اگەنتتىگى حابارلادى.
حابارلامادا ايتىلۋىنشا، ساپار اياسىندا مينيستر شەرزود شەرماتوۆ پەن قازاقستان دەلەگاتسياسى اراسىندا ەكىجاقتى سەرىكتەستىكتى تەرەڭدەتۋگە باعىتتالعان رەسمي كەزدەسۋ ءوتتى. تاراپتار IT سالاسىنداعى ورتاق باسىم باعىتتار بويىنشا پىكىر الماسىپ، ناقتى باستامالاردى تالقىلادى.
وزبەكستاندىق ب ا ق-تىڭ دەرەگىنشە، كەلىسسوزدەر بارىسىندا كەلەسى ماسەلەلەرگە ەرەكشە نازار اۋدارىلدى: شەكاراارالىق تەلەكوممۋنيكاتسيا قىزمەتتەرىن جاقسارتۋ، IT كومپانيالاردىڭ ونىمدەرىن حالىقارالىق نارىققا شىعارۋ، قىزمەت ەكسپورتىنىڭ كولەمىن ارتتىرۋ، ەكى ەلدىڭ تەحنوپاركتەرى اراسىنداعى ىنتىماقتاستىقتى كەڭەيتۋ.
بەيجىڭدە نۇرعيسا تىلەنديەۆتىڭ 100 جىلدىق مەرەيتويىنا ارنالعان «نۇرعيسا- ءالقيسسا» اتتى كونتەرت ءوتتى - «حالىق گازەتى»
21-مامىر كۇنى قىتايدىڭ استاناسى بەيجىڭ قالاسىندا قازاقستاننىڭ كورنەكتى كومپوزيتورى، كۇيشى، ديريجەر نۇرعيسا تىلەنديەۆتىڭ 100 جىلدىق مەرەيتويىنا ارنالعان «نۇرعيسا- ءالقيسسا» اتتى مەرەيتويلىق كونسەرت ءوتتى، دەپ حابارلايدى قىتايدىڭ «حالىق گازەتى» باسىلىمى.
قىتايلىق ب ا ق-تىڭ مالىمەتىنشە، مادەني ءىس-شاراعا قىتاي مەن قازاقستان رەسمي تاراپتارىنىڭ وكىلدەرى، قازاقستاننىڭ قىتايداعى ەلشىسى شاحرات نۇرىشەۆ، شانحاي ىنتىماقتاستىق ۇيىمىنىڭ باس حاتشىسى نۇرلان ەرمەكبايەۆ، الماتى وبلىسىنىڭ اكىمى مارات سۇلتانعازيەۆ، بەلگىلى مۋزىكانتتار، عالىمدار، ەكى ەل اراسىندا جۇمىس جاسايتىن كومپانيا وكىلدەرى قاتىسقان.
الماتى وبلىسىنىڭ اكىمى مارات سۇلتانعازيەۆ قىتايدا قازاقستاننىڭ ۇلى كۇيشىسىنىڭ مەرەيتويىن اتاپ ءوتۋدى قىتاي- قازاقستان ەكى ەل دوستىعىنىڭ كۋاسى سانايتىنىن ايتقان.
ايتا كەتەيىك، نۇرعيسا تىلەنديەۆ اتىنداعى «وتىرار سازى» قازاقستان مەملەكەتتىك اكادەميالىق فولكلورلىق- ەتنوگرافيالىق حالىق اسپاپتارى وركەسترى جينالعان جۇرتشىلىققا ءان مەن كۇيدەن شاشۋ شاشتى. كونسەرتتە «الاتاۋ»، «كەلە جاتىر قۇس قايتىپ»، «كۋا بول»، «سارجايلاۋ» سىندى تاماشا اندەر ورىندالدى.
ءتىل جانە ونەر يران مەن قازاقستان اراسىنداعى مادەني ىنتىماقتاستىق جولىنداعى بايلانىس كوپىرلەرى - Parstoday
تەھراننىڭ مادەنيەت جانە يسلامدىق باعدار ءمينيسترى قازاقستاننىڭ تەھرانداعى ەلشىسىمەن كەزدەسۋىندە، يران مەن قازاقستاننىڭ ەكى ەلىنىڭ مادەني جانە تاريحي ۇقساستىقتارى كوپ ەكەنىن ايتتى.
سونداي-اق يراننىڭ مادەنيەت جانە يسلامدىق باعدار ءمينيسترى ابباس سالەحي ەكى ەلدە يران مەن قازاقستاننىڭ مادەني اپتالىقتارىنىڭ وتكىزىلۋىن قۇپتاعان. ونىڭ ايتۋىنشا، يراندا جىل سايىن 80 نەن 100 گە دەيىن كوركەم فيلم شىعارىلادى، كينو سالاسىندا ءوزارا تۇسىنىستىك مەموراندۋمىنىڭ جاسالۋى قازاقستانمەن ىنتىماقتاستىقتاعى ماقساتتارىمىزعا جەتۋىمىزگە كومەكتەسەدى.
بۇل تۋرالى وسى اپتادا يراندىق Parstoday اقپارات اگەنتتىگى حابارلاعان.
