قازاق بوكسشىلارىنىڭ فوتوسى پاريج كوشەلەرىنە ءىلىندى
پاريج. KAZINFORM - قازاقستاندىق بوكسشىلاردىڭ فوتوسى وليمپيادا قارساڭىندا پاريج تورىنە ءىلىندى. بۇل جايىندا قازاقستان بوكس فەدەراتسياسىنان حابارلاندى.
اتاپ ايتقاندا، ساكەن بيبوسىنوۆ، قامشىبەك قوڭقابايەۆ، نۇربەك جانە ايبەك ورالبايلاردىڭ فوتوسى پاريج كوشەلەرىنە ىلىنگەن.
ەسكە سالايىق، قازاق بوكسشىلارى پاريجگە كەشە، 21 -شىلدەدە اتتاندى.
بىلعارى قولعاپ شەبەرلەرى الماتى اۋەجايىنان فرانسياعا ۇشتى. بورتتا ون وليمپيادا ءۇمىتى، باپكەرلەر، سپاررينگ سەرىكتەستەر جانە عىلىمي توپ مۇشەلەرى بار.
25-شىلدە جەرەبە تارتۋ ءراسىمى وتەدى. سول كۇنى وتاندىق بوكسشىلاردىڭ قاي ۋاقىتتا شارشى الاڭعا شىعاتىنى انىقتالادى.
ايتا كەتەيىك، پاريج وليمپياداسىنا بوكستان ەرلەر قۇراماسى تولىق قۇرامدا بارا جاتىر.
ەرلەردەن ساكەن بيبوسىنوۆ، ماحمۇد سابىرحان، مۇحاممەدسابىر بازارباي ۇلى، اسلانبەك شىمبەرگەنوۆ، اعايىندى نۇربەك ورالباي مەن ايبەك ورالباي جانە قامشىبەك قوڭقابايەۆ ەل نامىسىن قورعاسا، ايەلدەردەن نازىم قىزايباي، كارينا يبراگيموۆا جانە ۆالەنتينا حالزوۆا ءۇش سالماقتا شارشى الاڭعا شىعادى.
ەستەرىڭىزگە سالا كەتەيىك، قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىزدىڭ العاشقى لەگى پاريجدەگى وليمپيادالىق قالاشىققا بارىپ ۇلگەردى.
ايتا كەتەيىك، 4 كۇننەن كەيىن تورتكۇل دۇنيە كوز تىگەتىن ءتورتجىلدىق دودا باستالادى.
قازاقستان قۇراماسى اتالعان ويىندارعا سپورتتىڭ 25 تۇرىنەن 92 جولداما جەڭىپ العان.
