قازاق كاسكادەرلەرى ريدلي سكوتتىڭ «ناپولەون» تاريحي فيلمىنە ءتۇستى
قازاقستاندىق كاسكادەرلەر ريدلي سكوتتىڭ اتاقتى تاريحي فيلمىندە ءتۇرلى تريۋكتەردى ورىنداپ، تاعى ءبىر بەلەستى باعىندىردى، دەپ حابارلايدى Kazinform.
ءۇش كۇن بۇرىن اتى اڭىزعا اينالعان رەجيسسەر ريدلي سكوتتىڭ «ناپولەون» فيلمى پروكاتقا شىقتى.
اتالعان فيلمدى تۇسىرۋگە قازاقستاندىق Nomad Stunts كاسكادەرلەرى دە اتسالىسقان. بۇل جايلى ۇيىم ءوزىنىڭ الەۋمەتتىك جەلىدەگى پاراقشاسىندا حابارلادى.
«قورجىنىمىزدى تولىقتىراتىن تاعى ءبىر جوبا!» دەپ ءسۇيىنشى سۇرادى كاسكادەرلەر.
Nomad Stunts جەتەكشىسى، ق ر ەڭبەك سىڭىرگەن قايراتكەرى جانداربەك كۇنعوجينوۆتىڭ ايتۋىنشا، ولاردى بۇل جوباعا تريۋك قويۋشى نيك پاۋەل ۇسىنعان. ول قازاقستاندىق جىگىتتەرمەن ءۇندىستانداعى فيلم تۇسىرىلىمىندە بىرگە جۇمىس ىستەگەن ەدى.
بۇل جوبادا كاسكادەرلەردىڭ ءبىرى مۇرات ەلكەنوۆ اكتەر رەتىندە دە ونەر كورسەتتى. ونىڭ ءرولىن ريدلي سكوتتىڭ ءوزى بەلگىلەپ بەرگەن.
قازاقستاندىقتار فيلمدە كازاكتاردىڭ رولىندە بوي كورسەتكەن.
«ناپولەون» — رەجيسسەر جانە پروديۋسەر ريدلي سكوتتىڭ دەۆيد سكارپا ستسەناريى جەلىسىمەن تۇسىرىلگەن ەپيكالىق تاريحي فيلمى. ناپولەون بوناپارتتىڭ بيلىككە كەلۋى جانە ايەلى دجوزەفينامەن اراقاتىناسى جايىندا باياندايدى.
ناپولەوندى حواكين فەنيكس ء(ارى پروديۋسەر)، ال جوزەفينانىڭ ءرولىن ۆانەسسا كيربي سومدايدى.
ءتۇسىرىلىم وتكەن جىلدىڭ قاڭتارىندا باستالدى.
ەسكە سالا كەتەيىك، «Nomad Stunts» كاسكادەرلەرى «Disney» تۇسىرگەن «مۋلان»، Netflix ءتىڭ «توميريس»، «ماركو پولو»، «كورولگە حات»، «ءامىر تەمىر»، كيانۋ ريۆز باستى رولدە ويناعان «47 رونين»، «نەۋدەرجيمىە 2»، «رەكەتير 2»، «اناعا جول»، «شال» سىندى فيلمدەرگە قاتىسقان.
ولار سونداي- اق HBO مەن Apple TV+ سەرۆيستەرى جانە Universal ستۋديالارىمەن جۇمىس جاسايدى.
توپتى 2000 -جىلى تريۋك قويۋشى، قازاقستاننىڭ ەڭبەك سىڭىرگەن قايراتكەرى جايداربەك كۇنعوجينوۆ قۇرعان بولاتىن.
Nomad Stunts جەتەكشىسى جايداربەك كۇنعوجينوۆ بۇعان دەيىن «توميريس» فيلمىندەگى تريۋكتەر ءۇشىن «تاۋرۋس» سىيلىعىن جەڭىپ العان ەدى.
