قايتىس بولعان ادامنىڭ نەسيەسىن كىم جابادى
قايتىس بولعان ادامنىڭ قارىزىن بالالارى نەمەسە تۋىسى وتەۋگە مىندەتتى مە؟ بۇل ماسەلە قازاقستاندىقتاردى ءجيى قىزىقتىرادى.

ويتكەنى، قارىز كەز كەلگەن مۇلىك سياقتى مۇراگەرلىككە اۋىسادى، ال مۇرانى الۋشىلار نەسيە بەرۋشىنىڭ الدىندا جاۋاپتى.
Massaget.kz ءتىلشىسى ەگجەي-تەگجەيىن ءبىلۋ ءۇشىن ادۆوكات جالعاس سەرىپحان قىزىنىڭ كومەگىنە جۇگىندى.
قايتىس بولعان ادامنىڭ كوممۋنالدىق تولەمدەر بويىنشا قارىزى، نەسيە، كەلىسىمشارتتىق قارىزى، ءوسىمپۇلدارى، ايىپپۇلدارى جانە ءتۇرلى سالىقتارى بولۋى مۇمكىن. ادۆوكاتتىڭ ايتۋىنشا، ق ر ازاماتتىق كودەكسىنىڭ 1081-بابىنا سايكەس، ەگەر مۇرا قالدىرۋشىنىڭ قانداي دا ءبىر بورىشتىق مىندەتتەمەلەرى بولسا، وندا نەسيە بەرۋشى مۇراگەردى بورىشكەر دەپ تانىپ، تالاپ قويۋعا قۇقىلى. ءبىراق مۇراگەردىڭ جاۋاپكەرشىلىك مولشەرى شەكتەۋلى جانە بۇل مۇلىكتىڭ قۇنىنان اسپاۋى كەرەك.
«زاڭ بويىنشا قايتىس بولعان ادامنىڭ قانداي دا ءبىر جىلجىمايتىن مۇلىگى، نەسيەسى بولسا، ونى مۇراگەر قابىلدايدى. نوتاريۋس قايتىس بولعان ادامنىڭ مۇراگەرى بار-جوعىن ءبىلۋ ءۇشىن ىزدەۋ جاريالاپ، مۇرانى اشادى. مۇراگەرلىك اشىلعاننان كەيىن مۇراگەرلەر قۇقىعىن، ياعني مۇرانى قابىلدايدى. مۇراگەرلىك التى اي ىشىندە راسىمدەلەدى. مۇرا بەرۋشىنىڭ بارلىق نەسيە، قارىز، جىلجىمايتىن مۇلىككە قۇقىقتارى مۇراگەرگە اۋىسادى. سول ساتتە بانك نەسيەنى مۇراگەردەن تالاپ ەتە الادى»، - دەيدى ادۆوكات.
مۇراگەر مۇلىك قالدىرۋشىنىڭ قارىزدارىن وتەۋى ءۇشىن كەلەسى شارتتار ورىندالۋى قاجەت:
مۇراگەر مۇرانى قابىلداۋى كەرەك. مۇراعا قۇقىق تۋرالى كۋالىك مۇرا اشىلعان كۇننەن باستاپ 6 اي وتكەن سوڭ بەرىلەدى؛
مۇراگەر وسيەت نەگىزىندە مۇرادان ايىرىلماۋى كەرەك؛
مۇراگەر مۇرادان باس تارتپاۋى كەرەك؛
مۇراگەر قانداي دا ءبىر مۇلىكتى الۋى كەرەك.
مۇراگەر ەشقانداي قارىز تولەمەۋى ءۇشىن مۇرا اشىلعان كۇننەن باستاپ 6 اي ىشىندە مۇرادان باس تارتا الادى. مۇرادان باس تارتۋ ءۇشىن مۇرا اشىلعان جەردە نوتاريۋسقا جازباشا ءوتىنىش بەرۋ كەرەك. مۇرانىڭ ءبىر بولىگىنەن، سىلتاۋ نەمەسە شارتپەن مۇرادان باس تارتۋعا بولمايدى.
«مۇراگەر مۇرادان باس تارتۋعا قۇقىلى. ياعني، قايتىس بولعان ادامنىڭ نەسيەسىن تولەۋدەن دە باس تارتا الادى. ول ءۇشىن مۇراگەر نوتاريۋسقا ءوتىنىش جازۋى كەرەك. ەگەر، ءبىرىنشى كەزەكتى مۇراگەر (اتا-انا، بالالارى، ايەلى) مۇرادان باس تارتسا، مۇرا ەكىنشى كەزەكتى مۇراگەرگە (بىرتەكتى تۋىس) وتەدى، ولار دا باس تارتاسا مۇرا يەسىز مۇلىك دەپ تانىلىپ، مەملەكەت مەنشىگىنە وتەدى»، - دەدى جالعاس سەرىپحان قىزى.
ادۆوكات مۇراگەر مۇرادان باس تارتىپ، مۇرا يەسىز مۇلىك دەپ تانىلسا، بانك قايتىس بولعان ادامنىڭ نەسيەسىن ءوزى جاباتىنىن اتاپ ءوتتى.
«مۇراگەر بولماي نەمەسە مۇرادان باس تارتىلعان جاعدايدا، قايتىس بولعان ادامنىڭ قارىزىن بانك ءوزى جابادى»، - دەپ مالىمدەدى ادۆوكات.
ايتا كەتەيىك، مۇراگەر ازامات قايتىس بولعانىمەن توقتامايتىن قارىزدىق مىندەتتەمەلەر بويىنشا عانا جاۋاپ بەرەتىنىن ءتۇسىنۋ ماڭىزدى. ياعني، مۇراگەر قايتىس بولعان تۋىسى ءۇشىنشى تۇلعانىڭ ومىرىنە نەمەسە دەنساۋلىعىنا كەلتىرگەن زيانى ءۇشىن مىندەتتەمە المايدى، اليمەنت تولەمەيدى.
ەسكە سالايىق، بۇعان دەيىن سوت ورىنداۋشىسى بورىشكەردىڭ شوتىن جاۋىپ، جۇرگىزۋشى كۋالىگىن تارتىپ الاتىنى تۋرالى جازعان ەدىك.