قازاق انيماتورلارى 100 سەريالى مۋلتفيلمدەر جاساۋدى ۇسىندى
قازاقستاندا انيماتسيا سالاسىنا بەت بۇرعان جاستاردىڭ سانى ارتىپ كەلەدى. بۇگىندە ەلىمىزدە 40-تان استام ستۋديا بار. انيماتسيا- كرەاتيۆتى يندۋستريانىڭ اجىراماس بولىگى سانالادى. پرەزيدەنت قاسىم-جومارت توقايەۆ بىلتىر ءوزىنىڭ سايلاۋالدى باعدارلاماسىندا كرەاتيۆتى يندۋستريانى قولدايتىنىن ايتقان.
بيىلعى جولداۋىندا دا بۇل ماسەلەگە ەرەكشە نازار اۋداردى. وبلىستاردا كرەاتيۆتى يندۋستريا ورتالىقتارىن اشىپ، شىعارماشىل ادامداردىڭ ءونىمىن كوممەرتسيالاندىرۋعا كومەك كورسەتىلۋى كەرەك دەدى. سونداي-اق، كرەاتيۆتى يندۋستريا سۋبەكتىلەرىنە قولداۋ جاساۋعا ارنالعان شارالاردىڭ جەكە توپتاماسىن ازىرلەۋدى تاپسىردى.
بۇل «التىن ادام» انيماتسيالىق فيلمى. جوبا مۋلتيپليكاتور ونەرىنىڭ قارا شاڭىراعى «قازاق فيلم» كينوستۋدياسىندا جاسالىپ جاتىر. ناۋرىز ايىندا كورەرمەنگە جول تارتادى. بيىل قازاق انيماتسياسىنا 56 جىل. بۇگىندە قازاق مۋلتفيلمىنىڭ اتاسى اتانعان امەن قايداردىڭ جولىن قۋسام دەيتىن جاستار از ەمەس. قازىر ەلىمىزدە ءىرىلى-ۇساقتى 40 تان استام انيماتسيالىق ستۋديا بار. سولاردىڭ ءبىرىن ءدىلشات راحماتۋللين باسقارادى. تاپسىرىستىڭ 90 پروتسەنتى مەملەكەتتەن تۇسەدى.
قورجىنىندا «الپامىس»، «ەر تارعىن»، «قوبىلاندى»، «اقىلدى تەنتەكتەر» سياقتى ونداعان مۋلتفيلم بار. سوڭعى جاساعان «بەسىك جىرى» تۋىندىسى قازىردىڭ وزىندە تالاي بايقاۋدىڭ جۇلدەگەرى اتاندى.
«بۇل فيلم بۇكىل الەمدى اينالىپ شىقتى دەسە بولادى. ەڭ باستى جۇلدەمىز يسپانيادان كەلدى. ودان كەيىن لوندوننان، تۇركيادان. سوڭعىسى قىرعىزستاننان كەلدى. قۇداي قالاسا، جىلدىڭ سوڭىندا كورەسەتىلىمگە بەرەمىز»، دەيدى انيماتسيالىق ستۋديا جەتەكشىسى ءدىلشات راحماتۋللين.
ال مەيىرجان ساندىباي جەتەكشىلىك ەتەتىن ورتالىق قازىر نەگىزىنەن شەتەلمەن جۇمىس ىستەيدى. امەريكادان كەلىپ تۇسكەن ءبىر ويىننىڭ كوركەمدىك شەشىمىن، كەيىپكەرلەرىن، قورشاعان ورتاسىن جاساپ جاتىر. ولاردىڭ بۇعان دەيىن تۇسىرگەن «ءسابي» مۋلتفيلمى، «ءيت» قىسقا مەتراجدى فيلمى كوپشىلىكتىڭ كوزايىمىنا اينالعان. ال بىلتىر شىققان «شىراق» فيلمى 80 گە جۋىق كينوفەستيۆالدىڭ تىزىمىنە ەنگەن. ول ۇلى بريتانيادا وتكەن بايقاۋدا ەڭ ۇزدىك انيمتسيالىق فيلم نوميناتسياسىن جەڭىپ العان.
مەيىرجاننىڭ پىكىرىنشە ەل بولامىن دەسەك، ەڭ الدىمەن يۋتۋب پەن تەلەارنالارداعى كونتەنتتى تۇزەۋ كەرەك.
«ءبىزدىڭ انيماتسيالىق فيلمدەرىمىزدىڭ كوبى وتباسى قۇندىلىقتارىنا ارنالعان. وتباسى قۇندىلىقتارىن ساقتاۋ، وتباسى ينستيتۋتىن ساقتاپ قالۋ ماقساتىندا جۇمىس ىستەيدى. «شىراق» فيلمى دە قازىرگى تاڭداعى وتباسى جىلۋىنىڭ جوعالۋىنا سەبەپ بولىپ جاتقان جۇمىسباستىلىق، ەلەكتروندىق گادجەتتەرگە دەگەن تاۋەلدىلىك. سول ماسەلەنىڭ ءتۇيىنىن شەشۋگە تىرىسىپ، وزىندىك كوزقاراسىن وسى «شىراق» انيماتسيالىق فيلمىندە ۇسىندىق»، دەيدى انيماتسيالىق ستۋديانىڭ نەگىزىن قالاۋشىلاردىڭ ءبىرى مەيىرجان ساندىباي.
قازاق انيماتسيا تاريحىندا 200 دەن استام فيلم جاسالعان. بىلتىر «قازاق فيلم» كينوستۋدياسىندا «قازاقانيماتسيا» شىعارماشىلىق بىرلەستىگى قۇرىلدى. ماماندار وسى سالانى ىلگەرىلەتۋ ءۇشىن انيماتسيا بولەك وتاۋ بولسا دەيدى.
«بيىلعى جىلى ءبىز تۇركىتىلدەس ەلدەرگە ورتاق اڭىز، ەرتەگىلەر نەگىزىندە 10 انيماتسيالىق جوبا جاساپ جاتىرمىز. وسى جاقىندا 28-قاراشا مەن 3-جەلتوقسان ارالىعىندا ازەربايجان، باكۋدە تۇركىلدەس ەلدەردىڭ فورۋمى وتەدى. سول جەردە تۇركىتىلدەس ەلدەردىڭ ەرتەگىلەر نەگىزىندە 14 جوبا جاساساق دەگەن ۇسىنىستار بولىپ جاتىر»، «قازاقانيماتسيا» شىعارماشىلىق ورتالىعىنىڭ جەتەكشىسى جانىبەك ورازالى.
انيماتورلار مۋلتفيلمدەردى كەم دەگەندە 100 سەريادان شىعارساق دەگەن ۇسىنىس ايتتى. سوندا ول بالالاردىڭ جۇرەگىندە ورىن الىپ، برەندكە اينالادى. مىنە سول كەزدە كەيىپكەرلەردىڭ ويىنشىقتارى مەن سۋرەتتەرى باسىلعان كيىم-كەشەكتەرىن ساتىپ، ونەركاسىپتى دە دامىتۋعا بولادى دەپ ەسەپتەيدى.
www.24.kz
