قازاق عالىمى جاپونيا ۋنيۆەرسيتەتىنىڭ ۆيتسە-پرەزيدەنتى بولدى
استانا. KAZINFIRM - قازاقستاندىق عالىم، مەديتسينا عىلىمدارىنىڭ دوكتورى، پروفەسسور سەرىك مەيىرمانوۆ جاپونيانىڭ بەدەلدى ريتسۋمەيكان ازياتتىق-تىنىق مۇحيت ۋنيۆەرسيتەتىنىڭ ۆيتسە-پرەزيدەنتى بولىپ تاعايىندالدى.
جاپونيانىڭ جوعارى وقۋ ورنىنىڭ باسشىلىق قۇرامىنا العاش رەت قازاقستان ازاماتى كوتەرىلدى، دەپ حابارلايدى Ulysmedia.kz.
ۆيتسە-پرەزيدەنت لاۋازىمىنا تاعايىندالعانعا دەيىن پروفەسسور سەرىك مەيىرمانوۆ APU ۋنيۆەرسيتەتىندە اكادەميالىق ىستەر جونىندەگى دەكان (Dean of Academic Affairs) قىزمەتىن ءۇش جىل بويى اتقارىپ، وقۋ باعدارلامالارى مەن ۋنيۆەرسيتەتتەگى اكادەميالىق ورتانى دامىتۋعا ەلەۋلى ۇلەس قوستى. ونىڭ مەديتسينا سالاسىنداعى جوعارى ءبىلىمى (MD ،PhD) مەن تاجىريبەسى جاڭا قىزمەتكە لايىق ەكەندىگىن دالەلدەدى.
تۋعان ەل مەن حالىقارالىق بايلانىستار
پروفەسسور مەيىرمانوۆ جوعارى مەديتسينالىق ءبىلىمدى قازاقستاندا الىپ، كەيىن جاپونيادا PhD دارەجەسىن قورعاعان. سونىمەن قاتار، ول قازاقستان رەسپۋبليكاسى پرەزيدەنتى جانىنداعى ۇلتتىق عىلىم جانە تەحنولوگيالار كەڭەسىنىڭ مۇشەسى رەتىندە ەلىمىزدىڭ عىلىمي دامۋىنا بەلسەندى اتسالىسىپ كەلەدى.
ۋنيۆەرسيتەت جانە ونىڭ حالىقارالىق دەڭگەيى
ريسۋمەيكان ازياتتىق-تىنىق مۇحيت ۋنيۆەرسيتەتى (APU) جاپونيانىڭ بەپپۋ قالاسىندا ورنالاسقان جانە الەمنىڭ 100 دەن استام ەلىنەن 6000 عا جۋىق ستۋدەنت ءبىلىم الادى. وقىتۋشىلار قۇرامىنىڭ جارتىسىنان استامى - شەتەلدىك ماماندار. ۋنيۆەرسيتەتتىڭ باستى ماقساتى - جاڭا بۋىننىڭ جاھاندىق كوشباسشىلارىن دايارلاۋ.
عالىمنىڭ تاعايىندالۋى تۋرالى پىكىرى
«بۇل - مەن ءۇشىن زور قۇرمەت ءارى ۇلكەن جاۋاپكەرشىلىك. ۋنيۆەرسيتەت باسشىلىعىنا بىلدىرگەن سەنىمى ءۇشىن العىسىم شەكسىز. APU - راسىمەن دە ەرەكشە ءبىلىم ورداسى، جانە مەن ونىڭ وركەندەۋى ءۇشىن ەڭبەك ەتۋدى جالعاستىراتىنىما قۋانىشتىمىن. سونىمەن قاتار، حالىقارالىق اكادەميالىق قاۋىمداستىقتا قازاقستاندى تانىستىرا الاتىنىمدى ماقتان تۇتامىن»، - دەپ اتاپ ءوتتى سەرىك.
سەرىك مەيىرمانوۆ 2025 -جىلدىڭ 1 -ساۋىرىنەن باستاپ جاڭا قىزمەتىنە رەسمي تۇردە كىرىسەدى.
