قايىرىمدىلىققا قاراجات جيناۋ: زاڭعا وزگەرىستەر ەنگىزىلەدى

استانا. KAZINFORM - قايىرىمدىلىق قاراجاتىن جيناۋدىڭ اشىقتىعىن قامتاماسىز ەتۋ ماقساتىندا زاڭناماعا ءتيىستى تۇزەتۋلەر ازىرلەنىپ جاتىر. بۇل تۋرالى مادەنيەت جانە اقپارات ءمينيسترى ايدا بالايەۆا ءمالىم ەتتى.

- مەملەكەت باسشىسى ازاماتتىق قوعام سالاسىندا باسىم مىندەتتەردىڭ ءبىرى رەتىندە مەملەكەتتىك الەۋمەتتىك تاپسىرىس كريتەرييلەرىن قايتا قاراۋ جانە ۇكىمەتتىك ەمەس ۇيىمدار تۋرالى جاڭا زاڭ ازىرلەۋ ماسەلەسىن ايقىندادى. بۇل باعىتتا زاڭ جوبالارىن ازىرلەۋ بويىنشا جۇمىس الگوريتمى ازىرلەنىپ، ازاماتتىق قوعام وكىلدەرىنىڭ قاتىسۋىمەن جۇمىس توپتارى قۇرىلدى، - دەدى ايدا بالايەۆا ەلوردادا وتكەن ارداگەرلەر كەڭەسىنىڭ پلەنۋمىندا.

بۇگىندە ۇكىمەتتىك ەمەس ۇيىمداردىڭ قىزمەتى ءۇش زاڭمەن رەتتەلەدى:

- «قوعامدىق بىرلەستىكتەر تۋرالى» زاڭ؛

- «كوممەرتسيالىق ەمەس ۇيىمدار تۋرالى» زاڭ؛

- «ۇ ە ۇ- عا ارنالعان مەملەكەتتىك الەۋمەتتىك تاپسىرىس، گرانتتار مەن سىيلىقاقىلار تۋرالى» زاڭ.

- اتالعان زاڭ ۇكىمەتتىك ەمەس ۇيىمداردىڭ قاعيداتتارى مەن قىزمەت ەتۋ تەتىكتەرىن قامتيدى، حالىقارالىق تاجىريبە مەن ازاماتتىق قوعامنىڭ ۇسىنىستارى ەسكەرىلىپ، ازىرلەنەدى. سىزدەردىڭ ۇيىم دا ۇكىمەتتىك ەمەس ۇيىم بولعاندىقتان، اتالعان زاڭ جوباسىن ازىرلەۋگە بەلسەنە قاتىسۋعا شاقىرامىن، - دەپ ۆەدومستۆو باسشىسى ەل ارداگەرلەرىنە ۇندەۋ جولدادى.

سونداي-اق مينيستر ۇكىمەتتىك ەمەس سەكتوردى مەملەكەتتىك قارجىلىق قولداۋدىڭ نەگىزگى تەتىكتەرىنىڭ ءبىرى - مەملەكەتتىك الەۋمەتتىك تاپسىرىس ەكەنىن ايتا كەلە، جىل سايىن ەلىمىزدە 2 مىڭنان استام الەۋمەتتىك جوبا جۇزەگە اساتىنىن تىلگە تيەك ەتتى.

- دەگەنمەن، بۇل باعىتتا دا زامان تالابىنا ساي جۇيەلى وزگەرىستەر ەنگىزۋ كەرەك. وسى باعىتتاعى جۇمىس توبىنىڭ العاشقى وتىرىسى كۇنى كەشە ءوتتى، نەگىزگى تاسىلدەر ايقىندالدى. الداعى ۋاقىتتا زاڭ جوبالارى بويىنشا جاريا تالقىلاۋلار جۇرگىزىلەدى. قايىرىمدىلىق قاراجاتىن جيناۋدىڭ اشىقتىعىن قامتاماسىز ەتۋ ماقساتىندا زاڭناماعا ءتيىستى تۇزەتۋلەر ازىرلەنىپ جاتىر، - دەدى ايدا بالايەۆا.

ەسكە سالايىق، وتكەن جىلى مادەنيەت جانە اقپارات ءمينيسترى ايدا بالايەۆا قايىرىمدىلىق كومەك مەحانيزمدەرىن جەتىلدىرۋ قاجەتتىگىن قوزعاعان بولاتىن.

ايتا كەتسەك، بىلتىر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ ەلىمىزدە مەملەكەت قۇرعان نەمەسە مەملەكەتتىڭ قاتىسۋىمەن نەمەسە مەملەكەتتىڭ بەلگىلى ءبىر فۋنكسيالارى بەرىلگەن قورلارعا اۋديت جۇرگىزۋدى ۇسىندى.

بۇگىن ەلوردادا رەسپۋبليكالىق ارداگەرلەر ۇيىمى كەڭەسىنىڭ كەزەكتى پلەنۋمى ءوتتى. وعان ەلىمىزدىڭ بارلىق وڭىرىنەن ارداگەرلەر كەڭەسىنىڭ ءتوراعالارى قاتىستى.