سالەحي ءفارابيدى فيلوسوفيا الەمىندەگى يران مەن قازاقستان دەگەن ەكى حالىقتى بايلانىستىرۋدا ءتيىمدى بولاتىن بايلانىستىرۋشى نۇكتە رەتىندە اتادى. ول يرانداعى فارابيتانۋ بويىنشا مۇمكىندىك زور، ويتكەنى يرانداعى فيلوسوفيالىق اعىم ءۇزىلىسسىز جالعاستى، سوندىقتان يرانداعى فارابيتانۋ سالاسىندا جاقسى جۇمىس ىستەۋگە بولاتىنىن ايتقان.
سونىمەن قاتار سالەحي ءتىلدىڭ ەكى ەل اراسىندا كوپىر بولا الاتىنىنا جانە ءتىل ءبىلىمىنىڭ ماڭىزدى سالا بولاتىنىنا نازار اۋدارعان. ونىڭ پىكىرىنشە، وسى سالا بويىنشا، ونەردى دە وسى باعىتتا قاراستىرۋعا بولادى. مىسالى، كلاسسيكالىق، زاماناۋي جانە ايماقتىق مۋزىكا سالالارىندا ورتاق قارىم- قاتىناس جاساۋ ءۇشىن ماڭىزدى سالالار بار ەكەن.
سونداي- اق وسى اپتادا ParsToday باسىلىمىندا «يراندا حريستياندىققا رۇقسات ەتىلگەن بە؟» دەگەن تاقىرىپتاعى اقپارات جارىق كوردى. اتالعان شاعىن ماقالا «يراندا حريستياندىققا رۇقسات ەتىلگەن بە؟» دەگەن سۇراقپەن باستالعان.
يراندىق باسىلىمدا بۇل سۇراقتىڭ جاۋابىن يراندىق حريستيان قاۋىمدارىنىڭ كۇندەلىكتى ومىرىنەن ىزدەۋگە بولاتىنى ايتىلادى. سونىمەن قاتار تاريحي شىركەۋلەر يلاھي دىندەردىڭ بەيبىت قاتار ءومىر ءسۇرۋىنىڭ سيمۆولى رەتىندە مەشىتتەردىڭ جانىندا ورنالاسقانى تىلگە تيەك ەتىلەدى.
ParsToday اگەنتتىگىنىڭ حابارلاۋىنشا، كەيبىر شەتەلدىك ب ا ق-تىڭ پىكىرىنە قاراماستان، يراندىق حريستياندار تەڭ قۇقىقتى ازاماتتار رەتىندە تانىلىپ قانا قويماي، ەلدىڭ ساياسي قۇرىلىمىندا بەلسەندى ۇستانىمعا يە ەكەن. بۇل تۋرالى تولىعىراق اتالعان ماقالادان وقۋعا بولادى.
VII ەتنوسپورت فەستيۆالى ءداستۇردى، وتباسىن جانە جاھاندىق بىرلىكتى جاڭعىرتادى - TRT
ىستانبۋلداعى اتاتۇرىك اۋەجايىندا وسى اپتادا 7- ەتنوسپورت مادەنيەت فەستيۆالى باستالدى. بۇل شارا ءداستۇرلى ويىندار، مۋزىكا جانە ورتاق ادامگەرشىلىك قۇندىلىقتاردى كورسەتكەن ءتۇرلى ءتۇستى راسىممەن اشىلدى.
بۇل تۋرالى سەنبى كۇنى تۇركيا راديو تەليەۆيزيا پورتالى حابارلادى.
اتالعان ب ا ق-تىڭ كەلتىرگەن مالىمەتتەرىنە سۇيەنسەك، الەمدىك ەتنوسپورت كونفەدەراتسياسى (WEC) ۇيىمداستىرعان بۇل ءتورت كۇندىك شارا 22-مامىردا باستالىپ، 25-مامىردا اياقتالادى. فەستيۆالگە 35 ەلدەن 1000 نان استام سپورتشى قاتىسىپ، ورتاق مادەني مۇرانى جاڭعىرتىپ جاتىر.
بيىلعى فەستيۆالدىڭ «ءداستۇر وتباسىنان باستالادى» دەگەن تاقىرىبى تۇركيا پرەزيدەنتى رەجەپ تايىپ ەردوعاننىڭ 2025 -جىلدى «وتباسى جىلى» دەپ جاريالاۋىمەن ۇندەسەدى.
TRT- نىڭ دەرەگىنشە، ونەر قويىلىمدارى، ينتەراكتيۆتى شەبەرلىك ساباقتارى جانە مادەني كورمەلەر ارقىلى فەستيۆال تاريحي قۇندىلىقتاردىڭ زاماناۋي الەمدە قالاي جاڭعىرتىلاتىنىن كورسەتەتىن ءتىرى كۋالىككە اينالدى.
الەمدىك ەتنوسپورت كونفەدەراتسياسىنىڭ پرەزيدەنتى بيلال ەردوعان اشىلۋ سالتاناتىندا فەستيۆالدىڭ كەڭ اۋقىمدى ميسسياسىن اتاپ ءوتىپ، مادەني مۇرانى ساقتاۋ ۇلتتىق جانە جاھاندىق جاۋاپكەرشىلىك ەكەنىن ايتقان.
اۆتور
بەيسەن سۇلتان ۇلى
