قازاق مەديتسيناسىنىڭ اڭىزى نينا كايۋپوۆا دۇنيەدەن ءوتتى

الماتى. KAZINFORM - كورنەكتى دارىگەر، عالىم، ۇستاز جانە قوعام قايراتكەرى نينا كايۋپوۆا ومىردەن ءوتتى. بۇل تۋرالى اسفەندياروۆ اتىنداعى قاز ۇ م ۋ باسپا ءسوز قىزمەتى حابارلادى.

نينا كايۋپوۆا - قازاق مەديتسيناسىنىڭ دامۋ تاريحىندا وشپەس ءىز قالدىرعان تۇلعا. ول ەلىمىزدەگى قازىرگى اكۋشەرلىك-گينەكولوگيالىق قىزمەتتىڭ قالىپتاسۋىنا ەلەۋلى ۇلەس قوسىپ، اكۋشەرلىك، گينەكولوگيا جانە پەريناتولوگيا عىلىمي ورتالىعىنىڭ نەگىزىن قالاعانداردىڭ ءبىرى بولدى.

نينا اميروۆنا مەديتسينا سالاسىندا جارتى عاسىردان استام ۋاقىت ەڭبەك ەتتى. وسى جىلدار ىشىندە 30 مىڭنان استام بالانىڭ ومىرگە كەلۋىنە سەبەپكەر بولدى. 25 عىلىم دوكتورىن، 40 عىلىم كانديداتىن تاربيەلەپ شىعاردى. عىلىمي ەڭبەكتەرىنىڭ قاتارىندا 19 مونوگرافيا مەن 400 دەن استام ماقالا بار. سوڭعى جىلدارى دا بەلسەندىلىگىن جوعالتپاي، جەتەكشى عىلىمي قىزمەتكەر ءارى سالالىق جۋرنالدىڭ باس رەداكتورى رەتىندە جۇمىسىن جالعاستىردى.

- س. ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ۇجىمى نينا اميروۆنا كايۋپوۆانىڭ دۇنيەدەن وزۋىنا بايلانىستى ونىڭ وتباسى مەن تۋعان-تۋىستارىنا قايعىرا كوڭىل ايتادى. نينا كايۋپوۆا كاسىبي بىلىكتىلىگىمەن، تەرەڭ پاراساتىمەن، بيىك ادامگەرشىلىگىمەن، ۇستازدىق مەيىرىمىمەن جانە ەلگە دەگەن ادالدىعىمەن ەستە قالادى. ونىڭ ءومىر جولى حالىققا قالتقىسىز قىزمەت ەتۋدىڭ جانە شىنايى بەرىلگەندىكتىڭ جارقىن ۇلگىسى، - دەلىنگەن ۋنيۆەرسيتەت جازباسىندا.

ەسكە سالايىق، بۇعان دەيىن ەلدە 9 مىڭنان استام اكۋشەر ەڭبەك ەتەتىنىن جازعانبىز.