قازاق ءتىلى مەن ادەبيەتىنەن 1,7 ميلليون وقۋشى ەمتيحان تاپسىرادى
استانا. KAZINFORM - بيىل مەكتەپ ءبىتىرۋ اتتەستاتتارىن تۇلەكتەرگە تاپسىرۋ سالتاناتى 18-20-ماۋسىم ارالىعىندا وتكىزىلەدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ ءتوراعاسى قانىبەك جۇماشيەۆ ايتتى.
- 2024-2025 وقۋ جىلىنىڭ قورىتىندىسى بويىنشا ۇلتتىق ءبىلىم بەرۋ دەرەكتەر قورىنىڭ مالىمەتتەرىنە سايكەس، ەلىمىزدە بارلىعى 8 مىڭنان استام مەكتەپ بار، وندا 4 ميلليونعا جۋىق وقۋشى ءبىلىم الۋدا. بيىل 9- سىنىپتى 364 مىڭنان استام بالا اياقتايدى. ولار الداعى ۋاقىتتا 10-سىنىپتى جالعاستىرۋ نەمەسە كوللەدجگە ءتۇسۋ تۋرالى شەشىم قابىلدايتىن بولادى. سونداي- اق 217 مىڭنان استام تۇلەك 11- سىنىپتى ءتامامدايدى. وقۋ-اعارتۋ ءمينيسترىنىڭ بۇيرىعىنا سايكەس، مەكتەپتەردە وقۋ مەرزىمى ءداستۇرلى تۇردە 34 اپتاعا سوزىلادى، وقۋ 25 -مامىردا اياقتالادى، - دەدى ول.
ونىڭ ايتۋىنشا، ورتا ءبىلىم بەرۋ ۇيىمدارىندا ساباق اپتاسىنىڭ بەس كۇندىك ەكەنىن ەسكەرە وتىرىپ، 1-10- سىنىپ وقۋشىلارى ءۇشىن سوڭعى ساباق كۇنىن 23 -مامىردا «ءبىلىمىم - وتانىما» تاقىرىبىندا ءبىرىڭعاي سىنىپ ساعاتى فورماتىندا وتكىزۋ تۋرالى ۇسىنىم بەرىلدى. سىنىپ ساعاتىنىڭ ماقساتى: بالالاردى جىل بويى العان ءبىلىمىنىڭ ناتيجەسىن قورىتىندىلاي بىلۋگە تاربيەلەۋ.
- 11-سىنىپ تۇلەكتەرى ءۇشىن سالتاناتتى ءىس-شارا مەكتەپ اكىمشىلىگىنىڭ شەشىمىمەن 23 نەمەسە 24 -مامىردا مەكتەپ قابىرعاسىندا وتكىزىلەدى. سالتاناتتى ءىس-شارانى وتكىزۋ فورماتىن، قاتىسۋشىلار قۇرامىن ءبىلىم بەرۋ ۇيىمدارى وزدەرى انىقتايدى. سونىمەن قاتار وقۋ-اعارتۋ مينيسترلىگىنىڭ بۇيرىعىنا سايكەس 9 جانە 11-سىنىپ وقۋشىلارى ءۇشىن قورىتىندى مەملەكەتتىك ەمتيحانداردىڭ مەرزىمدەرى ايقىندالدى. 9-سىنىپ وقۋشىلارى ءۇشىن قورىتىندى مەملەكەتتىك ەمتيحاندار 2025 -جىلعى 29 -مامىر مەن 10-ماۋسىم ارالىعىندا وتەدى دەپ جوسپارلانۋدا. ال 11-سىنىپ تۇلەكتەرى 30 -مامىر مەن 16-ماۋسىم ارالىعىندا مەملەكەتتىك ءبىتىرۋ ەمتيحاندارىن تاپسىرادى، - دەدى قانىبەك جۇماشيەۆ.
كوميتەت ءتوراعاسى وتكەن جىلى تۇڭعىش رەت بارلىق مەكتەپتە وقىتۋ تىلىنە قاراماي قازاق ءتىلى جانە ادەبيەت پانىنەن ارالىق ەمتيحاندار ەنگىزىلگەنىن ەسكە سالدى.
- ارالىق ەمتيحاندى 5، 6، 7، 8، 10- سىنىپ وقۋشىلارى 27-31 -مامىر ارالىعىندا تاپسىرادى. وعان 1,7 ميلليون وقۋشى قاتىسادى. بۇل ەمتيحاننىڭ ماقساتى - وقۋشىلاردىڭ مەملەكەتتىك ءتىلدى وقىپ ۇيرەنۋ دەڭگەيىن انىقتاۋ جانە بىلىمدەرىن شىڭداۋعا داعدىلاندىرۋ. بۇل ەمتيحان نەگىزىنەن 4 باعىتتا وتەدى: تىڭدالىم، ايتىلىم، وقىلىم، جازىلىم. بۇل حالىقارالىق CREF ستاندارتىنا سايكەس. سونىمەن قاتار، مەكتەپ ءبىتىرۋ اتتەستاتتارىن تۇلەكتەرگە تاپسىرۋ سالتاناتىن 18-20 -ماۋسىم ارالىعىندا وتكىزۋ جوسپارلانعان»، - دەدى ول.
ايتا كەتەيىك، ورتا ءبىلىم بەرۋ جۇيەسىندە كادر تاپشىلىعى تولىق جويىلدى.
اۆتور
مارلان جيەمباي
