قازاق قىز-كەلىنشەكتەرى جاسىنا قاراي قانداي باسكيىم كيگەن؟
استانا. قازقپارات - بۇگىن ءبىز قازاق قىز-كەلىنشەكتەرىنىڭ جاسىنا قاراي كيگەن باسكيىم ۇلگىلەرىن ۇسىنامىز.
- 0-3 جاس (نارەستە، ءسابي) - ءيت تاقيا، سىرما، كەپەش تاقيا؛
- 5 جاس - شىت تاقيا؛
- 7-13 جاس - ۇكىلى تاقيا، تەپەش، جۇرىندى بورىك (ءتورت ساي، شوشاق توبەلى ) توپى، كوز ءتاتى، ءۇلبىرلى ۇكىلەگەن جاننات بورىك؛
- 13-تەن كەيىن (ءبىر مۇشەل) وتاۋ يەسى - سورابا، جاناتپەن جيەكتەلگەن قاۋىرسىن قاداعان دارەجەلى قارقارا بورىك. بويجەتكەن قىزدىڭ باسكيىمىنىڭ ەڭ مارتەبەلىسى - قارقارا بورىك. قارقارا - بيىك تاۋدى مەكەندەيتىن سيرەك كەزدەسەتىن، قاۋىرسىنى جان- جاعىنا ۇلپىلدەپ ورنەكتەرى توگىلىپ تۇراتىن ەرەكشە كورىكتى قۇس؛
- 25 جاس (ەكىنشى مۇشەل) - ءسات قۇندىزدى سالتاناتتى ءتاج ساۋكەلە، زەرلەنگەن شاشاقتى قاسابا. قالىڭدىق ۇيلەنۋ تويىندا ساۋكەلە نەمەسە قاسابا(قىمبات ماتادان تىگىلگەن) دا كيگەن. ال جاس كەلىنشەكتەر باسىنا سۇلاما نەمەسە ساۋكەلە جاۋلىق كيگەن، بۇل جەردە ونىڭ ەكىنشى اتاۋى تەگىن بەرىلمەگەن، سەبەبى، ونىڭ شىعۋ تەگى ساۋكەلە ءتارىزدى پىشىمگە بايلانىستى. جاس كەلىنشەكتەر تارتاتىن شىلاۋىشتاردىڭ بۇرىشىن كەستەلەپ، توبەسىنەن شاشاق توگىلتىپ، كەستەلەنگەن توبەلدىرىك تە پايدالانادى ءبىر-ەكى بالانى دۇنيەگە اكەلگەن 20-24 جاستاعى جاس كەلىنشەك (ەكىنشى مۇشەلىندە) لاچەك اتتى باسكيىم كيگەن؛
- 37 جاس (ءۇشىنشى مۇشەل) - كيمەشەك. كيمەشەككە قوسىمشا بولشەكتەردىڭ اتاۋلارى: شىلاۋىش، بۇرماشا جاۋلىق، سالدە، كۇندىك، قۇندىز بورىك، شىت بايلاما، جەلەك، سالى (ءشالى). كۇندىك جاۋلىق تارتقان ايەل كۇنگە قارسى جۇرگەندە، كۇندىكتىڭ ماڭدايىنداعى ءۇشبۇرىشتى قاتتامانى ەڭكەيتىپ ءتۇسىرىپ قويادى. كۇندىك جاۋلىق كيمەشەكتىڭ سىرتىنان جارتىلاي ورالىپ، تارتىلادى؛
- 49 جاستا (ءتورتىنشى مۇشەل) ءسان-سالتاناتى بيازىلاۋ كيمەشەك؛
- 50-60 جاس ارالىعىنداعى ايەل اق ماتادان لاچەك كيەدى. ونىڭ قازاق كيمەشەگى سىندى بەتكە ورالعان ويىعى، اشىق نەمەسە جابىق تىگىلگەن توبەلدىرىگى مەن كۇلاپاراسى بار؛
- 61-73 جاس ارالىقتارى كەيۋانا دەڭگەيىنە جاتادى. بۇل كەزەڭدە باسكيىمنىڭ جەڭىلدەۋ جالاڭ كيمەشەك، يەكشە، بايلاۋىش تۇرلەرىن كيگەن.
دەرەكتەر «كيەلى كيمەشەك» فوتوالبومىنان الىندى
