قايتارىلعان جەردىڭ كوبى حالىققا مال جايۋ ءۇشىن بەرىلىپ جاتىر
بۇگىن ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى تامارا دۇيسەنوۆا جايىلىمدىق جەرلەردى ۇتىمدى پايدالانۋ قادامدارى جايىنداعا ايتتى، دەپ حابارلايدى Kazinform.

«جالپى، اۋىل شارۋاشىلىعىنا مەملەكەتتىك قولداۋ كورسەتۋ ءۇشىن ۇكىمەت جۇيەلى شارالار قابىلداپ جاتىر. ماسەلەن، وسى سالاعا بولىنگەن سۋبسيديا كولەمى 430 ميلليارد تەڭگەگە دەيىن ءوستى. كوكتەمگى ەگىس جانە كۇزگى ەگىن وراعى ناۋقانىنا جىل سايىن بەرىلەتىن جەڭىلدەتىلگەن نەسيە كولەمى 70 تەن 140 ميلليارد تەڭگەگە ارتتى. سالاعا سالىنعان ينۆەستيسيالاردىڭ كولەمى 72 پايىزعا ارتىپ، 850 ميلليارد تەڭگەگە دەيىن جەتتى»، - دەدى ت. دۇيسەنوۆا.
ونىڭ ايتۋىنشا، ازىق-تۇلىك قاۋىپسىزدىگىن قامتاماسىز ەتۋ ىسىندە ەلىمىزدىڭ جەر رەسۋرستارىن، ونىڭ ىشىندە اۋىل شارۋاشىلىعى ماقساتىنداعى جەرلەردى ۇتىمدى جانە ءتيىمدى پايدالانۋ ماسەلەسى وتە وزەكتى.
«وسى ورايدا پايدالانىلماي بوس جاتقان نەمەسە ءبىر كەزدە زاڭسىز بەرىلگەن اۋىل شارۋاشىلىعى جەرلەرىن، ونىڭ ىشىندە جايىلىمدىق جەرلەردى قايتارۋ ءۇشىن بەلسەندى جۇمىس جالعاسىپ جاتىر. 2022 -جىلدىڭ باسىنان بەرى 8,5 ميلليون گەكتاردان استام جەر قايتارىلدى، ونىڭ 2,8 ميلليون گەكتارى قازىردىڭ وزىندە ەلدىڭ يگىلىگىنە بەرىلدى. قايتارىلعان جەردىڭ كوبى حالىققا مال جايۋ ءۇشىن بەرىلىپ جاتىر. بۇل رەتتە ءتيىستى زاڭنامالىق اكتىلەرگە جايىلىمداردى پايدالانۋ ماسەلەسى بويىنشا وزگەرىستەر ەنگىزۋ ءۇشىن پارلامەنت دەپۋتاتتارىنىڭ باستاماسىمەن اۋقىمدى جۇمىس جاسالىپ جاتقانىن اتاپ وتكىم كەلەدى. بۇل وزگەرىستەر، جايىلىمداردى باسقا جەر تۇرلەرىنە اۋىستىرۋعا تىيىم سالۋ، ولاردى مال جايۋ ءۇشىن رەزەرۆكە قويۋ، جايىلىمدىق جەرلەردى الۋ نورماتيۆتەرىن ۇلعايتۋ جانە باسقا دا نورمالار ارقىلى جايىلىمدىق جەرلەردى ۇتىمدى پايدالانۋعا مۇمكىندىك بەرەدى»، - دەدى ۇكىمەت باسشىسىنىڭ ورىنباسارى.