قازاق كينوسى قىتاي فەستيۆالىندە كورسەتىلدى
استانا. قازاقپارات - 2025-جىلدىڭ 3-7-ماۋسىم ارالىعىندا قىتايدىڭ چۋنتسين قالاسىنداعى يۋنچۋان اۋدانىندا شانحاي ىنتىماقتاستىق ۇيىمىنا (ش ى ۇ) مۇشە ەلدەردىڭ حالىقارالىق كينوفەستيۆالى باستالدى. بۇل تۋرالى مادەنيەت جانە اقپارات مينيسترلىگىنىڭ باسپا ءسوز قىزمەتى حابارلادى.
بۇل مادەني ءىس-شارا شىۇ ەلدەرى اراسىنداعى گۋمانيتارلىق بايلانىستاردى دامىتۋعا جانە كينو سالاسىنداعى ىنتىماقتاستىقتى كەڭەيتۋگە باعىتتالعان.
ءىس-شاراعا قازاقستاندىق دەلەگاتسيا مادەنيەت جانە اقپارات مينيسترلىگى، ۇلتتىق كينونى قولداۋ مەملەكەتتىك ورتالىعى، ش. ايمانوۆ اتىنداعى «قازاق فيلم» كينوستۋدياسى وكىلدەرى، سونداي-اق ەلىمىزدىڭ تانىمال پروديۋسەرلەرى مەن رەجيسسەرلەرى قاتىسىپ جاتىر.
بيىلعى فەستيۆالدىڭ «التىن كامەليا» اتتى نەگىزگى بايقاۋ باعدارلاماسىنا 10 ەلدەن 20 فيلم ەندى. ءار ەلدەن ەكى تۋىندى ۇسىنىلعان.
قازاقستاندىق «نابات وپەراتسياسى» مەن «اعايىندىلار» فيلمى قىتاي كورەرمەنىنە كورسەتىلەدى.
«نابات وپەراتسياسى» (رەجيسسەر راشيد سۇلەيمەنوۆ) - قازاقستان قۇقىق قورعاۋ ورگاندارى جۇرگىزگەن ءىرى ارنايى وپەراتسيا تۋرالى شىنايى وقيعاعا نەگىزدەلگەن دراما. فيلم «قازاق فيلم» كينوستۋدياسىندا ق ر مادەنيەت جانە اقپارات مينيسترلىگى، قازاقستاننىڭ ۇلتتىق كينو ورتالىعىنىڭ قولداۋىمەن تۇسىرىلگەن.
«اعايىندىلار» (رەجيسسەر دارحان تولەگەنوۆ) - 15 تەن استام حالىقارالىق جۇلدەگە يە بولعان فيلم. كارتينا گەرمانيادا وتكەن Oldenburg حالىقارالىق كينوفەستيۆالىندە Spirit of Cinema ماراپاتىن العان. فيلمدى Golden Man Media ستۋدياسى ق ر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرگەن.
فەستيۆالدىڭ قازىلار القاسىنا شىۇ ەلدەرىنەن 9 بەلگىلى كينەماتوگراف ەنگەن. ولاردىڭ ىشىندە قازاقستاندىق پروديۋسەر تاسبولات مەرەكەنوۆ تە بار. قازىلار القاسىنىڭ ءتوراعاسى - قىتايدىڭ تانىمال پروديۋسەرى ءارى سەناريستى جەن چجۋنلۋن.
جەڭىمپازدار 10 نوميناتسيا بويىنشا انىقتالادى. اتاپ ايتساق، «ۇزدىك فيلم»، «ۇزدىك رەجيسسەر»، «ۇزدىك سەناري» جانە اكتەرلىك شەبەرلىك نوميناتسيالارى بار.
كينوفەستيۆال اياسىندا 11 نەگىزگى ءىس-شارا جوسپارلانعان، ولاردىڭ قاتارىندا بايقاۋ فيلمدەرىنىڭ كورسەتىلىمدەرى، ىنتىماقتاستىققا ارنالعان فورۋمدار، كينوتەحنولوگيا كورمەسى مەن گالا-كونسەرت بار.
ايتا كەتەلىك رەسەي مەن قازاقستان بىرلەسىپ تۇسىرگەن فيلم شانحاي كينوفەستيۆالىندە جۇلدە العان ەدى.
