قازاق ايەلى عارىشقا قاشان ۇشادى؟
استانا. KAZINFORM - قازاق ايەلى قاشان عارىشقا اتتانادى؟ ەلىمىزدە مۇنداي جوسپار كوزدەلگەن بە؟ جالپى، بۇرىن ۇشقان عارىشكەرلەرىمىز قانداي جاڭالىقتار اشتى؟ عارىشقا كىمدەر ۇشا الادى؟
Massaget.kz ءتىلشىسى اەروعارىش كوميتەتىنە ساۋال جولداعان ەدى.
وسىعان دەيىن قازاقستاندىق عارىشكەرلەر توقتار اۋباكىروۆ (1991)، تالعات مۇسابايەۆ (1994، 1998-جانە 2001-جىلدار) جانە ايدىن ايىمبەتوۆتىڭ (2015) حالىقارالىق عارىش ستانتسياسىندا عارىشتىق زەرتتەۋلەر مەن تاجىريبەلەر جاسادى. جالپى العاندا بەس باعدارلامانى ىسكە اسىردى.
«عارىشكەرلەردى ۇشىرۋ ارقىلى جۇزەگە اسىرىلعان باعدارلامالار رەسپۋبليكادا قۇرىلىپ جاتقان عارىش سالاسىنىڭ زاماناۋي عىلىمي-تەحنيكالىق الەۋەتىن قالىپتاستىرۋعا شەشۋشى ۇلەس قوستى. ولاردى ىسكە اسىرۋ ناتيجەسىندە، قازاقستان جەردى عارىشتان زەرتتەۋدىڭ تەوريالىق نەگىزدەرى سالاسىندا دا، ەكونوميكانىڭ ءارتۇرلى سالالارىندا عارىشتىق باقىلاۋ تەحنولوگيالارىن تاجىريبەدە قولدانۋ جاعىنان دا الەمنىڭ جەتەكشى ەلدەرىنىڭ دەڭگەيىنە جەتتى. بۇل رەتتە، عارىشتا وتكىزىلگەن عىلىمي تاجىريبەلەردىڭ ناتيجەلەرى جەر شارىنداعى ەكونوميكالىق دامۋدىڭ، ادامزاتقا قاجەتتى ءتۇرلى يگىلىكتەردى جۇزەگە اسىرۋدىڭ ماڭىزدى تەتىگى دەسەك تە بولادى»، - دەدى كوميتەت.
قازاقستاننىڭ كەلەسى عارىشكەرى عارىشقا قاشان ۇشادى؟
تاعى دا ءبىر قازاقستاندىقتىڭ عارىشقا ۇشۋىنا كەلەتىن بولساق، عارىشكەردى ۇشىرۋدىڭ باستى ماقساتى - عارىشتىق زەرتتەۋلەر مەن ەكسپەريمەنتتەر جۇرگىزۋ، عىلىمدى دامىتۋ.
«ياعني، ەڭ الدىمەن عارىشتا تاجىريبەلەر وتكىزۋ ءۇشىن عىلىمي باعدارلاما بولۋى كەرەك. بۇل ماڭىزدى عىلىمي دايىندىق پەن مۇقيات جوسپارلاۋدى قاجەت ەتەدى. عارىشتىق ۇشۋلار قاۋىپتى جانە كۇردەلى ءىس-شارالاردىڭ جيىنتىعى ەكەنىن ەسكەرۋ ماڭىزدى. عىلىمي باعدارلامانى ازىرلەۋ كەزىندە ءبىز ىقتيمال قاۋىپتەر مەن ۇشۋ ماسەلەلەرىن تالداۋعا جانە الدىن الۋعا باسا نازار اۋدارامىز. قازىرگى ۋاقىتتا قازاقستاننىڭ جەتەكشى عىلىمي ۇيىمدارىمەن جانە جوعارى وقۋ ورىندارىمەن بىرلەسىپ، حالىقارالىق عارىش ستانسياسىندا ەكسپەريمەنتتەردىڭ التىنشى عىلىمي باعدارلاماسىنا دايىندالۋدا. جۇمىستاردىڭ كۇردەلى ءارى جان-جاقتى تالداۋدى قاجەت ەتەتىنىن ەسكەرىپ، قازاقستاندىق عارىشكەردىڭ قاي كەزدە ۇشاتىنىن ناقتى ايتۋ مۇمكىن ەمەس. بۇل باعىتتا جۇمىس جالعاسۋدا»، - دەپ جاۋاپ بەردى اەروعارىش كوميتەتى.
عاشىركەرلەر قالاي تاڭدالادى؟
عارىشقا كانديداتتاردى ىرىكتەۋ ارنايى قاعيداتتارمەن ىسكە اسىرىلادى. بۇل مينيسترلىكتىڭ 2015-جىلعى 28-ساۋىردەگى 493-بۇيرىعىمەن بەكىتىلگەن. ونىڭ ەڭ تومەنگى تالاپتارى وسىنداي:
«قازاقستان رەسپۋبليكاسىنىڭ ازاماتى بولۋعا ءتيىس. جاسى 18 دەن جوعارى جانە 40 جاستان اسپاۋى كەرەك جانە جوعارى ءبىلىمى بولۋى شارت. وسىعان بايلانىستى بولاشاقتا ايەلدەردە تاڭدالىپ، عارىشقا اتتانۋعا مۇمكىندىگى بار. باسىندا ايتقانىمىزداي، جالپى عارىش ماسەلەسىنىڭ كۇردەلىلىگىنە بايلانىستى ءالى دە ناقتى شەشىمدەر قابىلدانعان جوق»، - دەدى كوميتەت.
