قايىڭدى كولىنە اپاراتىن جول كۇزدە پايدالانۋعا بەرىلەدى
قونايەۆ. KAZINFORM - الماتى وبلىسىنىڭ تۋريزم باسقارماسى وڭىردەگى ەڭ كورىكتى ورىنداردىڭ ءبىرى - قايىڭدى كولىنە باراتىن 10 شاقىرىمدىق اۆتوجولدىڭ قۇرىلىسى تۋرالى حابارلادى.
ۆەدومستۆو باسشىسى قۋانىشبەك ميرامبەك ۇلىنىڭ ايتۋىنشا، كولگە اپاراتىن اۋداندىق ماڭىزى بار جولدى كۇردەلى جوندەۋ جۇمىستارى بەكىتىلگەن كەستەگە سايكەس جۇرگىزىلىپ جاتىر. ۋچاسكەنىڭ جالپى ۇزىندىعى - 9,9 شاقىرىم، مەردىگەر مەكەمە - «سەرۆيس نس» ج ش س.
قۇنى 2,43 ميلليارد تەڭگە بولاتىن جوبا جەرگىلىكتى بيۋدجەت ەسەبىنەن قارجىلاندىرىلعان. ال نەگىزگى جۇمىستار جول جابىنىنىڭ ساپاسىن جاقسارتۋعا جانە جول قوزعالىسى قاۋىپسىزدىگىن ارتتىرۋعا باعىتتالعان.
- قۇرىلىس جۇمىستارى 2025 -جىلدىڭ قازان ايىندا باستالدى، ال اياقتالۋى 2026 -جىلدىڭ قازانىنا جوسپارلانعان، - دەدى ول.
قايىڭدى كولىنە اپاراتىن جول قۇرىلىسى بىرنەشە جىلدان بەرى تالقىلانىپ كەلەدى. بۇل ماسەلەگە 2023 -جىلى «قايىڭدى - ساتى» تاۋ جولىندا بولعان جول اپاتىنان كەيىن ەرەكشە نازار اۋدارىلدى. ول كەزدە جولاۋشىلار مىنگەن اۆتوبۋس ۋاز اۆتوكولىگىمەن سوقتىعىسقان بولاتىن.
قازىر تۋريستەر الماتى وبلىسىنىڭ ەڭ كورىكتى ورىندارىنىڭ ءبىرىن كورۋ ءۇشىن ءالى دە جول تالعامايتىن كولىكتەرمەن قاتىناۋعا ءماجبۇر. ولار جولدىڭ ءبىر بولىگىن ەسكى ۋاز كولىكتەرىمەن ەڭسەرىپ، قالعان بولىگىندە جاياۋ جۇرەدى.
2025 -جىلدىڭ جازىندا كەگەن اۋدانىنىڭ اكىمى نۇرباقىت تەڭىزبايەۆ قايىڭدى كولىنە باراتىن اۆتوكولىك جولى قۇرىلىسىنىڭ جوبالاۋ- سمەتالىق قۇجاتتاماسى ازىرلەنگەنىن ايتقان ەدى.
